2 Abamwene 12 - IBAYIBOLO 2024

U mwene u Yowashi akulaghila mu Yuda

¹ Mumwaka waseveni bo u Yehu akulaghila, u Yowashi akaba we mwene, sona akalaghila amaka 40 bo ali mu Yelusalemu. Unyina akaba we Zibiya uwamu Belisheba.

² U Yowashi akamuhobosyanga u Mwene mubumi bwache bosi, pachifukwa ichakuti umuputi u Yehoyada akamubuzya izyakubomba.

³ Loli atakabunangannya ubuzilo ubwapamwanya ubwakwiputilapo ivifwani. Abantu bakabikagha ivyakwiyipa nukufukizya utwakununkila pabuzilo bulabula.

⁴ U Yowashi akabalamula abaputi akati, “Musungaye akiza indalama zyosi zizyo zikubikiwa mu Nyumba iya Mwene pakuba chakwiyipa ichipaghuliwa, kokuti indalama zyosi zizyo abantu bakubika pachifukwa icha chilapo, sona na zyosi zizyo abantu bakubika mubwighane.

⁵ Umuputi wesi apokelaye indalama ku basungi, sona azibombezyanje imbombo iyakuyannya sona Inyumba iya Chala.”

⁶ Loli mumwaka uwa 23 bo u Yowashi akulaghila, abaputi bala bakaba bachili batayiyanizye sona Inyumba iya Chala.

⁷ Po u mwene u Yowashi akamwitizya umuputi u Yehoyada na baputi abanji nukubalalusya ukuti, “Nkimba choni chicho mutakayiyannya sona Inyumba iya Chala? Mutakazibombezyanje imbombo zyinyu indalama zizyo mukupokela ku basungi, loli pene papo nanti mukulonda pakuzibombezya pakuyiyannya sona Inyumba iya Chala.”

⁸ Abaputi bala bakitika ukuti batakwiza pakupokela sona indalama ku bantu, nukuti te bo babo bakwiza pakuyannya sona Inyumba iya Chala.

⁹ Po umuputi u Yehoyada akasenda ibokosi, sona akadobola ichikupikizyo chache nukulibika mulubazu ulwa chighemo kunyobe indilo ilya muntu wesi yuyo akinjilagha mu Nyumba iya Mwene. Abaputi babo bakalindililagha pamulyango bakabika mubokosi mula indalama zyosi zizyo abantu bakizagha nazyo ku Nyumba iya Mwene.

¹⁰ Nanti bennya ukuti mubokosi mula muli indalama inyinji, umusimbi uwa kunyumba iya bumwene nu muputi usongo bakazibelengelagha indalama zizyo abantu bakizagha nazyo ku Nyumba iya Mwene nukuzibika munyambi.

¹¹ Nanti bennya umutengo uwa ndalama zila, bakabapanga abakapitawa babo bakasaliwa ukuti benelezyanje imbombo iyakuyannya sona Inyumba iya Mwene, umwakuti abalipile abapalamatabwa na bazengi abanyumba

¹² na bazenga nyumba pakubombezya amabwe sona na babiza amabwe. Abantu banaba bakaghula amatabwa na mabwe aghakuyanizizya Inyumba iya Mwene, sona bakaghulagha ivintu ivyinji vyosi vivyo vikalondiwanga pambombo yilayila.

¹³ Loli indalama zizyo abantu bakiza nazyo ku Nyumba iya Mwene batakazibombezya imbombo iyakupangila amabeseni agha siliva pamo utulemelo utwa nyale pamo imbale izyakunyafilila ibanda pamo amapati pamo ivibombelo ivinji ivya golide pamo ivya siliva ivya mu Nyumba iya Mwene.

¹⁴ Indalama zila bakabalipilagha abambombo babo bakayannyanga sona Inyumba iya Chala yila.

¹⁵ Abantu babo bakenelezyanga imbombo yila bakaba basubiliwa nkani, po batakalondagha ukuti banangannye namumo bakabombezezya indalama zila.

¹⁶ Indalama izya kulipilila inongwa, sona nizya chakwiyipa ichakupepesezya inongwa zitakabikiwanga mu Nyumba iya Mwene, loli zikaba zya baputi.

¹⁷ Pakabalilo kalakala u Hazayeli, u mwene uwa ba Siliya akabuka pakulwa ubwite nakaya akakulu nkani aka Gati nukukafyula. Pisinda pache akalwa ubwite nakaya akakulu nkani aka Yelusalemu.

¹⁸ Loli u mwene u Yowashi uwamu Yuda akasenda ivibombelo vyosi ivipaghuliwa vivyo abanyenya bache: U Yehoshafati nu Yeholamu, sona nu Ahaziya bakavipaghulila kwa Mwene, poka nu golide wesi yuyo akaba munyumba iyakusungilamo ubukabi mu Nyumba iya Mwene nu golide uwa munyumba iya bumwene nukuvituma kwa mwene u Hazayeli uwa ba Siliya. Po akabalamula abasilikali bache ukuti baleke pakulwa ubwite nakaya akakulu nkani aka Yelusalemu.

¹⁹ Imbombo izinji zyosi zizyo u Yowashi akabomba zisimbiwe mwibuku ilya Mbili iya bamwene aba ba Yuda.

²⁰ Amakambala ghache ghakabatika nizya kumughogha, po ghakamughoghela mwilinga ilya Beti Milo mumusebo uwakubukila ku Sila.

²¹ Amakambala ghache ghagho ghakamughogha ghakaba gho agha: U Yozabadi umwana uwa Shimeyati nu Yehozabadi umwana uwa Shomali. U Yowashi akafwa, nukusyiliwa mukaya aka Devedi mu Yelusalemu. Po umwana wache u Amaziya akamupyana pakuba we mwene.