2 Abamwene 14 - IBAYIBOLO 2024

U mwene u Amaziya akulaghila mu Yuda

¹ Mumwaka uwabubili bo u Yehowashi, umwana uwa Yehowahazi akulaghila mu Izilayeli, u Amaziya umwana uwa Yowashi akaba we mwene uwamu Yuda.

² Akaba na maka 25 bo anda pakulaghila, sona akalaghila amaka 29 bo ali mu Yelusalemu. Unyina akaba we Yehoyadini uwamu Yelusalemu.

³ U Amaziya akamuhobosya u Mwene pakubomba ingolosu, loli atazikabomba zizyo umunyenya wache u Devedi akabombagha. U Amaziya akabomba zizyo uwise u Yowashi akabombagha.

⁴ Pope bulo atakabunangannya ubuzilo ubwapamwanya ubwakwiputilapo ivifwani, umwakuti abantu bakabikagha ivyakwiyipa nukufukizya utwakununkila pabuzilo bulabula.

⁵ Bo u Amaziya abwikazya bulo ubumwene bwache, akaghaghogha amakambala ghagho ghakamughogha uwise.

⁶ Pope bulo atakabaghogha abana babo, ukuyana namumo zisimbiliwe mu Ndaghilo izya Mozesi mumo u Mwene akalamula akati, “Abapapi batakaghoghiwanje pachifukwa icha mbibi izya bana babo, bope abana batakaghoghiwanje pachifukwa icha mbibi izya bapapi babo. Loli umuntu wesi aghoghiwanje pachifukwa icha mbibi izyache ni zyache.”

⁷ U Amaziya akabaghogha abasilikali 10,000 aba Edomu mwikombe ilya Mbeya, sona akakafyula akaya akakulu nkani aka Sela pakulwa ubwite nukukita ukuti Yokitele, lilyo litabwa lyache mupaka nilelo bulo.

⁸ Po u Amaziya akamutumila intumi u Yehowashi umwana uwa Yehowahazi, umwizukulu uwa Yehu u mwene uwamu Izilayeli. Akamubuzya akati, “Nanti we mwanavuli, zagha tukomane pamaso na pamaso.”

⁹ Loli u mwene u Yehowashi akamwamula akati, “Impanya iya mwivwa iya mu Lebanoni yikayitumila amazyu ikwi ilya mwale itali ilya mu Lebanoni ukuti, ‘Itikizya umwana wako ukuti abanje muchi uwa mwana wane.’ Po ichinyamana icha mu Lebanoni chikadumusannya palapala nukuyikanyankila bulo impanya iya mwivwa yila.

¹⁰ Awe naloli ubapotite aba Edomu, polelo ukwitutumula. Wituvyanje pachifukwa ichakuti upotite, loli ikala bulo panyumba yako. Nkimba choni chicho ukwilondela intamyo zizyo zingakunangannya awe poka na bantu aba mu Yuda?”

¹¹ Loli u Amaziya atakateghelezyanga, po u mwene u Yehowashi uwamu Izilayeli akabuka pakulwa ubwite. U Yehowashi nu Amaziya u mwene uwamu Yuda bakalwa ubwite pa Beti Shemeshi mu Yuda.

¹² Aba Izilayeli bakabapota abantu aba mu Yuda, po umusilikali wesi akachimbilila kukaya kache.

¹³ U mwene u Yehowashi akamulema u mwene u Amaziya, umwana uwa Yowashi, yuyo akaba mwizukulu uwa Ahaziya mu Beti Shemeshi. Po u Yehowashi akabuka ku Yelusalemu nukumongolannya ulupaso ulwa Yelusalemu amamita 200 ukwandila pamulyango uwa Efulayimu mupaka pamulyango uwa pankuto.

¹⁴ Akasendamo ugolide nu siliva wesi, sona ni vibombelo vyosi vivyo vikaba mu Nyumba iya Mwene, na muchipinda ichakusungilamo ubukabi munyumba iya bumwene. Akabalema abantu pakuba bakayidi nukunyokela ku Samaliya.

¹⁵ Imbombo izinji zyosi zizyo u Yehowashi akabomba, sona namumo akalwila ubwite nu mwene u Amaziya wamu Yuda zisimbiwe mwibuku ilya Mbili iya bamwene aba ba Izilayeli.

¹⁶ U Yehowashi akafwa nukusyiliwa mu Samaliya mumapumpa agha bamwene aba Izilayeli. Po umwana wache u Yelobowamu uwabubili akamupyana pakuba we mwene.

Ubufwe ubwa Amaziya u mwene uwamu Yuda

¹⁷ U Amaziya umwana uwa Yowashi u mwene uwamu Yuda, akalaghila amaka 15, bo u Yehowashi umwana uwa Yehowahazi, u mwene uwamu Izilayeli afuye kale.

¹⁸ Imbombo izinji zyosi zizyo u Amaziya akabomba zisimbiwe mwibuku ilya Mbili iya bamwene aba ba Yuda.

¹⁹ Abantu bakabatika nizya kumughoghela mu Yelusalemu u Amaziya, po u Amaziya akachimbilila ku Lakishi, loli abalwani bache bakabatuma abantu ukuti bamukonke nukumughoghela kulakula.

²⁰ Bakaghunyamula umuvimba wache pafalasi nukunyokela nagho, po bakamusyila mumapumpa agha banyenya bache mukaya akakulu nkani aka Devedi mu Yelusalemu.

²¹ Po abantu bosi aba mu Yuda bakamusenda u Azaliya, yuyo pakabalilo kalakala akaba na maka 16, nukumwimika ukuti abanje we mwene pakumupyana uwise u Amaziya.

²² U Azaliya akakazenga sona akaya akakulu aka Elati nukubanyosezya aba Yuda, bo uwise u Amaziya afwa.

U mwene u Yelobowamu uwabubili akulaghila mu Izilayeli

²³ Mumwaka uwa 15 bo u Amaziya, umwana uwa Yowashi akulaghila mu Yuda, u Yelobowamu umwana uwa Yehowashi akaba we mwene uwamu Izilayeli, sona akalaghila amaka 41 bo ali mu Samaliya.

²⁴ U Yelobowamu uwabubili akananga pamaso pa Mwene, sona atakazileka imbibi zyache nukubomba vivyo u Yelobowamu umwana uwa Nebati akabombagha pakubapela aba Izilayeli ukuti bope banangaye.

²⁵ U Yelobowamu akazifyula sona impaka izya chisu icha Izilayeli ukwandila ku Lebo Hamati mupaka ku Nyanja Imfwe ukuyana namumo u Mwene u Chala uwa ba Izilayeli akanenela mumubombi wache umulaghuzi u Yona umwana uwa Amitayi uwamu Gati Hefeli.

²⁶ U Mwene akaghennya amayimba ghagho aba Izilayeli bosi bakakomana nagho manyi muzya manyi musatuke pakuti atakabapo nayumoyumo umuntu uwakubavwa.

²⁷ Loli u Mwene akabapoka ukwendela mwa Yelobowamu umwana uwa Yowashi, pachifukwa ichakuti atakalondagha ukuti abazimizye aba Izilayeli pachisu ichapasi.

²⁸ Imbombo izinji zyosi zizyo u Yelobowamu uwabubili akabomba, nubwite bubo akalwa, sona namumo akabanyosezya aba Izilayeli akaya akakulu nkani aka Damasika naka Hamati zisimbiwe mwibuku ilya Mbili iya bamwene aba ba Izilayeli.

²⁹ U Yelobowamu uwabubili akafwa nukusyiliwa mumapumpa agha bamwene aba Izilayeli. Po umwana wache u Zekaliya akamupyana pakuba we mwene.