2 Abamwene 17 - IBAYIBOLO 2024

U mwene u Hosheya akulaghila mu Izilayeli

¹ Mumwaka uwa 12 bo u Ahazi akulaghila mu Yuda, u Hosheya umwana uwa Ela akaba we mwene uwamu Izilayeli, sona akalaghila amaka nayini bo ali mu Samaliya.

² U Hosheya akananga pamaso pa Mwene, loli atakayana na bamwene aba mu Izilayeli babo bakalaghilagha kwisinda.

³ U mwene u Shalimanesela uwamu Asiliya akiza pakulwa ubwite nu Hosheya nukumupota. Po u Hosheya akasonkagha umusonko umwaka nu mwaka kwa Shalimanesela.

⁴ Loli u mwene uwamu Asiliya akazyaghannya ukuti u Hosheya akabatika nizya kusambukila, pakuti akazituma intumi kwa mwene u So uwamu Ijiputi ukuti amwavwe. Po akaleka pakusonka umusonko ukuyana namumo akabombelagha umwaka nu mwaka. Pachifukwa chinichi u Shalimanesela akamulema u Hosheya nukumwighalila mujele.

Ukumongonkana ukwa kaya akakulu nkani aka Samaliya

⁵ Po u mwene u Shalimanesela uwamu Asiliya akiza pakulwa ubwite nakaya akakulu nkani aka Samaliya. Mumwaka uwabutatu ubwa bwite bula,

⁶ ghugho ghukaba mwaka uwa nayini bo u mwene Hosheya akulaghila, u mwene uwamu Asiliya akakafyula akaya akakulu nkani aka Samaliya. Akabalema aba Izilayeli nukubuka nabo ku Asiliya pakuba bakayidi nukubikazya mukaya akakulu nkani aka Hala, muchigaba icha Gozani mulubazu ulwa lusoko ulwa Haboli, sona na mutwaya utukulu nkani utwa ba Mediya.

⁷ Zyosi zinizi zikabombiwa pachifukwa ichakuti aba Izilayeli bakananga pamaso pa Mwene u Chala wabo, yuyo akabapoka munyobe izya Falabo nukubefyamo mu Ijiputi. Aba Izilayeli bakabachindikagha abachala abanji,

⁸ pakukonka inyiho izya inko zizyo u Mwene akazichimbizya pamaso papabo, sona ni nyiho zizyo abamwene aba Izilayeli bakababuzya ukuti bazikonkaye.

⁹ Aba Izilayeli bakabombagha ivintu ivibibi kubusyefu vivyo vitakamuhobosya u Mwene u Chala wabo. Bakizengela bene ubuzilo ubwapamwanya ubwakwiputilamo abachala abanji mutwaya twabo tosi ukwandila kuchitembe mupaka kwilinga ilya kaya akakulu nkani.

¹⁰ Bakizengela bene ivikumbusyo ivya mabwe, ni vifwani ivya Ashela pamwanya pighamba, sona na muntende mumakwi ghagho ghavwinkite akiza.

¹¹ Abantu bala bakafukizya utwakununkila pabuzilo bosi ubwapamwanya ubwakwiputilapo ivifwani, ngati mumo zikabombelagha inko zizyo u Mwene akazichimbizya pamaso papabo. Bakabomba ivintu ivibibi vivyo vikamukalalizya nkani u Mwene.

¹² Bakavyiputagha ivifwani napapo u Mwene akati, “Mutakabombaye bunubu.”

¹³ U Mwene akabasoka aba Izilayeli, naba Yuda ukwendela mu balaghuzi, sona na benelezyi bache bosi ukuti, “Muzileke imbombo zyinyu imbibi. Muzikonkaye indaghilo zyane na malamulo ghane, ghagho nkabalamula abanyenya binyu, sona ghagho nkabapa ukwendela mubabombi bane abalaghuzi.”

¹⁴ Loli aba Izilayeli batakivwilagha, sona bakaba na moyo amakafu nkani ngati mumo bakabela abanyenya babo, babo batakamusubila u Mwene u Chala wabo.

¹⁵ Bakazisulannya indaghilo zyache nu lufingo lulo akafingana na banyenya babo, sona ni soki zyache. Pachifukwa ichakuti bakavichindikagha ivifwani ivyamwalwemwalwe, po bope bakaba bamwalwemwalwe. Bakeghelelagha inyiho izya inko zizyo zikabazyungulila napapo u Mwene akabalamula akati, “Mutakabombaye ngati mumo inko zinizi zikubombela,” sona bakabombagha ivintu vivyo u Mwene akabakanizya.

¹⁶ Bakaghakana amalamulo ghosi agha Mwene u Chala wabo nukwipangila bene ivifwani ivya ngwata, ni chifwani icha Ashela. Bakazyiputa intondwa, sona bakamuchindika u Baala.

¹⁷ Bakabocha pamoto abana babo abalumendo na balindu pakuba vyakwiyipa. Bakabuzikizya kumuzimu nukubomba amayele, sona bakiyula nkani pakubomba ivintu ivibibi pamaso pa Mwene, umwakuti bakamukalalizya nkani.

¹⁸ U Mwene akabakalalila nkani aba Izilayeli umwakuti akabefyapo pamaso papache. Loli lwene uluko ulwa Yuda lo lulo lukasyala.

¹⁹ Pope bulo uluko ulwa Yuda lutakaghakonka amalamulo agha Mwene u Chala wabo, sona lukeghelela inyiho izya ba Izilayeli.

²⁰ Polelo u Mwene akabakana aba Izilayeli bosi, sona akabafunda nukubabika munyobe izya bantu abakufyula ivintu mupaka akabefya bosi pamaso papache.

²¹ Bo u Mwene abefyapo aba Izilayeli munyumba iya Devedi, aba Izilayeli bakamwimika u Yelobowamu umwana uwa Nebati ukuti abanje we mwene wabo. U Yelobowamu akabadeba aba Izilayeli ukuti baleke pakumukonka u Mwene, sona akabapela ukuti bope banangaye nkani.

²² Aba Izilayeli bakabombagha vivyo u Yelobowamu akabombagha, sona batakazileka imbibi zyabo.

²³ Pabumalilo u Mwene akabefyapo pamaso papache ukuyana namumo ababombi bache bosi abalaghuzi bakabasokela. Po aba Izilayeli bakalemiwa muchisu chabo nukubuka ku Asiliya pakuba bazya, kuko bachili bali kulakula mupaka nilelo bulo.

Aba Asiliya bakwikalana muchisu icha Izilayeli

²⁴ U mwene uwamu Asiliya akabefya abantu mukaya akakulu nkani aka Babiloni naka Kuta naka Ava naka Hamati, sona naka Sefalivayimu nukubazengezya mutwaya utukulu utwa mu Samaliya mubuzilo ubwa ba Izilayeli. Po bakaba benekaya nukwikalana mutwaya utukulu tulatula.

²⁵ Bo banda bulo pakwikala mulamula, batakamwiputagha u Mwene. Po u Mwene akabatumila inkalamu, zizyo zikabalya abantu bamo pakasi papabo.

²⁶ U mwene uwamu Asiliya akabuziwa ukuti, “Abantu babo ukabazengezya mutwaya utukulu utwa mu Samaliya batamenye namumo bangamuchindikila u Chala uwa chisu chilachila. Abatumiye inkalamu pakasi papabo, zizyo zikubalya, pachifukwa ichakuti abantu banaba batazimenye zizyo u Chala wabo akulonda.”

²⁷ Po u mwene uwamu Asiliya akalamula akati, “Umutume umuputi weka pakasi pa baputi babo ukabalema mu Samaliya ukuti anyokele pakwikala kulakula, umwakuti abamanyisyanje abantu namumo bangamuchindikila u Chala uwa chisu chilachila.”

²⁸ Po umuputi weka pakasi pa baputi babo bakaba bazya ukufuma mu Samaliya akabuka pakwikala mu Beteli pakubamanyisya abantu namumo bangiputila kwa Mwene.

²⁹ Loli uluko losi lukipangila lwene ichifwani mutwaya utukulu utwakulekanalekana mumo bakikalagha nukuvibika munyumba izyakwiputilamo zizyo aba Samaliya bakazenga pabuzilo ubwapamwanya ubwakwiputilapo ivifwani.

³⁰ Aba Babiloni bakipangila ichifwani icha chala u Sukoti Benoti. Aba Kuta bakipangila ichifwani icha chala u Neligali. Aba Hamati bakipangila ichifwani icha chala u Ashima.

³¹ Aba Avi bakipangila ichifwani icha chala u Nibihazi nu Talitaki, sona aba Sefalivayimu bakabocha abana babo pamoto pakuba chakwiyipa kwa Adilameleki nu Anameleki, babo bakaba bachala babo.

³² Abantu banaba bakamuchindikagha u Mwene, loli bakisalila sona abantu bulo pakasi papabo ukuti babanje baputi abakubomba imbombo mubuzilo ubwapamwanya ubwakwiputilapo.

³³ Bakamwiputagha u Mwene, loli bakababombelagha sona abachala babo ukuyana ni nyiho izya inko izya kuko bakalemiwa pakuba bazya.

³⁴ Bachili bakubomba bunubu mupaka nilelo bulo. Batakamwiputagha u Mwene, pamo ukuzikonka indaghilo zyache, na malamulo ghagho akabalamula abaluko ulwa Yakobo, yuyo akamwita ukuti we Izilayeli.

³⁵ Bo u Mwene afingana naba Izilayeli ulufingo, akabalamula akati, “Mutakabiputaye abachala abanji, pamo ukubafughamilila, pamo ukubabombela, pamo ukubika ivyakwiyipa kukwabo.

³⁶ Loli mumuchindikaye u Mwene yuyo akabefya mu Ijiputi na maka ghache amakulu. Mumufughamililaye yuyo, sona mubikaye ivyakwiyipa kukwache.

³⁷ Akabalilo kosi mughakonkaye amalamulo ni ndaghilo, sona ni vimanyisyo vivyo akabasimbila. Mutakabiputaye abachala abanji.

³⁸ ‘Mutakaluvyanje ulufingo lulo nkafingana namwe, sona mutakabiputaye abachala abanji.’

³⁹ Loli mumwiputaye u Mwene, u Chala winyu, pakuti weyuyo akwiza pakubapoka munyobe izya balwani binyu bosi.”

⁴⁰ Pope bulo batakivwisyanga, loli bakazikonkagha inyiho zyabo izyakale.

⁴¹ Po inko zinizi zikamwiputagha u Mwene, loli pope bulo zikababombelagha abachala abanji. Mupaka nilelo bulo abana na baluko lwabo bachili bakubomba zizyo abanyenya babo bakabombagha.