2 Abamwene 16 - IBAYIBOLO 2024

U mwene u Ahazi akulaghila mu Yuda

¹ Mumwaka uwa 17 bo u mwene u Peka umwana uwa Lemaliya akulaghila mu Izilayeli, u Ahazi umwana uwa Yotamu akanda pakulaghila mu Yuda.

² U Ahazi akaba na maka 20 bo aba we mwene, sona akalaghila amaka 16 bo ali mu Yelusalemu. U Ahazi atakabomba ingolosu pamaso pa Mwene u Chala wache, sona atakabomba zizyo umunyenya wache u Devedi akabomba.

³ Akabombagha zizyo abamwene aba Izilayeli bakabombagha, umwakuti akamocha umwana wache umulumendo pakuba chakwiyipa pachifukwa ichakuti akakonkagha inyiho imbibi izya inko izinji, zizyo u Mwene akazichimbizya pamaso paba Izilayeli.

⁴ U Ahazi akabikagha ivyakwiyipa nukufukizya utwakununkila pabuzilo ubwapamwanya ubwakwiputilapo ivifwani, na pamwanya pamaghamba, sona na muntende mumakwi ghagho ghavwinkite akiza.

⁵ Po u mwene u Lezini uwamu Siliya, sona nu mwene u Peka umwana uwa Lemaliya uwamu Izilayeli bakiza pakulwa ubwite mu Yelusalemu nukumwavwanila u Ahazi, loli batakamupota.

⁶ Pakabalilo kalakala u mwene u Lezini akabanyosezya aba Siliya akaya akakulu aka Elati kako akakafyula munyobe izya ba Yuda. Po aba Edomu bakwikala kulakula mupaka nilelo bulo.

⁷ Po u Ahazi akatuma intumi kwa mwene u Tigilati Pileseli uwamu Asiliya na mazyu aghakuti, “Ane ne mubombi wako umusubiliwa, sona ne mwana wako. Zagha umpoke munyobe izya mwene uwa ba Siliya nu mwene uwamu Izilayeli, babo bali pakulwa nane ubwite.”

⁸ U Ahazi akasenda usiliva nu golide yuyo akaba mu Nyumba iya Mwene, sona na muchipinda ichakusungilamo ubukabi munyumba iya bumwene nukuvituma kwa mwene uwamu Asiliya pakuba chabupi.

⁹ U mwene uwamu Asiliya u Tigilati Pileseli akamwamula u Ahazi pakulwa ubwite nakaya akakulu nkani aka Damasika nukukafyula. Akabasenda abantu babo bakikalagha mulamula nukubuka nabo ku Kili, sona akamughogha u mwene u Lezini.

¹⁰ U mwene u Ahazi akabuka ku Damasika pakukomana nu Tigilati Pileseli u mwene uwamu Asiliya. Kulakula akachennya ichighemo, po akamutumila umuputi u Uliya akabonekele na kazengele aka chighemo chilachila.

¹¹ Po umuputi u Uliya akachipanga ichighemo chila ukuyana namumo u mwene u Ahazi akamutumila bo ali mu Damasika, sona akachimalizya bo u Ahazi achili nukunyokako.

¹² Bo u mwene anyokako ku Damasika, nukuchennya ichighemo chila, akapalamila nukubikapo ivyakwiyipa.

¹³ Akabikapo ichakwiyipa ichakocha, sona ni chakwiyipa icha busu. Akapungulilapo ichakwiyipa icha vinyo, nukunyafilapo ibanda ilya chakwiyipa chila pakuba chakwiyipa ichabupoka.

¹⁴ Ichighemo icha mukuba chicho chikaba pamaso pa Mwene, chikaba pakasi pachighemo ichipya ni Nyumba iya Mwene, po u Ahazi akachibika kulubazu ulwa kumitu ukwa chighemo chache ichipya chila.

¹⁵ Po u mwene u Ahazi akamulamula umuputi u Uliya akati, “Pachighemo ichikulu ichipya, ubikepo ichakwiyipa ichakocha icha pandabindabi, ni chakwiyipa icha busu icha pachamabwila. Ubikepo sona ichakwiyipa ichakocha, ni chakwiyipa icha busu icha mwene, sona ni chakwiyipa icha bantu aba muchisu chosi, poka ni chakwiyipa icha vinyo. Uchinyafile ni banda lyosi ilya vyakwiyipa ivyakocha ni vyakwiyipa ivinji. Loli nkwiza pakuchibombezya ichighemo icha mukuba chila pambombo iya kubuzikizya.”

¹⁶ Po umuputi u Uliya akabomba zizyo u mwene u Ahazi akamulamula.

¹⁷ U mwene u Ahazi akafyeko amatabwa agha mulubazu ulwa kangolo aka mukuba nukwefyemo amabeseni ghagho ghakaba mulamula. Akefyapo isonta iya mukuba inkulu yiyo yikaba ngati nyanja pamwanya pa nkambaku izya mukuba, zizyo zikaba muntende mwache nukuyibika palwalo ulwa mabwe.

¹⁸ Akefyapo ichisakasa ichapalubazu chicho bakabombezyanga Pisiku Ilyakutuzya nukwighalila umulyango uwa mwene uwakwinjilila mu Nyumba iya Mwene uwamu Asiliya.

¹⁹ Imbombo izinji zyosi zizyo u Ahazi akabomba pakabalilo kache, zisimbiwe mwibuku ilya Mbili iya bamwene aba ba Yuda.

²⁰ U Ahazi akafwa nukusyiliwa mukaya aka Devedi mu Yelusalemu. Po u Hezekiya umwana wache akamupyana pakuba we mwene.