2 Abamwene 22 - IBAYIBOLO 2024

U mwene u Yosiya akulaghila mu Yuda

¹ U Yosiya akaba na maka eyiti bo anda pakulaghila, sona akalaghila amaka 31 bo ali mu Yelusalemu. Unyina akaba we Yedida umwana uwa Adaya, uwa mukaya akakulu aka Bozikati.

² Akamuhobosya u Mwene pakubomba ingolosu, sona akabombagha zyosi zizyo umunyenya wache u Devedi akabombagha, po atakapaghukila kundilo pamo kumongo.

Ibuku ilya Ndaghilo lyaghiwa

³ Mumwaka uwa 18 bo u mwene u Yosiya akulaghila, akamutuma umusimbi wache u Shafani umwana uwa Azaliya, umwizukulu uwa Meshulamu ku Nyumba iya Mwene. Po akati,

⁴ “Bukagha ku muputi usongo u Hilikiya umubuzye ukuti abelengele indalama zizyo abantu biza nazyo ku Nyumba iya Mwene zizyo abalindilili aba pamulyango bakapokela kubantu.

⁵ Indalama zinizi abape abantu babo bakwenelezya imbombo iyakuzenga Inyumba iya Mwene ukuti babalipile abantu babo bakuyiyannya sona Inyumba iya Mwene.

⁶ Babalipile abapalamatabwa na bazengi sona na bazengi babo bakuzengela amabwe. Sona baghule na matabwa na mabwe aghakuyanizya Inyumba iya Mwene.

⁷ Loli atakabepo nayumoyumo uwakubalalusya namumo bakabombezya indalama zila, pachifukwa bakabombela mubusubiliwa.”

⁸ Umuputi usongo u Hilikiya akamubuzya u Shafani umusimbi akati, “Nalyagha Ibuku ilya Ndaghilo mu Nyumba iya Mwene.” Akamupa u Shafani ibuku lila, po akalibelenga.

⁹ U Shafani umusimbi yula akabuka kwa mwene pakumupangila ukuti, “Amakambala ghako ghasenda indalama zizyo zikaba mu Nyumba iya Mwene, sona babalipiye abambombo na bakapitawa babo bakubomba imbombo ku Nyumba iya Mwene.”

¹⁰ U Shafani umusimbi yula akamubuzya u mwene akati, “Umuputi usongo u Hilikiya ampa ibuku.” Po Shafani akalibelenga pamaso pa mwene.

¹¹ Bo u mwene aghivwa amazyu agha mwi Buku ilya Ndaghilo, akazepulannya inkazo yache pachifukwa icha chitima.

¹² Po akamulamula umuputi u Hilikiya nu Ahikamu umwana uwa Shafani nu Akiboli umwana uwa Mikaya nu Shafani umusimbi, sona nu Asaya uwambombo uwa mwene akati,

¹³ “Buka mumbuzikizyeko kwa Mwene, sona na mubuzilo ubwa bantu bosi aba mu Yuda pamazyu ghagho ghakasimbiwa mwibuku lilyo lyaghiwa. Pakuti u Mwene atukalalila nkani, pachifukwa ichakuti abanyenya bitu batakivwila amazyu agha mwibuku ili, sona batakabomba zizyo amazyu ghosi ghagho ghasimbiwe aghakunena nizya aswe.”

¹⁴ Umuputi u Hilikiya yula nu Ahikamu nu Akiboli nu Shafani, sona nu Asaya bakabuka kwa mulaghuzi umukolo u Hulida, umuchi uwa Shalumu umwana uwa Tikiva, umwizukulu uwa Halihasi, yuyo akaba musungi uwa menda. U Hulida yula akikalagha mu Yelusalemu muchigaba ichabubili.

¹⁵ U Hulida yula akababuzya akati, “U Mwene u Chala uwa Izilayeli ati: Mumubuzye umuntu yuyo abatumite kukwane muti,

¹⁶ ‘U Mwene ati: Nkwiza pakukawisizya intamyo akaya akakulu nkani kanaka, poka na bantu babo bakwikala mulamula, ukuyana na vyosi vivyo visimbiwe mwibuku lilyo u mwene uwamu Yuda alibelengagha.

¹⁷ Pachifukwa ichakuti abantu bankana nukufukizya utwakununkila ku bachala abanji, nukunkalalizya ni vifwani vyabo vyosi vivyo bapangite ni nyobe zyabo, po ane nkwiza pakukakalalila akaya akakulu nkani kanaka, umwakuti ubukali bwane butakwiza pakutozoka nalumolumo.’

¹⁸ Mumubuzye u mwene uwamu Yuda, yuyo abatumite pakumubuzikizya u Mwene mutinji, ‘U Mwene u Chala uwa Izilayeli akunena nizya mazyu ghagho mwaghivwa akuti:

¹⁹ Pachifukwa ichakuti wapinduka, nukwiyisya wemwene pamaso pa Mwene, bo wivwa amazyu aghakususannya nakaya akakulu nkani kanaka, poka na bantu bache, ukuti kakwiza pakuba chisami, sona kakwiza pakughuniwa. Pakuti ukazepula inkazo yako nukulila pamaso papane, nane nivwa ulwiputo lwako. U Mwene anena.

²⁰ Polelo ukwiza pakufwa nukusyiliwa mumutende. Amaso ghako ghatakwiza pakuzyennya intamyo zyosi zizyo nkwiza pakukawisizya akaya akakulu nkani kanaka.’ ” Po abantu bala bakanyokela nukumubuzya u mwene amazyu ghanagha.