2 Abamwene 3 - IBAYIBOLO 2024

Aba Izilayeli bakulwa ubwite naba Mowabu

¹ Mumwaka uwa 18 bo u mwene u Yehoshafati akulaghila mu Yuda, u Yolamu umwana uwa Ahabu akaba we mwene uwa ba Izilayeli mu Samaliya, sona akalaghila amaka 12.

² U Yolamu akananga pamaso pa Mwene loli atakananga ngati mumo uwise nu nyina bakanangila. U Yolamu akamongolannya ichifwani icha Baala chicho uwise akazenga.

³ Pope bulo akabombagha zizyo u Yelobowamu umwana uwa Nebati akabombela pakubapela aba Izilayeli ukuti bope banangaye.

⁴ Pakabalilo kalakala u mwene u Mesha uwamu Mowabu akatekagha ing'ozi. Po akasonka umusonko uwa bana abang'ozi 100,000, sona na meya agha badubi 100,000 kwa mwene uwamu Izilayeli.

⁵ Loli bo u Ahabu afwa, u mwene uwamu Mowabu akamusambukila u mwene uwamu Izilayeli.

⁶ Pakabalilo kalakala u mwene u Yolamu akepamo mu Samaliya, nukubabungannya poka abasilikali bosi aba Izilayeli.

⁷ Po akamutumila u mwene u Yehoshafati uwamu Yuda amazyu aghakuti, “U mwene uwa ba Mowabu ansambukila. Nkimba utangabuka poka nane pakulwa ubwite naba Mowabu?” U Yehoshafati akamwamula akati, “Nkwiza pakubuka poka nawe. Ane indikulubazu lwako. Abantu bane bako, sona ni falasi zyane zyope zyako.”

⁸ U Yehoshafati akamulalusya akati, “Nkimba tukwiza pakwenda zila yoni bo tukubuka kubwite?” U Yolamu akamwamula akati, “Tukwiza pakwenda izila iya munkolongo iya Edomu.”

⁹ Po u mwene uwamu Izilayeli nu mwene uwamu Yuda bakabuka poka nu mwene uwamu Edomu. Bo benda umwakuzyungulila munkolongo amasiku seveni, abasilikali bala batakaba sona na mizi aghakung'wela poka ni vinyamana ivyakunyamula ukatundu.

¹⁰ U mwene uwamu Izilayeli akakolomoka akati, “Mwebaya, fwandi u Mwene atwitizya twe bamwene batatu, ukuti atubike munyobe izya ba Mowabu?”

¹¹ Loli u mwene u Yehoshafati akalalusya akati, “Nkimba kuno kutaliko nayumo umulaghuzi uwakuti tungabuzikizyako kwa Mwene?” Usongo weka uwa basilikali abamwene akamula akati, “Aliko u Elisha umwana uwa Shafati, yuyo akaba mwavwilizi uwa Eliya.”

¹² U Yehoshafati akati, “Naloli u Elisha we mulaghuzi uwa Mwene.” Po abamwene batatu bala bakabuka ku mulaghuzi u Elisha.

¹³ U Elisha akamulalusya u mwene u Yolamu akati, “Nkimba ukulonda nkubombele choni? Bukagha ku balaghuzi aba ghuso naba nyoko.” Loli u Yolamu akamula akati, “Awe, pakuti u Mwene weyuyo atwitizya aswe twe bamwene batatu umwakuti atubike munyobe izya ba Mowabu.”

¹⁴ U Elisha akamula akati, “Nkulapa pamaso pa Mwene Uwamaka Ghosi umumi, yuyo nkumubombela, nanti intakamuchindikagha u mwene u Yehoshafati uwamu Yuda, ngali inte namwe ni mbombo nayimoyimo.

¹⁵ Loli munyitizizye umuntu yuyo amenye nkani pakulizya ipango.” Bo umuntu yula ali pakulizya ipango, amaka agha Mwene ghakinjila mwa Elisha,

¹⁶ po akati, “U Mwene ati: Mukumbe iviliba mwikombe mosi.

¹⁷ Pakuti u Mwene akuti: Amwe mutakwiza pakuyennya nayimoyimo impepo pamo ivula, loli ikombe likwiza pakwizula na mizi. Po amwe poka ni ng'ombe, sona ni vinyamana vyinyu mukwiza pakung'wela amizi ghalaghala.

¹⁸ Ichintu ichi chipepe bulo kwa Mwene, sona akwiza pakubabika aba Mowabu munyobe zyinyu.

¹⁹ Amwe mukwiza pakutupota utwaya utukulu nkani sona utwiza nkani, tuto tuzyunguliliwe na malinga. Mukwiza pakughadumula amakwi ghosi agha seke nukwighalila imbwibwi zyosi izya mizi, sona mukwiza pakunangannya amaghunda ghabo ghosi agha muvundo pakusumbilamo amabwe.”

²⁰ Indabi yache pandabindabi, pakabalilo akakubikila ichakwiyipa, amizi ghakiza ukufumila kumbazu zyosi mu Edomu, umwakuti ichisu chosi chikizula na mizi.

²¹ Pakabalilo kalakala aba Mowabu bakivwa ukuti abamwene batatu bala bizite pakulwa nabo ubwite. Po bakabitizya abantu bosi abana na basongo bulo, babo bangalwa ubwite ukuti bize nukubabambika mumpaka.

²² Pandabindabi bo aba Mowabu balamusya, izuba likalamagha pamizi. Po aba Mowabu bala bakaghennya amizi ghala ghagho ghakaba machesamu ngati po libanda.

²³ Po bakati, “Ennya ibanda! Abamwene bala balwa benebene nukughoghana. Losi ulu twende tufyule ivintu vyabo.”

²⁴ Loli bo aba Mowabu bala bafika kuvisakasa ivya ba Izilayeli, aba Izilayeli bala bakavundumuka nukwanda pakulwa nabo, umwakuti aba Mowabu bala bakachimbila. Aba Izilayeli bakabachimbizya aba Mowabu mupaka muchisu chabo nukubaghogha bosi.

²⁵ Aba Izilayeli bakatunangannya utwaya twabo utukulu, sona umuntu wesi akasumbila amabwe mumaghunda ghabo agha muvundo, umwakuti ichisu chosi chikizula na mabwe. Bakighalila imbwibwi zyabo zyosi izya mizi nukudumula amakwi ghosi agha seke. Akaya akakulu nkani kene aka Kili Helesi ko kako kakapona kumabwe ghala, loli abasilikali babo bakaba ni fyata bakakazyungulila nukakapota.

²⁶ Bo u mwene uwa ba Mowabu ennya ukuti ubwite bwamupota, akabasenda abasilikali 700 babo bakaba na bapanga ukuti bapankule pakulwa nu mwene uwa ba Edomu, loli bakapotwa.

²⁷ Po akamusenda ukatote wache yuyo akaba wakumupyana pakuba we mwene, nukumubika pakuba chakwiyipa pilinga ilya kaya akakulu nkani kala. Zinizi zikabakalalizya nkani aba Izilayeli, umwakuti bakamutoloka u mwene wabo, nukunyokela kuchisu chabo.