2 Abamwene 15 - IBAYIBOLO 2024

U mwene u Azaliya akulaghila mu Yuda

¹ Mumwaka uwa 27 bo u mwene u Yelobowamu akulaghila mu Izilayeli, u Azaliya umwana uwa Amaziya akanda pakulaghila mu Yuda.

² U Azaliya akaba na maka 16 bo anda pakulaghila, sona akalaghila amaka 52 bo ali mu Yelusalemu. Unyina akaba we Yekoliya uwamu Yelusalemu.

³ Akamuhobosya u Mwene, pakubomba ingolosu ukuyana namumo uwise u Amaziya akabombelagha.

⁴ Pope bulo u Azaliya atakabunangannya ubuzilo ubwapamwanya ubwakwiputilamo ivifwani, umwakuti abantu bakabikagha ivyakwiyipa nukufukizya utwakununkila pabuzilo bulabula.

⁵ U Mwene akamufunda na mambombo u mwene yula mupaka pisiku lilyo akafwila, sona akikala munyumba iya palubazu, bo Yotamu umwana uwa mwene akulaghila panyumba iya bumwene, sona akabalaghilagha abantu aba muchisu chilachila.

⁶ Imbombo izinji zyosi zizyo u Azaliya akabomba zisimbiwe mwibuku ilya Mbili iya bamwene aba ba Yuda.

⁷ U Azaliya akafwa nukusyiliwa mukaya aka Devedi mu Yelusalemu. Po umwana wache u Yotamu akamupyana pakuba we mwene.

U mwene u Zekaliya akulaghila mu Izilayeli

⁸ Mumwaka uwa 38 bo u mwene u Azaliya akulaghila mu Yuda, u Zekaliya umwana uwa Yelobowamu akaba we mwene uwamu Izilayeli, sona akalaghila amezi sikisi bo ali mu Samaliya.

⁹ U Zekaliya akananga pamaso pa Mwene ukuyana namumo uwise akabombelagha. Atakazileka imbibi zyache, sona akabomba zizyo u Yelobowamu umwana uwa Nebati akabomba pakubapela aba Izilayeli ukuti bope banangaye.

¹⁰ U Shalumu umwana uwa Yabeshi akabatika nizya kumughogha u Zekaliya nukumughoghela pamaso pabantu. Po akamupyana pakuba we mwene.

¹¹ Imbombo izinji zyosi zizyo u Zekaliya akabomba zisimbiwe mwibuku ilya Mbili iya bamwene aba ba Izilayeli.

¹² Po amazyu agha Mwene ghagho akaghanenela mwa Yehu ghakakwanilisiwa aghakuti, “Abaluko lwako bakwiza pakulaghila mu Izilayeli mupaka inkulilo iyafolo.”

U mwene u Shalumu akulaghila mu Izilayeli

¹³ Mumwaka uwa 39 bo u mwene u Uziya akulaghila mu Yuda, u Shalumu umwana uwa Yabeshi akaba we mwene. Po akalaghila umwezi ghoka mpela bo ali mu Samaliya.

¹⁴ U Menahemu umwana uwa Gadi akafuma kukaya akakulu aka Tiliza nukubuka ku Samaliya. Akalwa ubwite nu Shalumu mu Samaliya nukumughogha, po akamupyana pakuba we mwene.

¹⁵ Imbombo izinji zyosi zizyo u Shalumu akabomba, sona nukusambuka kwache zisimbiwe mwibuku ilya Mbili iya bamwene aba ba Izilayeli.

¹⁶ Pakabalilo kalakala u Menahemu akepako ku Tiliza nukakanangannya akaya akakulu nkani aka Tapuwa. Akabaghogha abantu bosi babo bakaba mulamula, na muchigaba ichakuzyungulila ukwandila mu Tiliza, pachifukwa ichakuti bakakana pakwibika munyobe zyache, sona akabatumbulannya abakolo bosi aba nyanda.

U mwene u Menahemu akulaghila mu Izilayeli

¹⁷ Mumwaka uwa 39 bo u mwene u Azaliya akulaghila mu Yuda, u Menahemu umwana uwa Gadi akaba we mwene uwamu Izilayeli, sona akalaghila amaka 10 bo ali mu Samaliya.

¹⁸ U Menahemu akananga pamaso pa Mwene, sona pakabalilo kosi aka bumi bwache u Menahemu atakazileka imbibi zyache nukubomba zizyo u Yelobowamu umwana uwa Nebati akabomba pakubapela aba Izilayeli ukuti bope banangaye.

¹⁹ U mwene u Pulu uwamu Asiliya akalwa ubwite ni chisu icha Izilayeli. Po u Menahemu akamupa isalabazya 34,000 izya siliva ukuti amwavwe pakubwikazya ubulaghili bwache muchisu chila.

²⁰ U Menahemu akazyagha indalama zinizi pakubasonkezya umusonko aba Izilayeli. Po umuntu wesi umukabi akasonkagha isalabazya 50 izya siliva ukuti bamupe u mwene uwamu Asiliya. Po u mwene yula akaleka pakulwa ubwite nukunyokela kuchisu chache.

²¹ Imbombo izinji zyosi zizyo u Menahemu akabomba zisimbiwe mwibuku ilya Mbili iya bamwene aba ba Izilayeli.

²² U Menahemu akafwa, po umwana wache u Pekahiya akamupyana pakuba we mwene.

U mwene u Pekahiya akulaghila mu Izilayeli

²³ Mumwaka uwa 50 bo u mwene u Azaliya akulaghila mu Yuda, u Pekahiya umwana uwa Menahemu akaba we mwene uwamu Izilayeli, sona akalaghila amaka mabili bo ali mu Samaliya.

²⁴ U Pekahiya akananga pamaso pa Mwene, sona atakazileka imbibi zyache nukubomba zizyo u Yelobowamu umwana uwa Nebati akabomba pakubapela aba Izilayeli ukuti bope banangaye.

²⁵ Ikambala lyache lyoka, u Peka umwana uwa Lemaliya akabatika nizya kumughogha. Akabasenda abantu 50 aba mu Giliyadi nukumughogha u Pekahiya, poka nu Aligobi nu Aliyeli mwilinga ilya munyumba iya bumwene mu Samaliya. Po u Peka akamupyana pakuba we mwene.

²⁶ Imbombo izinji zyosi zizyo u Pekahiya akabomba zisimbiwe mwibuku ilya Mbili iya bamwene aba ba Izilayeli.

U mwene u Peka akulaghila mu Izilayeli

²⁷ Mumwaka uwa 52 bo u mwene u Azaliya akulaghila mu Yuda, u Peka umwana uwa Lemaliya akaba we mwene uwamu Izilayeli, sona akalaghila amaka 20 bo ali mu Samaliya.

²⁸ U Peka akananga pamaso pa Mwene, sona atakazileka imbibi zyache nukubomba zizyo u Yelobowamu umwana uwa Nebati akabomba pakubapela aba Izilayeli ukuti bope banangaye.

²⁹ Pakaba po pakabalilo aka mwene u Peka uwamu Izilayeli, kako u mwene u Tigilati Pileseli uwamu Asiliya akakafyula akaya akakulu nkani aka Iyoni naka Abeli Beti Maaka naka Yanowa naka Kedeshi, sona naka Hazoli. Akachifyula ichigaba icha Giliyadi, nicha Galileya sona ni chisu chosi icha Nafutali nukubasenda abantu bosi aba mula nukubuka nabo ku Asiliya pakuba bakayidi.

³⁰ Po u Hosheya umwana uwa Ela akabatika nizya kumughogha u Peka umwana uwa Lemaliya. Mumwaka uwa 20 bo u Yotamu umwana uwa Uziya akulaghila, u Hosheya akamughogha nukumupyana pakuba we mwene.

³¹ Imbombo izinji zyosi zizyo u Peka akabomba zisimbiwe mwibuku ilya Mbili iya bamwene aba ba Izilayeli.

U mwene u Yotamu akulaghila mu Yuda

³² Mumwaka uwabubili bo u mwene u Peka umwana uwa Lemaliya akulaghila mu Izilayeli, u Yotamu umwana uwa Uziya akanda pakulaghila mu Yuda.

³³ Akaba na maka 25 bo anda pakulaghila, sona akalaghila amaka 16 bo ali mu Yelusalemu. Unyina akaba we Yelusha umwana uwa Zadoki.

³⁴ U Yotamu akamuhobosya u Mwene pakubomba ingolosu ukuyana namumo uwise u Uziya akabombelagha.

³⁵ Loli u Yotamu atakabunangannya ubuzilo ubwapamwanya ubwakwiputilapo ivifwani, sona abantu bakabikagha ivyakwiyipa nukufukizya utwakununkila pabuzilo bulabula. U Yotamu akazenga sona umulyango uwa kumitu uwa Nyumba iya Mwene.

³⁶ Imbombo izinji zyosi zizyo u Yotamu akabomba pakabalilo kache zisimbiwe mwibuku ilya Mbili iya bamwene aba ba Yuda.

³⁷ Mumasiku ghalaghala, u Mwene akanda pakumutuma u mwene u Lezini uwamu Siliya nu Peka umwana uwa Lemaliya pakulwa ubwite ni chisu icha Yuda.

³⁸ U Yotamu akafwa nukusyiliwa mukaya akakulu nkani aka Devedi mu Yelusalemu. Po umwana wache u Ahazi akamupyana pakuba we mwene.