2 Abamwene 24 - IBAYIBOLO 2024

¹ Bo u Yehoyakimu akulaghila, u mwene u Nebukadineza uwamu Babiloni akalwa ubwite ni chisu icha Yuda, umwakuti Yehoyakimu akaba pasi pabulaghili ubwa Nebukadineza amaka matatu. Loli pisinda pache akandula inyinong'ono nukumusambukila u Nebukadineza.

² U Mwene akatuma amavyondongo agha mu Babiloni nagha mu Siliya nagha mu Mowabu sona nagha mu Amoni pakuchinangannya ichisu icha Yuda, ukuyana namumo u Mwene akababuzizya ababombi bache abalaghuzi.

³ Naloli vinivi vikabombiwa kuchisu icha Yuda ukuyana namumo u Mwene akalamulila, umwakuti abefye pamaso papache pachifukwa icha mbibi zizyo u Manase akabombagha.

⁴ Ukonjelezyapo ukubaghogha abantu abasita nongwa. Pakuti u Manase akizuzya akaya akakulu nkani aka Yelusalemu ni banda ilya bantu babo bate ninongwa nayimoyimo, po u Mwene atakalondagha pakumuhobokela u Manase.

⁵ Imbombo izinji zyosi zizyo u Yehoyakimu akabomba zisimbiwe mwibuku ilya Mbili iya bamwene aba ba Yuda.

⁶ U Yehoyakimu akafwa. Po umwana wache u Yehoyakini akamupyana pakuba we mwene.

⁷ Pakabalilo kalakala u mwene uwamu Ijiputi atakepamo sona muchisu chache pakulwa ubwite, pachifukwa ichakuti u mwene uwamu Babiloni akamufyula ichisu chache chosi, ukwandila ko kukasoko kumpaka iyakumitu iya Ijiputi mupaka kulusoko ulwa Yufuleti.

U mwene u Yehoyakini akulaghila mu Yuda

⁸ U Yehoyakini akaba na maka 18 bo anda pakulaghila mu Yuda, sona akalaghila bulo amezi matatu bo ali mu Yelusalemu. Unyina akaba we Nehushita umwana uwa Elinatani uwamu Yelusalemu.

⁹ U Yehoyakini akananga pamaso pa Mwene, ukuyana namumo uwise akabombelagha.

¹⁰ Pakabalilo kalakala abasongo aba basilikali abamwene u Nebukadineza uwamu Babiloni bakiza nukuzenga ivisakasa ivya bwite umwakukazyungulila akaya akakulu nkani aka Yelusalemu.

¹¹ Po u Nebukadineza umwenecho akiza kulakula, bo abasilikali bache bakukazyungulila akaya kalakala.

¹² U mwene u Yehoyakini uwamu Yuda poka nu nyina na bambombo bache na basongo aba basilikali bache sona na makambala ghache bakibika bene munyobe izya mwene uwamu Babiloni. Mumwaka uwa eyiti bo u mwene uwamu Babiloni akulaghila, akamulema u Yehoyakini pakuba mukayidi.

¹³ U Nebukadineza akasenda ivintu vyosi ivyamutengo vivyo vikaba muchipinda ichakusungilamo ubukabi ubwa mu Nyumba iya Mwene, sona na munyumba iya bumwene, ukuyana namumo u Mwene akanenela. Akasenda sona ivibombelo vyosi ivya golide vivyo u mwene u Solomoni uwamu Izilayeli akavipanga ukuti vibanje mu Nyumba iya Mwene.

¹⁴ Akabalema abantu bosi aba mu Yelusalemu nukubuka nabo pakuba bazya. Akasenda amakambala ghosi na basilikali sona na bafundi bosi, umwakuti bosi poka bakabapo 10,000. Loli akabaleka abantu abapina nkani mulamula.

¹⁵ U Nebukadineza akamulema u Yehoyakini nukubuka nawe ku Babiloni pakuba mukayidi. Akamulema sona unyina na bachi bache na makambala ghache sona na bantu abamanyikwe aba mu Yelusalemu nukubuka nabo ku Babiloni.

¹⁶ U mwene uwa Babiloni akabalema abasilikali 7,000 nukubuka nabo ku Babiloni pakuba bakayidi, na bantu abamaka babo bangalwa ubwite, sona na bafundi 1,000.

¹⁷ Po u mwene uwa Babiloni akamwimika u Mataniya u uwise umunandi uwa Yehoyakini pakuba we mwene, sona akandula itabwa lyache pakuba we Zedekiya.

U mwene u Zedekiya akulaghila mu Yuda

¹⁸ U Zedekiya akaba na maka 21 bo anda pakulaghila, sona akalaghila amaka 11 bo ali mu Yelusalemu. Unyina akaba we Hamutali uwamu Libina, umwana umulindu uwa Yelemiya.

¹⁹ U Zedekiya akamunangila u Mwene ngati mumo u Yehoyakimu akabombelagha.

²⁰ U Mwene akakalala nkani pachifukwa ichakuti ivintu vyosi vinivi vikabombiwa mu Yelusalemu na mu Yuda. Po pabumalilo pache akabefyapo pamaso papache. Po u Zedekiya akamusambukila u mwene uwamu Babiloni.