2 Abamwene 25 - IBAYIBOLO 2024

Ukumongoliwa ukwa kaya akakulu nkani aka Yelusalemu

¹ Pakabalilo kalakala u Zedekiya akamusambukila u mwene uwamu Babiloni. Pisiku ilya 10, mumwezi uwa 10, mumwaka uwa nayini, bo u Zedekiya akulaghila, u mwene Nebukadineza uwamu Babiloni, poka na basilikali bache bosi akabuka pakulwa ubwite nakaya akakulu nkani aka Yelusalemu. Akasimika ivisakasa sona akazenga ivitembe umwakukazyungulila akaya kosi kala.

² Bakakazyungulila akaya kala mupaka mumwaka uwa 11 uwa bulaghili ubwa Zedekiya.

³ Pisiku ilya nayini mumwezi uwafolo uwa mwaka ghulaghula izala yikawa nkani, umwakuti abantu batakaba ni chakulya nachimochimo.

⁴ Ilinga ilya kaya akakulu nkani kala likamongoliwa. Napapo abantu aba mu Babiloni bakakazyungulila akaya akakulu nkani kala, abasilikali bosi bakachimbila pabusiku. Bakafumila ku mulyango uwa pakasi pavibumba vibili, papipi nu mughunda uwa mwene, bakachimbilila kwikombe ilya Alaba,

⁵ loli abasilikali aba mu Babiloni bakamuchimbizya u mwene nukumulema mumakombe agha Yeliko. Abasilikali bache bosi bakamutoloka nukunyampana.

⁶ Bakabuka nawe kwa Nebukadineza mu Libila, kuko u Nebukadineza akadumula inongwa yache.

⁷ Bakabaghogha abana abalumendo aba Zedekiya pamaso papache. Bakamukolompola amaso ghache nukumupinya ni mpingu izya mukuba, po bakabuka nawe ku Babiloni.

Ukunanganika ukwa Nyumba iya Chala

⁸ Pisiku ilyaseveni ilya mwezi uwafayivi, mumwaka uwa 19 bo u mwene u Nebukadineza akulaghila mu Babiloni, u Nebuzaladani usongo uwa balindilili aba kunyumba iya bumwene, lilyo likaba likambala ilya mwene uwamu Babiloni, akiza mu Yelusalemu.

⁹ Akocha Inyumba iya Mwene, ni nyumba iya bumwene, sona ni nyumba zyosi izya mu Yelusalemu. Akocha sona inyumba zyosi izya abantu abapamwanya.

¹⁰ Abasilikali bosi aba ku Babiloni babo bakaba pasi pabulaghili ubwa songo uwa mulindilili bakaghamongolannya amalinga ghosi ghagho ghakazyungulila akaya akakulu nkani aka Yelusalemu.

¹¹ U Nebuzaladani usongo uwa balindilili akabasendela abakusyala kuchisu icha buzya, abantu bamo babo bakaba bapina nkani mukaya akakulu nkani, poka na bafundi bosi sona na bantu babo bakamutoloka u mwene uwamu Babiloni.

¹² Loli usongo uwa balindilili yula akabaleka abantu bamo abapina nkani kwisinda muchisu chila, ukuti balimaye mumaghunda agha mampesya sona na maghunda aghanji.

¹³ Aba Babiloni bakamongolannya impanda izya mukuba, ni ndatikilo izya mukuba, sona ni sonta iya mukuba vivyo vikaba mu Nyumba iya Mwene. Bakasenda umukuba nukubuka nawe ku Babiloni.

¹⁴ Bakasenda sona isonta na mafosholo ni nyale na mabeseni sona ni vibombelo vyosi ivya mukuba vivyo vikaba vibombelo pakabalilo aka chiputo mu Nyumba iya Mwene.

¹⁵ Usongo uwa balindilili yula akasenda inyale ni mbale zizyo zikaba zya golide pamo u siliva umwenecho.

¹⁶ Umukuba uwa mpanda zibili zila imbale vivyo u Solomoni akavipanga ukuti vibanje vya mu Nyumba iya Mwene vyosi ubung'wamu bwache bukaba busita kubelengiwa.

¹⁷ Ubutali ubwa mpanda yosi bukaba amamita eyiti mumwanya. Impanda yoka iya mukuba iya pamwanya yikaba imita lyoka nu hafu mumwanya. Sona bakayilabannya ni vilepa namanyele umwakuzyungulila. Impanda iyinji yila yope bakayilabannya umwakuyana bulo.

Abantu aba mu Yuda basendiwa pakubuka ku Babiloni

¹⁸ Usongo uwa balindilili yula akamulema u Selaya usongo uwa baputi nu Zefaniya uwabubili uwa muputi usongo, sona na balindilili batatu aba pamulyango.

¹⁹ Mukaya akakulu nkani kala, akamulemamo usongo uwa basilikali, sona na bantu fayivi abakumulingannya u mwene amahala. Akamulema sona nu musimbi, yuyo akabasimbagha abantu pakuba basilikali aba muchisu na banavuli 60 babo bakaghiwa mukaya akakulu nkani mula.

²⁰ U Nebuzaladani usongo uwa basilikali akabasenda bosi nukubuka nabo kwa mwene uwa ku Babiloni ku Libila.

²¹ U mwene akabaghoghela mu Libila muchigaba icha Hamati. Po abantu aba mu Yuda bakalemiwa pakuba bakayidi kubutali nkani ni chisu chabo.

U Gedaliya umulaghili uwamu Yuda

²² U Nebukadineza u mwene uwamu Babiloni akamusala u Gedaliya umwana uwa Ahikamu umwana uwa Shafani pakuba mulongozi uwa bantu babo bakasyalikila muchisu icha Yuda.

²³ Bo abasilikali abasongo bosi, na bantu babo bivwa ukuti u mwene uwamu Babiloni akamusala u Gedaliya pakuba mulaghili, bakiza kwa Gedaliya yuyo akaba mu Mizipa nu Ishimayeli umwana uwa Netaniya nu Yohanani umwana uwa Kaleya nu Selaya umwana uwa Tanihumeti umu Netofa nu Yazaniya umwana uwa Maaka, sona na bantu babo.

²⁴ U Gedaliya akalapa ichilapo nukubasimikizya abantu bala ukuti, “Mutakaghanyilaye amakambala agha mu Babiloni. Mwikalane muchisu chinichi nukumubombela u mwene, po ivintu vyosi vikwiza pakubendelagha akiza nkani.”

²⁵ Loli mumwezi uwaseveni, u Ishimayeli umwana uwa Netaniya, umwana uwa Elishama yuyo akaba uwa kunyumba iya bumwene, akiza poka na bantu 10 pakulwa ubwite nu Gedaliya nukumughogha. Akabaghogha sona aba Yuda na bantu aba mu Babiloni babo bakaba poka nawe pa Mizipa.

²⁶ Pakabalilo kalakala aba Izilayeli bosi, abakabi, na bapina, poka na abasilikali abasongo, bakanyamuka nukubuka ku Ijiputi, pachifukwa ichakuti bakabanyilagha aba Babiloni.

U Yehoyakini Asatuliwa

²⁷ Mumwaka ghugho u Evili Melodaki akaba we mwene uwa Babiloni, akamupelela ichisa u mwene u Yehoyakini uwamu Yuda nukumusatula mujele. Vinivi vikabombiwa pisiku ilya 27 mumwezi uwa 12.

²⁸ Akanena nawe umwakumupelela ichisa nukumupa ubuzilo ubwamuchizi ukubachila abamwene bosi abanji babo bakaba nawe mu Babiloni.

²⁹ Po u Yehoyakini akavula amenda ghache agha mujele, sona mubumi bwache bosi, isiku ni siku akalyanga poka nu mwene.

³⁰ Isiku ni siku u mwene akamupanga u Yehoyakini indalama zizyo akapimiliwa pakupokela mubumi bwache bosi.