2 Abamwene 21 - IBAYIBOLO 2024

U mwene u Manase akulaghila mu Yuda

¹ U Manase akaba na maka 12 bo anda pakulaghila, sona akalaghila amaka 55 bo ali mu Yelusalemu. Unyina akaba we Hefiziba.

² U Manase akamunangila u Mwene pakukonka inyiho imbibi izya inko izinji, zizyo u Mwene akazichimbizya pamaso paba Izilayeli.

³ Akazenga sona ubuzilo ubwapamwanya ubwakwiputilapo ivifwani, bubo uwise u Hezekiya akabumongolannya. Akamuzengela sona u Baala ivighemo nukupanga ivifwani ivya Ashela ukuyana namumo u mwene u Ahabu uwamu Izilayeli akabombelagha. Akazyiputagha intondwa nukuzichindika.

⁴ Akazenga ivighemo ivya bachala abanji mu Nyumba iya Mwene mumo u Mwene akatinji, “Ane nkwiza pakuchindikiliwa mu Yelusalemu.”

⁵ U Manase akazizengela intondwa ivighemo muntanda zyosi zibili izya Nyumba iya Mwene.

⁶ Akamocha umwana uwache nu wache pakuba chakwiyipa. Akabombagha amayele, akanenezannyanga nimizimu, nukubuzikizya kumizimu. Akamunangila u Mwene umwakuti akamukalalizya nkani.

⁷ U Manase akabika mu Nyumba iya Mwene ichifwani icha Ashela chicho akapanga. U Mwene akamubuzya u Devedi nu mwana wache u Solomoni akati, “Mu Nyumba iyi, sona mu Yelusalemu muno, bo buzilo bubo imbusalite pakasi panko izya ba Izilayeli, ukuti bubanje buzilo bwane ubwakuchindikiliwamo bwila na bwila.

⁸ Ntakwiza pakubefya sona aba Izilayeli muchisu chicho nkabapa abanyenya babo, nanti bakughakonka amalamulo ghane ghosi ghagho nkabalamula, sona nanti bakuzikonka indaghilo zyosi zizyo umubombi wane u Mozesi akabapa.”

⁹ Loli abantu bala batakamuteghelezya u Mwene. U Manase akabasovya abantu, umwakuti bakabomba ivintu ivibibi nkani ukuzichila inko zizyo u Mwene akazinangannya pamaso paba Izilayeli.

¹⁰ U Mwene akanenela mu babombi bache abalaghuzi akati:

¹¹ “U mwene u Manase wamu Yuda abomba inyiho imbibi ukubachila aba Amoli, babo bakabako kwisinda nukubapela aba Yuda ukuti bope banangaye pakuvyiputa ivifwani vyache.

¹² Polelo u Mwene u Chala uwa ba Izilayeli ati: Nkwiza pakubawisizya intamyo inkulu nkani abantu aba mu Yelusalemu naba mu Yuda izyakuti nanti umuntu wesi ivwa akwiza pakutetema pachifukwa icha bogha.

¹³ Nkwiza pakukafunda akaya akakulu nkani aka Yelusalemu ngati mumo nkakafundila akaya akakulu nkani aka Samaliya, sona na bamunyumba iya mwene u Ahabu. Nkwiza pakubapuputa abantu aba mu Yelusalemu ngati mumo umuntu akupuputila imbale nukuyikupikila.

¹⁴ Nkwiza pakubakana abantu babo basyala bumi nukubabika munyobe izya balwani babo. Abalwani babo bakwiza pakubapota nukuvifyula ivintu vyosi vivyo vili muchisu chabo,

¹⁵ pachifukwa ichakuti bananga pamaso papane, sona bankalalizya ukwandila pisiku lilyo abanyenya babo bakepelaghamo mu Ijiputi mupaka nilelo.”

¹⁶ Ukonjelezya pazinizi u Manase akabaghogha abantu abasita nongwa umwakuti ibanda lyabo likizula mumisebo iya mu Yelusalemu mosi okonjelezya pa mbibi yiyo akabomba pakubapela aba Yuda ukuti bope banangaye pamaso pa Mwene.

¹⁷ Imbombo izinji zyosi zizyo u Manase akabomba, sona ni mbibi zyache zyosi zisimbiwe mwibuku ilya Mbili iya bamwene aba ba Yuda.

¹⁸ U Manase akafwa nukusyiliwa mumughunda uwa Uza. Po umwana wache u Amoni akamupyana pakuba we mwene.

U mwene u Amoni akulaghila mu Yuda

¹⁹ U Amoni akaba na maka 22 bo anda pakulaghila, sona akalaghila amaka mabili bo ali mu Yelusalemu. Unyina akaba we Meshulemeti umwana uwa Haluzi uwa mukaya akakulu aka Yotiba.

²⁰ U Amoni akabombagha zizyo uwise u Manase akabombagha, po akamunangila u Mwene.

²¹ Akabomba vivyo uwise akabombagha sona akiputagha ivifwani vivyo uwise akavyiputagha nukuvichindika.

²² U Amoni akamukana u Mwene u Chala uwa banyenya bache, sona batakaghakonka amalamulo agha Mwene.

²³ Amakambala ghache ghakabatika nizya kumughogha, po ghakamughoghela munyumba yache iya bumwene.

²⁴ Abantu aba mu Yuda bakabaghogha bosi babo bakamusambukila u mwene u Amoni, po bakamwimika umwana wache u Yosiya ukuti amupyane pakuba we mwene.

²⁵ Imbombo izinji zyosi zizyo u Amoni akabomba zisimbiwe mwibuku ilya Mbili iya bamwene aba ba Yuda.

²⁶ U Amoni akafwa nukusyiliwa mumughunda uwa Uza. Po umwana wache u Yosiya akamupyana pakuba we mwene.