2 Abamwene 18 - IBAYIBOLO 2024

U mwene u Hezekiya akulaghila mu Yuda

¹ Mumwaka uwabutatu bo u Hosheya, umwana uwa Ela akulaghila mu Izilayeli, u Hezekiya umwana uwa Ahazi akaba we mwene uwamu Yuda.

² Akaba na maka 25 bo anda pakulaghila, sona akalaghila amaka 29 bo ali mu Yelusalemu. Unyina akaba we Abiya umwana uwa Zekaliya.

³ Akamuhobosya u Mwene, pakubomba ingolosu ukuyana namumo umunyenya wache u Devedi akabombelagha.

⁴ Akefya ubuzilo ubwapamwanya ubwakwiputilapo ivifwani, akamongolannya ivikumbusyo ivya mabwe, nukudumulannya ivifwani ivya Ashela. Akafwantannya injoka iya mukuba yiyo u Mozesi akapanga, pakuti mupaka pakabalilo kalakala aba Izilayeli bakafukizyanga utwakununkila ku chifwani chilachila, chicho chikitiziwanga ukuti Nehushitani.

⁵ U Hezekiya akamusubila u Mwene u Chala uwa ba Izilayeli. Atakabapo nayumoyumo pakasi pa bamwene aba mu Yuda yuyo akayana nawe, manyi babo bakabapo kwisinda, pamo babo bakiza kuntazi.

⁶ U Hezekiya akamumamatila u Mwene, sona atakalekapo lumo pakumwivwila. Loli akakonkagha amalamulo ghagho u Mwene akamupa u Mozesi.

⁷ U Mwene akaba nawe, po ivintu vyosi vivyo akabombagha vikamwendelagha akiza. U Hezekiya akamusambukila u mwene wamu Asiliya, umwakuti akakana pakumubombela.

⁸ U Hezekiya akabapota aba Filisiti ukwandila kuchitembe ukufika kukaya akakulu nkani, kako kakaba ni linga mupaka ku Gaza, sona na muchigaba chosi ichakuzyungulila.

⁹ Mumwaka uwafolo uwa bulaghili ubwa Hezekiya, ghugho ghukaba mwaka uwaseveni uwa Hosheya umwana uwa Ela, u mwene uwa Izilayeli, u mwene u Shalimanesela uwamu Asiliya akalwa ubwite nakaya akakulu nkani aka Samaliya nukukazyungulila.

¹⁰ Pabumalilo ubwa maka matatu, aba Asiliya bakakafyula akaya kala. Po akaya aka Samaliya kakafyuliwa mumwaka uwasikisi bo u Hezekiya akulaghila, ghugho ghukaba mwaka uwanayini bo u mwene u Hosheya akulaghila mu Izilayeli.

¹¹ U mwene uwa ba Asiliya akabalema aba Izilayeli nukubuka nabo pakuba bakayidi mu Asiliya, akabazengezya mu Hala, na mu Gozani kupipi nu lusoko ulwa Haboli, sona na mutwaya utukulu nkani utwa ba Mediya.

¹² Izi zikabombiwa pachifukwa ichakuti abantu bala batakamwivwila u Mwene u Chala wabo, loli bakalunangannya ulufingo lulo akafingana nabo, poka na zyosi zizyo u Mozesi umubombi uwa Mwene akabalamula. Bakazikonka indaghilo zyache, pamo ukuvibomba vivyo akabalamula.

Aba Asiliya bakukoghofya akaya aka Yelusalemu.

¹³ Mumwaka uwa 14 bo u mwene u Hezekiya akulaghila, u mwene u Senakelibu u mwene uwamu Asiliya akiza pakulwa ubwite nutwaya tosi utukulu nkani utwa malinga utwa mu Yuda nukutufyula.

¹⁴ Po u mwene u Hezekiya wamu Yuda akamutumila u mwene uwa ba Asiliya pa Lakishi amazyu aghakuti, “Nananga. Leka pakulwa nane ubwite, nkwiza pakukulipila vyosi vivyo ukuvilonda.” U mwene uwa ba Asiliya akamulipila u mwene u Hezekiya wamu Yuda amakilogalamu 3,000 agha siliva, na makilogalamu 1,000 agha golide.

¹⁵ Po u Hezekiya akamupa usiliva wesi yuyo akaba mu Nyumba iya Mwene, na muchipinda ichakusungilamo ubukabi munyumba iya bumwene.

¹⁶ Pakabalilo kalakala u mwene u Hezekiya akamamatula ugolide wesi yuyo akaba munyiyi na mumafulemu agha Nyumba iya Mwene nukumupa u mwene uwa ba Asiliya.

¹⁷ U mwene uwamu Asiliya akamutuma usongo uwa basilikali poka ni chilundilo icha basilikali ukufuma ku Lakishi ukuti abuke kwa mwene u Hezekiya mu Yelusalemu. Usongo uwa basilikali yula akimilila papipi ni mpindulila iya mizi ghagho ghafumite ku chiziba ichakumitu, mumusebo uwakubukila kumughunda uwa muntu yuyo akuchapa amenda.

¹⁸ Bakamwitizya u mwene u Hezekiya, po u Hezekiya akamutuma u Eliyakimu umwana uwa Hilikiya umulongozi uwa munyumba iya bumwene nu Shebina umusimbi, sona nu Yowa umwana uwa Asafu umusungi uwa mabuku agha mbili bakabuka pakukomana nabo.

¹⁹ Usongo uwa basilikali akababuzya akati, “Mumubuzye u Hezekiya ukuti, ‘U mwene usongo nkani, u mwene uwamu Asiliya akuti: Nkimba usubiye ichoni?

²⁰ Nkimba mukwinong'ona ukuti amazyu ghene ghayanite na mahala, sona na maka aghakulwila ubwite? Nkimba wewenu yuyo mumusubiye ukuti munsambukile?

²¹ Ennya ilelo, uchili ukubasubila aba Ijiputi pakukwavwa awe babo bali ngati lutete lulo umuntu akwendela, lulo lungapyoka nukuyilasa inyobe yako. Momumo abeleye u mwene u Falabo ku babo bakumusubila.

²² Nanti mukumbuzya ukuti, “Tumusubaliye u Mwene u Chala witu.” Nkimba ate weyuyo ubuzilo bwache ubwapamwanya ni vighemo u Hezekiya akavimongolannya, nukubabuzya aba muchisu icha Yuda nicha Yelusalemu ukuti, “Mwiputilaye pantazi pachighemo mu Yelusalemu”?

²³ “ ‘Ilelo zagha, twitinkane nu mwene wane uwamu Asiliya. Nkwiza pakubapa ifalasi 2,000 nanti mungaba nabendezi!

²⁴ Nkimba mungamunyosekezya bulibuli mwisinda weka uwa banandi babo bali mukasi mubabomba mbombo aba makambala agha mwene wane, napapo bakusubila aba Ijiputi ningolo nabendezya ifalasi?

²⁵ Nkimba mutazimenye ukuti ane ntumiwe kuno nu bwighane ubwa Mwene pakuchinangannya ichisu ichi? U Mwene umwenecho akambuzya ane ukuti indwane nacho nukuchinangannya ichisu.’ ”

²⁶ Po u Eliyakimu umwana uwa Hilikiya nu Shebina, sona nu Yowa bakamubuzya usongo uwa basilikali yula bakati, “Twalamba nena nababombi bako mu Chialamu, pakuti cho chicho tukuchivwa. Utakanenaye naswe mu Chihebeli, pachifukwa ichakuti abantu bosi babo bali pilinga bakwivwa.”

²⁷ Loli usongo uwa basilikali akamula akati, “Nkimba u mwene wane atakantuma pakunena amazyu agha kwa mwene winyu na kukwinyu? Awe, loli antuma ukuti imbabuzye abantu babo bikaye pilinga, pakuti bope bakwiza pakulya nukung'wela ivinyazu vyabo namantuzi ghabo?”

²⁸ Po usongo uwa basilikali akimilila nukukolomoka mu Chihebeli nukuti, “Ivwa amazyu agha mwene usongo nkani, u mwene uwamu Asiliya!

²⁹ Izi zyo zizyo u mwene akunena akuti, ‘U Hezekiya atakabazimbulaye. Pakuti atangabapoka!

³⁰ Mutakitikizye ukuti u Hezekiya abadebaye pakumusubila u Mwene bo akuti, “Naloli u Mwene akwiza pakutupoka. Akaya akakulu nkani aka katakwiza pakubikiwa munyobe izya mwene uwamu Asiliya.”

³¹ “ ‘Mutakamuteghelezyanje u Hezekiya. Izi zyo zyizyo u mwene uwamu Asiliya akunena akuti, “Twitinkane ukuti pabe umutende pakasi pa amwe naswe. Po umuntu wesi uwa amwe akwiza pakulya ivikomwa ivya ikwi lyache ilya mampesya nilya chikuyu nukung'wela amizi aghakufuma muntamba iya mizi iyache ni yache.

³² Mupaka pakabalilo kako nkwizila pakubasendela kuchisu chicho chiyanite bulo ni chisu chinyu, ichisu icha ngano nu vinyo, ichisu icha vibama na mampesya, ichisu icha mafuta agha misyunguti, sona nu buchi. Sala ubumi, mutakasale ubufwe.” “ ‘U Hezekiya atakabazimbulaye bo akuti, “U Mwene akwiza pakutupoka.”

³³ Nkimba alipo uchala uwa inko izinji yuyo achipokitepo lumo ichisu chache munyobe izya mwene uwamu Asiliya?

³⁴ Nkimba bali ko kwiyi abachala aba mu Hamati nu Alipadi? Bali ko kwiyi abachala aba mu Sefalivayimu naba Hena, sona na Iva? Nkimba bamupokite u Samaliya munyobe zyane?

³⁵ Nkimba chala wenu pakasi pabachala bosi yuyo achipokitepo lumo ichisu munyobe yane? Po nkimba u Mwene angamupoka bulibuli u Yelusalemu munyobe yane?’ ”

³⁶ Loli abantu bakaba bulo myee, sona batakamulapo nachimochimo, pachifukwa ichakuti u mwene u Hezekiya akabalamula akati, “Mutakamwamule.”

³⁷ Po u Eliyakimu umwana uwa Hilikiya, umulongozi uwa munyumba iya bumwene nu Shebina umusimbi, sona nu Yowa umwana uwa Asafu, umusungi uwa mabuku agha mbili, bakabuka kwa Hezekiya, na menda amazepuke, nukumubuzya zizyo usongo uwa basilikali akanena.