2 Abamwene 2 - IBAYIBOLO 2024

U Eliya asendiwa ukubuka kumwanya

¹ Akabalilo kakakwana akakuti u Mwene amusende u Eliya mukankungu ukubuka kumwanya. Isiku lilalila u Eliya nu Elisha bakaba pabulendo ubwakufuma ku Giligali.

² U Eliya akamubuzya u Elisha akati, “Weya we, syala pano. U Mwene antuma ku Beteli.” Loli u Elisha akamula akati, “Nkulapa pamaso pa Mwene umumi na pamaso papako ukuti ntakwiza pakukuleka napo panandi.” Po bosi bakabuka ku Beteli.

³ Akabukatila aka balaghuzi aba mu Beteli kakabuka kwa Elisha nukumulalusya ukuti, “Nkimba uzimenye ukuti u Mwene akwiza pakumwefyako u mwene wako pamaso papako ilelo?” U Elisha akamula akati, “Eee inzimenye, loli mutakazinenaye.”

⁴ Po u Eliya akamubuzya u Elisha akati, “Weya we syala pano. U Mwene antuma ku Yeliko.” U Elisha akamwamula akati, “Nkulapa pamaso pa Mwene na pamaso papako ukuti ntakwiza pakukuleka napo panandi.” Po bosi bakabuka ku Yeliko.

⁵ Po akabukatila aka balaghuzi aba mu Yeliko kakabuka kwa Elisha nukumulalusya ukuti, “Nkimba uzimenye ukuti u Mwene akwiza pakumwefyako u mwene wako pamaso papako ilelo?” U Elisha akamula akati, “Eee inzimenye, loli mutakazinenaye.”

⁶ Pisinda pache u Eliya akamubuzya u Elisha akati, “Weya we syala pano. U Mwene antuma ku Yolodani.” Loli u Elisha akamwamula akati, “Nkulapa pamaso pa Mwene na pamaso papako ukuti ntakwiza pakukuleka napo panandi.” Po bosi bakendelela nu bulendo bwabo.

⁷ Abalaghuzi 50 bala bakabakonka kulusoko ulwa Yolodani. U Eliya nu Elisha bakimilila mulubazu mulusoko ulwa Yolodani, sona abalaghuzi 50 bala bakimilila pabutalipo.

⁸ U Eliya akavula inkazo yache nukuyivunga, sona akakoma nayo pamizi. Amizi ghala ghakagabinkana umwakuti u Eliya nu Elisha bakaloboka pabumizu.

⁹ Bo baloboka, u Eliya akamubuzya u Elisha akati, “Umbuzye chicho ukulonda ukuti nkubombele bo inchili pakwefiwapo pamaso papako.” U Elisha akamwamula akati, “Nkulonda impokele ichigaba ichikulu icha maka ghako aghabulaghuzi.”

¹⁰ U Eliya akamubuzya u Elisha akati, “Walaba ichintu ichipala nkani. Pope bulo ukwiza pakuchipokela, nanti wanyenelezya bulo bo nkwepapo pamaso papako. Loli nanti utakunyenelezya, utakwiza pakuchipokela.”

¹¹ Bo bachili bakwenda bakanenezyannyanga, panapo na panapo ingolo iya moto iyakuwesiwa ni falasi izya moto yikiza nukubalesannya. U Eliya akasendiwa ukubuka kumwanya mukankungu.

¹² Bo u Elisha azyennya zinizi, akalila akati, “Wee tata, wee tata! Wee ngolo izya bwite izya ba Izilayeli, na bantu abakukwela pafalasi.” Po u Elisha atakamwennya sona u Eliya. U Elisha akazepula umwenda wache pabili pachifukwa icha chitima.

¹³ Po akaseba umwenda uwa Eliya ghugho ghukawa, akanyokela nukwimilila mulubazu ulwa lusoko ulwa Yolodani.

¹⁴ Akakoma pamizi nu mwenda uwa Eliya ghula nukuti, “Nkimba ali ko kwiyi u Mwene u Chala uwa Eliya?” Bo akoma sona, amizi ghala ghakagabinkana, po u Elisha akaloboka.

¹⁵ Akabukatila aka balaghuzi aba mu Yeliko babo bakennyanga bakati, “Amaka aghabulaghuzi agha Eliya ghinjiye mwa Elisha.” Po bakabuka pakukomana nawe, nukufughama pantazi papache bo ivyeni vyabo vikotamiye pasi.

¹⁶ Bakamubuzya bakati, “Aswe twe babombi bako tuli na bantu abamaka 50. Bitikizye ukuti babuke bamulonde u mwene wako. Lumo Umuzimu uwa Mwene amusendite nukumusumbila pamwanya pighamba, pamo mwikombe limo.” U Elisha akabamula akati, “Awe, mutakabatumaye.”

¹⁷ Loli bakamufyenga mupaka u Elisha akabitikizya ukuti babukaye. Po abantu 50 bala bakabuka pakumulonda u Eliya amasiku matatu, loli batakamwagha.

¹⁸ Bakanyokela kwa Elisha, bo akubalindilila mu Yeliko. Akabalalusya akati, “Nkimba ntakababuzya ukuti mutakabukayeko?”

U Elisha akubomba iviswigho

¹⁹ Abantu aba mukaya akakulu nkani kala bakamubuzya u Elisha bakati, “Wee mwene, akaya aka katenganite nkani ngati mumo ukwenezya, loli amizi ghene gho mabibi nkani, sona ichisu chite nu muvundo.”

²⁰ U Elisha akati, “Munsendele imbale impya, sona mubikemo imbeya.” Po bakamupa imbale yila.

²¹ U Elisha akabuka kumbwibwi iya mizi nukusumbilamo imbeya yila, po akati, “U Mwene ati, ‘Naghaswefya amizi agha. Amizi agha ghatakwiza pakupela nalumo ubufwe, pamo ukusita ukwelezya ivyakulya.’ ”

²² Po amizi ghala miza nkani mupaka nilelo bulo ukuyana namumo u Elisha akanenela.

²³ U Elisha akepako ku Yeliko nukubuka ku Beteli. Bo akwenda muzila, abalumendo bamo aba mukaya akakulu kala bakanda pakumobezya bakati, “Epako kuno we wachipala! Epako kuno we wachipala!”

²⁴ U Elisha akaghalabuka nukubennya abalumendo bala, akabaghuna pamaso pa Mwene. Po abalabwe babili bakavundumuka mumusitu nukubazepulannya abalumendo 42.

²⁵ Pisinda pache u Elisha akabuka kwighamba ilya Kalimeli, sona bo afuma kulakula, akanyokela ku Samaliya.