2 Abamwene 13 - IBAYIBOLO 2024

U mwene u Yehowahazi akulaghila mu Izilayeli

¹ Mumwaka uwa 23 bo u Yowashi umwana uwa Ahaziya akulaghila mu Yuda, u Yehowahazi umwana uwa Yehu akaba we mwene uwamu Izilayeli, sona akalaghila mu Izilayeli amaka 17 bo ali mu Samaliya.

² Po u Yehowahazi akananga pamaso pa Mwene pakubomba ngati mumo u Yelobowamu umwana uwa Nebati akabombelagha pakubapela aba Izilayeli ukuti bope banangaye, sona atakazileka imbibi zyache.

³ U Mwene akabakalalila aba Izilayeli, po akababika munyobe izya mwene u Hazayeli uwa ba Siliya, sona nu mwana wache u Beni Hadadi akabalilo na kabalilo.

⁴ U Yehowahazi akamulaba u Mwene ukuti amupelele ichisa pachifukwa ichakuti aba Siliya bakabayivya nkani aba Izilayeli, po u Mwene akivwa ulwiputo lwache.

⁵ U Mwene akabatumila aba Izilayeli umulongozi ukuti abapoke munyobe izya ba Siliya. Po aba Izilayeli bakikala mumutende ngati mumo bakabela pakwanda.

⁶ Pope bulo aba Izilayeli batakazileka imbimbi zyabo ukuyana namumo abamunyumba iya Yelobowamu bakabombelagha pakubapela aba Izilayeli ukuti bope banangaye. Chope ichifwani icha Ashela chikaba chichili chili mu Samaliya mulamula.

⁷ U Yehowahazi atakasyalapo na basilikali nabamobamo, loli bene 50 babo bakendagha pafalasi ni ngolo izya bwite 10, sona na basilikali 10,000 babo bakendagha pasi pachifukwa ichakuti u mwene uwa ba Siliya akabanangannya abasilikali bosi nukubakanyankila ngati lufumbi.

⁸ Imbombo izinji zyosi zizyo u Yehowahazi akabomba zisimbiwe mwibuku ilya Mbili iya bamwene aba ba Izilayeli.

⁹ U Yehowahazi akafwa, nukusyiliwa mu Samaliya. Po umwana wache u Yowashi akamupyana pakuba we mwene.

U mwene u Yowashi akulaghila mu Izilayeli

¹⁰ Mumwaka uwa 37 bo u mwene u Yowashi akulaghila mu Yuda, u Yehowashi umwana uwa Yehowahazi akanda pakulaghila mu Izilayeli sona akalaghila amaka 16 bo ali mu Samaliya.

¹¹ Wepe bulo akananga pamaso pa Mwene, sona atakazileka imbibi zyache nukubomba vivyo u Yelobowamu umwana uwa Nebati akabombagha pakubapela aba Izilayeli ukuti bope banangaye.

¹² Imbombo izinji zyosi zizyo u Yowashi akabomba, sona nu bwite bubo akalwa nu Amaziya, u mwene wamu Yuda visimbiwe mwibuku ilya Mbili iya bamwene aba ba Izilayeli.

¹³ U Yowashi akafwa nukusyiliwa mu Samaliya, po u Yelobowamu uwabulili akamupyana pakuba we mwene wamu Izilayeli.

Ubufwe ubwa Elisha

¹⁴ Pakabalilo kalakala u Elisha akabina po pabumalilo akafwa. U Yowashi u mwene wamu Izilayeli akabuka pakumwennya. Akamulila akati, “Wee tata, wee tata! Wee ngolo izya bwite izya ba Izilayeli, na bantu abakukwela pafalasi!”

¹⁵ U Elisha akamulamula akati, “Senda ubwele nu tulasilo.” Po u Yehowashi akabomba zizyo akalamuliwa.

¹⁶ U Elisha akamubuzya akati, “Lema ubwele kunyobe zyako.” U Yehowashi akabomba ukuyana namumo akamubuzizya. Po u Elisha akabika inyobe zyache panyobe izya Yehowashi yula.

¹⁷ U Elisha akati, “Ighula ibwindo ilyakubufumilo bwizuba. U Yehowashi akabomba zizyo akalamuliwa.” U Elisha akamulamula akati, “Lasa!” Po akalasa. U Elisha akamubuzya akati, “Akalasilo aka ka Mwene akakulanjizya ubupoti bwache, kako kakwiza pakubapota aba Siliya. Awe ukwiza pakubazimizya aba Siliya bosi pa Afeki.”

¹⁸ Po u Elisha akati, “Senda utulasilo.” U Yehowashi akabomba zizyo akabuziwa. U Elisha akamulamula akati, “Lasa pasi.” U Yehowashi akalasa pasi katatu nukuleka.

¹⁹ Po umuntu uwa Chala yula akamukalalila nkani u Yehowashi nukumubuzya ukuti, “Nanti walasagha aka fayivi pamo aka sikisi ngali wabapota aba Siliya nukubazimizya bosi. Loli ilelo ukwiza pakubapota katatu bulo mpela.”

²⁰ Pisinda pache u Elisha akafwa nukusyiliwa. Umwaka nu mwaka amavyondongo agha mu Mowabu ghakizagha pakufyula ivintu mu Izilayeli.

²¹ Isiku limo, bo aba Izilayeli bali pakumusyila umuntu yumo umufwe, bakennya akabukatila aka mavyondongo, po bakaghusumbila bulo mwipumpa ilya Elisha nukuchimbila. Bo umuvimba ghula wapalamasannya na mafupa agha Elisha, ghukazyuka nukwimilila.

Ubwite pakasi pa Izilayeli naba Siliya

²² U mwene u Hazayeli uwa ba Siliya akabayivya nkani aba Izilayeli pakabalilo kosi bo u mwene u Yehowahazi akulaghila.

²³ Loli u Mwene akabapelela ichisa aba Izilayeli, sona akabapasikizyanga nkani pachifukwa icha lufingo lulo akafingana nu Abulahamu nu Yisaki, sona nu Yakobo. Ichi cho chifukwa mupaka nilelo bulo atakulonda ukuti abanangannye pamo ukubefya pamaso papache.

²⁴ U mwene u Hazayeli uwa ba Siliya akafwa, po umwana wache u Beni Hadadi akamupyana pakuba we mwene.

²⁵ Po u mwene Yowashi uwamu Izilayeli akamufyula sona u Beni Hadadi utwaya utukulu tuto akamufyula uwise u Yehowashi kubwite. U Yowashi akamupota katatu kosi nukumufyula utwaya utukulu tula.