2 Abamwene 20 - IBAYIBOLO 2024

Nizya kubina nukupola ukwa Hezekiya

¹ Pakabalilo kalakala u Hezekiya akabina nkani, sona akaba papipi pakufwa. Umulaghuzi u Yesaya umwana uwa Amozi akabuka pakumwennya nukumubuzya ukuti, “U Mwene akuti: Yannya akaya kako pachifukwa ichakuti utakwiza pakupola, loli ukwiza pakufwa.”

² U Hezekiya akaghalabukila kulubumba nukwanda pakwiputa kwa Mwene ukuti,

³ “Wee Mwene, ukumbuke mumo nendelagha pantazi papako umwabusubiliwa nu moyo uwakwiyipa sona nukubomba inyiza pantazi papako.” Po u Hezekiya akalila nkani.

⁴ Bo u Yesaya atepitemo muchipinda ichamukasi icha nyumba iya bumwene yila, u Mwene akamubuzya akati,

⁵ “Nyokela umubuzye u Hezekiya, umulongozi uwa bantu bane uti: U Mwene, u Chala uwa munyenya wako u Devedi akuti, ‘Ane nivwa ulwiputo lwako, sona naghennya amasozi ghako, nkwiza pakukupozya umwakuti pisiku ilyabutatu ukwanda ilelo, ukwiza pakubuka ku Nyumba iya Mwene.

⁶ Nkwiza pakukonjelezya amaka 15 mubumi bwako. Nkwiza pakukupoka awe poka nakaya akakulu nkani aka munyobe izya mwene uwamu Asiliya, nkwiza pakukazighilila akaya akakulu nkani aka pachifukwa icha itabwa lyane, sona nicha mubombi wane u Devedi.’ ”

⁷ Po u Yesaya akababuzya abambombo abamwene akati, “Pula ivikomwa vimo ivya makuyu nukubika pipumba ilya mwene ukuti apole.” Bakapula ivikomwa ivya vikuyu nukubika pipumba pala, po u Hezekiya akapola.

⁸ U Hezekiya akamulalusya u Yesaya akati, “Nkimba chikwiza pakuba chimanyilo choni ukuti u Mwene akwiza pakumpozya, ukuti pisiku ilyabutatu ukwanda ilelo nkwiza pakubuka ku Nyumba iya Mwene?”

⁹ U Yesaya akamwamula akati, “Ichimanyilo chicho u Mwene akwiza pakukulanjizya chakuti akwiza pakubomba zizyo akalayizya cho ichi, nkimba ukulonda ukuti umuzyezye wende amamita 10 pantazi, pamo ghunyokele amamita 10 mwisinda?”

¹⁰ U Hezekiya akamula akati, “Chipepe ukuti umuzyezye wende amamita 10 pantazi. Loli ghunyokele amamita 10 mwisinda.”

¹¹ U Yesaya akiputa kwa Mwene po u Mwene akaghunyosezya umuzyezye amamita 10 mwisinda pamakwelelo ghagho u mwene u Ahazi akazenga.

Intumi izya ku Babiloni

¹² Pakabalilo kalakala u Melodaki Baladani umwana uwa mwene u Baladani uwamu Babiloni akamutumila u Hezekiya abakalata ni chabupi, pachifukwa ichakuti akivwa ukuti akabinagha.

¹³ U Hezekiya akazipokela intumi zila umwakuhoboka nukubalanjizya vivyo vikaba munyumba iyakusungilamo ivyuma nu siliva nu golide nu twakununkila na mafuta aghamutengo ni ivilwilo vyosi ivya bwite na vyosi vivyo vikaghiwanga umwakusungila ubukabi. Patakabapo nachimo chicho munyumba iyabumwene pamo mubumwene bwache chicho u Hezekiya atakabalanjizya.

¹⁴ Po umulaghuzi u Yesaya akabuka kwa mwene u Hezekiya nukumulalusya ukuti, “Nkimba abantu bala bakati choni, sona bakafuma kwiyi?” U Hezekiya akamula akati, “Kuchisu icha kubutali icha ku Babiloni.”

¹⁵ Umulaghuzi akamulalusya akati, “Nkimba bakennyamo ichoni munyumba yako iya bumwene?” U Hezekiya akamwamula akati, “Bakennyamo ivintu vyosi vivyo vili munyumba yane iya bumwene. Chitalipo nachimochimo chicho ntakabalanjizya munyumba iyakusungilamo ubukabi bwane.”

¹⁶ Po u Yesaya akamubuzya u Hezekiya akati, “Ivwa izyu ilya Mwene:

¹⁷ Amasiku ghagho ghakwiza vyosi vivyo vili munyumba yako na vyosi vivyo abanyenya bako bakasunga mupaka ilelo, vikwiza pakusendiwa ukubuka ku Babiloni. Chitalipo nachimochimo chicho chikwiza pakusyalapo.

¹⁸ Bamo pakasi pabana bako babo upapite bakwiza pakusendiwa nukubuka ku Babiloni, babo bakwiza pakuba bambombo abapase abamunyumba iya bumwene uwa muchisu icha Babiloni.”

¹⁹ U Hezekiya akamula akati, “Amazyu agha Mwene ghagho wanena miza bulo.” Pakuti akinong'onagha ukuti kukwiza pakuba umutende nukwikalana mubumi bwache.

Ukumala ukwa bulaghili ubwa Hezekiya

²⁰ Imbombo izinji zyosi zizyo u Hezekiya akabomba, na maka ghache, sona namumo akakumbila impindulila, yiyo yikinjizyanga amizi mukaya akakulu nkani kala, zisimbiwe mwibuku ilya Mbili iya bamwene aba ba Yuda.

²¹ U Hezekiya akafwa. Po umwana wache u Manase akamupyana pakuba we mwene.