2 Abamwene 4 - IBAYIBOLO 2024

U Elisha akumwavwa umukolo umufwilwe

¹ Isiku limo umuchi uwa bamo abalaghuzi akamulilila u Elisha akati, “Umulume wane yuyo akaba mubombi wako afuye, sona uzimenye ukuti umubombi wako akaba muntu uwakumunyila u Mwene. Polelo umuntu yuyo akamukopezya inkongole izite pakubasenda abana bane babili ukuti abaghulizye pakuba bazya, pachifukwa icha nkongole yilayila.”

² U Elisha akamulalusya umukolo yula akati, “Ningakwavwa bulibuli? Mbuzya, nkimba uli ni vintu vyoni munyumba yako?” Umukolo yula akamwamula akati, “Ane ne wambombo wako inte ni chintu nachimochimo munyumba yane, loli kene akasonta aka mafuta.”

³ U Elisha akati, “Buka kubapalamani bako bosi wazime isonta zizyo mutalimo nakamokamo akantu.

⁴ Po awe na bana bako mwinjile munyumba nukwighalilako kumulyango. Mupungulilayemo amafuta musonta zyosi zila. Nanti isonta yizula, muyibike palubazi.”

⁵ Po umukolo yula akinjila munyumba yache poka na bana bache bala nukwiyighalila mulamula. Abana bache bakamusendelagha isonta yokayoka bo umwene akupungulilamo amafuta ghala.

⁶ Bo isonta zyosi zyizula na mafuta akamubuzya umwana wache akati, “Zagha ni yinji.” Loli umwana akamubuzya unyina akati, “Zyamala zyosi.” Po amafuta ghaleka pakufuluka mukasonta kala.

⁷ Umukolo yula akabuka ku mulaghuzi u Elisha nukumubuzya ukuti, “Buka ughulizye amafuta nukulipila inkongole. Po awe na bana bako mungabombezya indalama zizyo zyasalako.”

U Elisha nu mukolo wamu Shunemu

⁸ Isiku limo u Elisha akabuka ku Shunemu, kuko kukikalagha umukolo yumo umukabi nkani. Umukolo yula akamwitizya u Elisha ukuti alye ichakulya munyumba yache. Ukwandila pakabalilo kalakala bo u Elisha iza mu Shunemu, akizagha palapala pakulya ichakulya.

⁹ Umukolo yula akamubuzya umulume wache akati, “Ilelo nasimikizya ukuti umuntu yuyo akwiza kabilikabili panyumba yitu pano naloli muntu muzelu uwa Chala.

¹⁰ Zagha tumuzengele ichipinda ichamumwanya, tubikemo ichitala ni tebulo ni chitengo sona ni nyale umwakuti nanti iza pakutwendela aghonaye mulamula.”

¹¹ Isiku limo bo u Elisha iza akinjila muchipinda chache nukulambalala mulamula.

¹² Po akamubuzya uwambombo wache u Gehazi akati, “Mwitizye umukolo umu Shunemu.” U Gehazi akamwitizya umukolo yula, po akiza pamaso pa Elisha.

¹³ U Elisha akamubuzya u Gehazi akati, “Umubuzye umukolo yula uti, ‘Wayimba nkani pachifukwa icha sweswe. Nkimba ukulonda ukuti tukubombele choni? Nkimba chilipo chimo ichakuti tungakulabila kwa mwene wako pamo kwa songo uwa basilikali?’ ” Umukolo yula akamula akati, “Ane indi navyo vyosi vivyo nkuvilonda pakasi pabantu abaluko lwane.”

¹⁴ Po u Elisha akamulalusya u Gehazi akati, “Nkimba tungamubombela choni?” U Gehazi akamwamula akati, “Umukolo uyu ate nu mwana nayumo, sona umulume wache wepe mughosi.”

¹⁵ U Elisha akati, “Mwitizye sona.” Bo amwitizya, umukolo yula akimilila pamulyango.

¹⁶ U Elisha akamubuzya akati, “Pakabalilo ngati kanaka umwaka uwa indabi ukwiza pakupakata umwana umulumendo.” Umukolo yula akakana akati, “Awe, mwene wane, utakanzimbulaye. Awe we muntu uwa Chala.”

¹⁷ Loli bo ghachilapo amezi amanandi bulo, umukolo yula akamela ulwanda, sona akapapa umwana umulumendo ngati mumo u Elisha akamubuzizya.

¹⁸ Isiku limo bo umwana yula akula, akabuka kwa wise yuyo akaba poka na binuli.

¹⁹ Umwakuchenusya bulo akamubuzya uwise akati, “Umutu ghukumbaba! Umutu wane mwee!” Uwise akamubuzya uwambombo wache akati, “Buka nawe kwa nyina.”

²⁰ Uwambombo yula akamunyamula nukubuka nawe kwa nyina. Umwana yula akikala pavinama ivya nyina mupaka pamusanya, po pabumalilo akafwa.

²¹ Unyina akamunyamula umwana wache nukukwela nawe kuchipinda icha Elisha nukumulambalika pachitala icha Elisha, umuntu uwa Chala yula, po akafuma kuzi nukwighalilako kumulyango.

²² Akamwitizya umulume wache nukumubuzya ukuti, “Untumileko uwambombo weka ni mpunda iyakuti nendele pakubuka kwa Elisha umuntu uwa Chala yula nukunyokako lubilolubilo.”

²³ Umulume wache akamulalusya akati, “Nkimba choni chicho ukulonda pakubuka ilelo? Ilelo te lisiku ilya lusekelo ulwa Kupanta ukwa Mwezi pamo Isiku Ilyakutuzya?” Umuchi akamwamula akati, “Pate nachimochimo.”

²⁴ Po akabika ichakwikalilapo pampunda nukumubuzya uwambombo wache ukuti, “Uyichimbizye nkani impunda. Utakendaye panandipanandi mupaka pene papo nakulamula.”

²⁵ Po akanyamuka umwalubilolubilo nukubuka kwighamba ilya Kalimeli, kuko kukaba Elisha. Bo u Elisha, umuntu uwa Chala amwennya akwiza pabutali, akamubuzya u Gehazi uwambombo wache akati, “Ennya, umukolo umu Shunemu yula.

²⁶ Lubilo chimbila, ukomane nawe nukumulalusya ukuti, ‘Nkimba uli akiza bulo? Nkimba umulume wako ali akiza bulo? Nkimba umwana yula ali akiza bulo?’ ” Umukolo yula akamula akati, “Vyosi vili akiza bulo.”

²⁷ Bo umukolo yula afika kwa Elisha, umuntu uwa Chala yula, akafughama pamaso papache nukulema inyayo zyache. U Gehazi akiza ukuti amusunkile, loli umuntu uwa Chala akamubuzya akati, “Muleke! Fwandi utakumwennya ukuti ali muntamyo inkulu nkani? Loli u Mwene anvindite, sona atambuzizye ichifukwa chache.”

²⁸ Umukolo yula akamulalusya akati, “Wee mwene wane, nkimba nene nkakulaba umwana? Nkimba ntakakubuzya ukuti utakanzimbulaye?”

²⁹ U Elisha akamulamula u Gehazi akati, “Vunga inkazo yako nukuyipinya nu lamba mumusana wako, lubilolubilo senda indisa yane. Nanti ukukomana nu muntu muzila utakamulamukaye, sona nanti yumo akukulamuka, utakamwamulaye. Gholoka bulo kunyumba, uyilambalike indisa yane pacheni icha mwana.”

³⁰ Loli unyina yula akamubuzya u Elisha akati, “Nkulapa pamaso pa Mwene umumi, sona na pamaso papako ukuti ntakwiza pakukuleka nalumo.” Po u Elisha akanyamuka nukunyokela poka nu mukolo yula.

³¹ U Gehazi weyuyo akanda pakufika, po akayighoneka indisa pacheni icha mwana yula, loli patakivwika ukufuta pamo ichimanyilo chimo ichakuti umwana yula akaba mumi. U Gehazi akanyokela pakukomana nu Elisha nukumubuzya ukuti, “Umwana yula atazyukite.”

³² Bo u Elisha injila muchipinda mula akamwennya umwana umufwe yula bamulambalikite pachitala.

³³ Akighalila ulwiyi nukwiputa kwa Mwene.

³⁴ Po akaghona pamwanya pa mwana yula, akabika umulomu wache pa mulomu uwa mwana, amaso ghache pamaso agha mwana, sona inyobe zyache panyobe izya mwana yula. Bo alambalaye pamwanya pamubili uwa mwana yula, umubili uwa mwana yula ghukanda pakutukila.

³⁵ U Elisha akanyamuka, akendendeka muchipinda mula, po akalambalala sona pamwanya pa mwana yula. Umwana yula akatyesemula akaseveni nukwighula amaso ghache.

³⁶ U Elisha akamwitizya u Gehazi nukumubuzya ukuti, “Mwitizye unyina.” U Gehazi akamwitizya. Bo umukolo yula iza, u Elisha akamubuzya akati, “Umwana wako uyu.”

³⁷ Umukolo yula akinjila nukufughama panyayo izya Elisha bo icheni chache chikotamiye pasi. Po akamusenda umwana wache nukufuma kuzi.

U Elisha akupela ivyika ivinji vibili

³⁸ Pisinda pache u Elisha akanyokela sona ku Giligali. Pakabalilo kalakala muchigaba chilachila mukaba izala inkulu nkani. Bo akabukatila aka balaghuzi kali pakukomana nu Elisha, akamubuzya uwambombo wache akati, “Ikazya isonta inkulu nkani pamoto, ubapiyile ichakulya abayeni aba.”

³⁹ Umulaghuzi weka akabuka kumughunda pakuyaba inyanyi izya mani. Kulakula akagha ulutabo lulo lukayana na mayengala nukuyabamo ivikomwa vyache ivyinji nkani, po akavipinya mumwenda wache. Bo abwela, akavidumulannya nukuvibika musonta mula, napapo atakazimanya ukuti vikaba vikomwa vyoni.

⁴⁰ Bakabapa abantu ichakulya chila ukuti balye, loli bo bali pakulya, bakakolomoka bakati, “Wee muntu uwa Chala, musonta muli ivyakughogha! Po bakapotwa pakuchilya.”

⁴¹ U Elisha akati, “Senda bumo ubusu.” U Elisha akabusumbila musonta nukubalamula ukuti, “Mubape abantu ichakulya ukuti balye.” Po ichakulya chila chikaba akiza bulo.

⁴² Isiku limo umuntu yumo akiza ukufuma ku Baala Shalisha, po akamusendela umuntu uwa Chala ivibama 20 ivya mapemba aghakwanda pakutona, sona ni mitu iya malezi aghakwanda pakutona. U Elisha akamubuzya uwambombo wache akati, “Ubape abantu ukuti balye.”

⁴³ Uwambombo wache yula akamulalusya akati, “Nkimba ningabagabila bulibuli ichakulya chinichi abantu bosi banaba 100?” Loli u Elisha akamwamula akati, “Ubape abantu banaba, pakuti u Mwene ati, ‘Abantu bakwiza pakwikuta, sona chikwiza pakusyalapo chimo.’ ”

⁴⁴ Uwambombo yula akabagabila abantu bala ichakulya chila, po abantu bakalya nukuchilekapo chimo ukayana namumo u Mwene akanenela.