2 Abamwene 23 - IBAYIBOLO 2024

U Yosiya akufinga ichipyachipya

¹ Po u mwene akabitizya poka abasongo bosi aba mu Yuda, naba mu Yelusalemu.

² Akabuka ku Nyumba iya Mwene, poka na bantu aba mu Yuda, naba mu Yelusalemu, na baputi, sona na balaghuzi, kokuti ukwandila umwana umunandi mupaka usongo. Akababelengela amazyu agha mwi buku ilya lufingo, lilyo bakalyagha mu Nyumba iya Mwene.

³ U mwene akimilila papipi ni mpanda nukufinga chipyachipya pamaso pa Mwene, ukuti akwiza pakumwivwilagha nukukonka amalamulo ghache ni ndaghilo zyache sona ni vimanyisyo vyache nu moyo wache ghosi, sona nu muzimu wache ghosi, umwakuti asimikizye amazyu agha lufingo ghagho ghasimbiwe mwibuku linili. Po abantu bosi bakafinga ukuti bakwiza pakusunga ulufingo lula.

⁴ U mwene akamulamula umuputi usongo u Hilikiya nu wabubili bache sona na balindilili aba pamulyango ukuti befyemo mu Nyumba iya Mwene ivibombelo vyosi vivyo vikaba vya Baala nu Ashela sona ni vibombelo vyosi ivya ntondwa izya kumwanya. Vyosi vinivi akavyochela kuzi ukwa kaya akakulu nkani aka Yelusalemu mwikombe ilya Kidiloni, sona akalisenda itoyi nukubuka nalyo ku Beteli.

⁵ U Yosiya akabefyapo pambombo abaputi bosi abakuzi babo abamwene aba mu Yuda bakabimika ukuti babikaye ivyakwiyipa ivyakocha pavighemo mutwaya utukulu nkani utwa Yuda, sona nu buzilo bosi ubwa papipi nakaya akakulu nkani aka Yelusalemu, kokuti abaputi bosi babo bakabika ivyakwiyipa kwa Baala na kwizuba na kumwezi na kuntondwa zyosi izyakumwanya.

⁶ Akachefyamo ichifwani icha chala umukolo u Ashela mu Nyumba iya Mwene, akabuka nacho kwikombe ilya Kidiloni kuzi ukwa kaya akakulu nkani aka Yelusalemu, nukuchocha kulakula. Akachisya pakuba litoyi, po akalisumbila itoyi lila mumapumpa agha bantu bulo.

⁷ Akamongolannya inyumba zizyo abantu bakabombelaghamo ubwamalaya, zizyo zikaba mu Nyumba iya Mwene sona mumo abakolo bakalukagha inkazo zizyo abantu babo bakamwiputagha u Ashela bakavwalagha.

⁸ U Yosiya akiza na baputi bosi aba mutwaya twa Yuda nukubunyazya ubuzilo ubwa pamwanya ubwakwiputilapo kuko abaputi bala bakabikaghako ivyakwiyipa ukwandila ku Geba mupaka ku Belisheba. Akamongolannya inyumba zyosi zizyo zikaba pamulyango uwa Yoshwa, umwilili uwa kaya akakulu nkani kala, ghugho ghukaba kumongo ukwa mulyango uwa kaya kala.

⁹ Napapo abaputi abamunyumba izyapamwanya izyakwiputilamo batakabomba imbombo pachighemo icha Mwene mu Yelusalemu, loli bakalyanga ichibama chicho chite ni chilungo poka na baputi abanji.

¹⁰ Akabunyazya ubuzilo ubwa Tofeti bubo bukaba mwi Kombe ilya Beni Hinomu, umwakuti patakabapo nayumoyumo yuyo akamubika umwana wache umulumendo pamo umulindu ukuti chibanje chakwiyipa kwa Moleki.

¹¹ Bakazyefyamo ifalasi zizyo abamwene aba mu Yuda bakazipaghulila kwa chala uwa izuba pamulyango uwa Mwene pabwinjililo ubwa Nyumba iya Mwene papipi ni chipinda icha ikambala u Natani Meleki. U Yosiya akazyocha ingolo izya bwite zizyo bakazipaghulila kwi zuba.

¹² Akamongolannya ivighemo vivyo abamwene aba mu Yuda bakazenga pachisonje icha chipinda icha mumwanya icha Ahazi, sona ni vighemo vivyo u Manase akazenga muntanda zibili mu Nyumba iya Mwene. Akazyefyapo nukuzimongolannya pakuba litoyi nukulisumbila mwikombe ilya Kidiloni.

¹³ Pisinda pache u mwene akanangannya sona inyumba izyakwiputilamo abachala abayeni zizyo zikaba kubufumilo ubwa Yelusalemu kuntende ukwa lighamba ilya umwiko. Inyumba zizyo u Solomoni, u mwene uwa ba Izilayeli, akamuzengela u Ashitoleti u chala uwamwiko Sidoni, u chala umukolo uwa Sidoni nu kemoshi u chala uwa mwiko uwa Mowabu, sona u Moleki, uchala uwa mwiko u Amoni.

¹⁴ U Yosiya akanangannya sona amabwe amapaghuliwa ghala nukuwisizya pasi impanda izya Ashela nukwizuzya ubuzilo bosi bula na mafupa agha bantu.

¹⁵ U Yosiya akachimongolannya sona ichighemo icha Beteli nu buzilo ubwapamwanya ubwakwiputilamo bubo u Yelobowamu umwana uwa Nebati akazenga, pakubapela aba Izilayeli ukuti bope banangaye. Akafwantannya amabwe nukughasya pakuba lufumbi, sona akocha ichifwani icha chala u Ashela.

¹⁶ Bo u Yosiya atalankannya, akaghennya amapumpa ghagho ghakaba pamwanya pighamba, akabatuma abantu pakusenda amafupa mumapumpa nukughocha pachighemo nukuchinyazya ukuyana namumo u Mwene akanenela zila nizya vintu ivi ukwendela mwa mulaghuzi.

¹⁷ U mwene akalalusya akati, “Nkimba ipumpa lilyo nkulyennya lya wenu?” Abantu aba mukaya akakulu kala bakamubuzya bakati, “Linili lyo lipumpa ilya mulaghuzi uwa Chala uwaku Yuda yuyo akanenela zila nizya zizyo wabomba pachighemo icha Beteli.”

¹⁸ U Yosiya akababuzya akati, “Atakabepo nayumoyumo uwakwefyamo mwipumpa amafupa ghache.” Po bakaghaleka amafupa ghache poka na mafupa agha balaghuzi aba mu Samaliya bala.

¹⁹ U Yosiya akazinangannya sona inyumba izyakwiputilamo abachala aba vifwani ngati mumo akabombela ku Beteli, zizyo zikaba mutwaya utukulu nkani utwa Samaliya. Abamwene aba mu Izilayeli bo babo bakazenga inyumba zinizi nukumukalalizya u Mwene.

²⁰ U Yosiya akabaghoghela pachighemo abaputi abamunyumba zilazila sona akaghochela amafupa agha bantu palapala. Po akanyokela ku Yelusalemu.

Ukusekela Ulusekelo ulwa Pasa

²¹ U mwene u Yosiya akabalamula abantu bosi akati, “Mwize ku Lusekelo ulwa Pasa ulwakumuchindika u Mwene u Chala winyu, ukuyana namumo zisimbiliwe mwi buku ilya lufingo.”

²² U Pasa yunuyu atakabangapo ukwandila pakabalilo aka balongi, babo bakalaghilagha aba Izilayeli, pamo pakabalilo aka bamwene aba mu Izilayeli, na bamwene aba mu Yuda.

²³ Loli mumwaka uwa 18 bo u mwene u Yosiya akulaghila, Ulusekelo ulwa Pasa ulwakumuchindikila u Mwene lukabangapo mu Yelusalemu.

²⁴ Ukonjelezyapo, u Yosiya akabefyamo abantu babo bakubuzikizyanga ku mizimu na bamayele nu twachala utwa munyumba ni vifwani sona ni vintu vyosi ivyamwiko vivyo vikaba mu Yuda na mu Yelusalemu. U Yosiya akabomba bunubu pakufisya zizyo ibuku ilya ndaghilo lilyo umuputi u Hilikiya akalyagha mu Nyumba iya Mwene.

²⁵ Bo u Yosiya atimikiwe pakuba we mwene, patakabapo nayumoyumo u mwene yuyo akayana nawe, yuyo nu moyo wache ghosi ni nyinong'ono zyache zyosi sona na maka ghache ghosi akiyipa kwa Mwene ukuyana nu Lulaghilo ulwa Mozesi sona atakabapo nayumoyumo kwisinda kukwache yuyo akayana nawe.

²⁶ Pope bulo ubukali ubwakoghofya ubwa Mwene butakatozoka pa Yuda pa zizyo akamubombela u Mwene, pachifukwa icha vyosi vivyo u Manase akamukalalizya navyo.

²⁷ Po u Mwene akati, Nkwiza pakwefya ichisu icha Yuda pamaso papane ngati mumo nkefesezya ichisu icha Izilayeli sona nkwiza pakukakana akaya akakulu nkani aka Yelusalemu, kako nkakasala poka ni nyumba, yiyo nkati, “Ane nkwiza pakuchindikiliwanga mulamula.”

Ubulaghili ubwa Yosiya bwamala

²⁸ Imbombo izinji zyosi zizyo u Yosiya akabomba zisimbiwe mwibuku ilya Mbili iya bamwene aba ba Yuda.

²⁹ Bo u mwene u Yosiya akulaghila, u Falabo u Neko uwamu Ijiputi akabuka kulusoko ulwa Yufuleti pakumwavwa u mwene uwamu Asiliya. U mwene u Yosiya akabuka pakulwa nawe ubwite. Loli u Falabo Neko akamughoghela u Yosiya ku Megido.

³⁰ Po amakambala gha Yosiya ghakaghunyamulila umuvimba wache mungolo nukubuka nagho ku Yelusalemu. Bakamusyila mwipumpa ilyache ni lyache. Po abantu aba mu Yuda bakamusenda umwana wache u Yehowahazi, bakamupakazya amafuta nukumwimika pakuba we mwene pakumupyana uwise.

U mwene u Yehowahazi akulaghila mu Yuda

³¹ U Yehowahazi akaba na maka 23 bo anda pakulaghila, sona akalaghila amezi matatu bulo bo ali mu Yelusalemu. Unyina akaba we Hamutali umwana uwa Yelemiya, uwamu Libina.

³² Akamunangila u Mwene ngati mumo abanyenya bache bakabombelagha.

³³ U Falabo Neko akamupinya ni mpingu mu Libila muchisu icha Hamati umwakuti atakalaghilaye sona mu Yelusalemu, nukubalamula abantu aba mu Yuda ukuti basonkaye umusonko amakilogalamu 3,400 agha siliva, sona na makilogalamu 34 agha golide.

³⁴ U Falabo Neko akamwimika u Eliyakimu umwana uwa Yosiya pakumupyana uwise, po akalyandula itabwa lyache pakuba we Yehoyakimu. U Falabo Neko akamusenda u Yehowahazi nukubuka nawe ku Ijiputi, nukufwila kulakula.

³⁵ U Yehoyakimu akamupa u Falabo Neko usiliva nu golide ukuyana namumo akalondelagha. Ukuti azyaghe indalama izi, umuntu wesi uwa muchisu chila, akasonka isonko ukuyana namumo akabela ni chuma chache, sona namumo akapimiliwa.

U mwene u Yehoyakimu akulaghila mu Yuda

³⁶ U Yehoyakimu akaba na maka 25 bo anda pakulaghila, sona akalaghila amaka 11 bo ali mu Yelusalemu. Unyina akaba we Zebida, umwana uwa Pedaya uwamu Luma.

³⁷ U Yehoyakimu akamunangila u Mwene, ngati mumo abanyenya bache bakabombelagha.