2 Abamwene 11 - IBAYIBOLO 2024

U mwene umukolo u Ataliya akulaghila mu Yuda

¹ Bo u Ataliya unyina uwa Ahaziya, ivwa bulo ukuti umwana wache aghoghiwa, akabalamula bosi abamunyumba iya bumwene ukuti baghoghiwanje.

² Loli u Yehosheba umwana uwa mwene u Yeholamu, umuyemba uwa Ahaziya, akamusenda u Yowashi umwana uwa Ahaziya umwakumwiba bulo ukumwefyapo pakasi pa bana abamwene babo bakalonda pakughoghiwa. Akamufisa poka nu mulezi wache muchipinda chimo ukuti u Ataliya atakamughoghe, po akapona.

³ Umwana yula akavwamagha mu Nyumba iya Mwene amaka sikisi, poka nu mulezi wache, bo u Ataliya ali pakulaghila ichisu chila.

⁴ Mumwaka uwaseveni u Yehoyada akabitizya abasongo aba basilikali 100, na balindilili aba ku Nyumba iya bumwene ukuti bize ku Nyumba iya Mwene. Akafingana nabo ulufingo pakubalapizya ichilapo pantazi pa Nyumba iya Mwene. Pisinda pache akabalanjizya umwana uwa mwene yula

⁵ nukubalamula ukuti, “Izi zyo zizyo mubaghiye pakubomba: Amwe mwe ba tubukatila tutatu tuto tukubombagha imbombo Pisiku Ilyakutuzya, kokuti akabukatila akakwanda ko kalindililaye kunyumba iya bumwene.

⁶ Akabukatila akabubili ko kalindililaye pamulyango uwa Suli, sona akabutatu ko kalindililaye pamulyango uwakwisinda ukwa balindilili. Bosi bana babombaye imbombo umwakulekelana ku Nyumba iya Mwene.

⁷ Po abantu aba tubukatila utunji tubili babo bakutuzya Pisiku Ilyakutuzya bo bamuzighililaye u mwene ku Nyumba iya Mwene.

⁸ Mumuzyungulilaye u mwene, bo umuntu wesi alemite ichilwilo kunyobe yache. Umuntu wesi yuyo akupalamila kupipi namwe, aghoghiwanje. Mubanje papipi nkani nu mwene kosi kuko akubuka.”

⁹ Abasongo aba balindilili 100 bala bakabomba zizyo umuputi u Yehoyada akabalamula. Umuntu wesi akabasenda abantu bache, babo bakabukagha kumbombo Pisiku Ilyakutuzya, sona na babo bakatuzya pambombo. Bosi banaba bakiza ku muputi u Yehoyada yula.

¹⁰ Po umuputi yula akabapa abasongo aba basilikali bala impalala ni ngulu, zizyo zikaba zya mwene u Devedi, sona zizyo zikasungiwanga mu Nyumba iya Mwene.

¹¹ Po abalindilili bala bakabamba umwakumuzyungulila u mwene, papipi ni chighemo, sona ni Nyumba yila, ukwandila kuntende mupaka kumitu ukwa Nyumba iya Chala yila, bo umuntu wesi alemite ichilwilo kunyobe yache.

¹² U Yehoyada akamufumya kuzi umwana uwa mwene yula nukumuvwika impumpu. Po akamupa ibuku ilya ndaghilo nukumwimika pakuba we mwene. Bakamupakazya amafuta agha syunguti ukuti abanje we mwene, sona abantu bakakoma inkufi nukukolomoka ukuti, “Wee mwene, tukukulondela ubumi ubutali.”

¹³ Bo u Ataliya ivwa ichongo icha balindilili, nicha bantu bala, akabuka ku Nyumba iya Mwene, kuko kukabungana abantu bala.

¹⁴ Bo atalankannya akamwennya u mwene imiliye papipi ni mpanda ukuyana nu lwiho lwabo. Pakabalilo kalakala abasongo aba balindilili, na bantu abakulizya amapati bakimilila papipi nu mwene, sona abantu bosi aba muchisu chila bakasekelelagha nukulizya amapati. Po u Ataliya akazepula inkazo yache pachifukwa icha kukalala nukukolomoka ukuti, “Bansambukiye! Bansambukiye!”

¹⁵ Po umuputi u Yehoyada akabalamula abasongo aba basilikali 100, babo bakabenelezyanga abasilikali akati, “Mumwefyemo mukasi mwize nawe pakasi pa balindilili, sona mumughoghe umuntu wesi yuyo akuyezya pakumupoka.” Pakuti umuputi yula akati, “Atakaghogheliwanje mu Nyumba iya Mwene.”

¹⁶ Po abantu bala bakamulema u Ataliya nukubuka nawe kunyumba iya bumwene, bo bafika nawe pamulyango uwa Falasi, bakamughoghela palapala.

U Yehoyada akuyannya ivintu

¹⁷ Po umuputi u Yehoyada akafinga ulufingo pakasi pa bantu nu Chala sona nu mwene ukuti bakwiza pakuba bantu ba Mwene. Akamupela sona u mwene ukuti afingane na bantu.

¹⁸ Abantu bosi aba muchisu chila bakabuka kunyumba iyakwiputilamo u Baala nukuyimongolannya. Bakavimongolannya ivighemo ni vifwani vyache, sona bakamughogha umuputi u Matani, yuyo akaba muputi uwa Baala kuntazi ukwa vighemo. Po umuputi u Yehoyada akababika abalindilili pamulyango uwa Nyumba iya Mwene.

¹⁹ Akabasenda abasongo aba balindilili 100, na balindilili aba kunyumba iya bumwene, sona na bantu bosi aba muchisu chilachila. Abantu bosi poka bakamusindikila u mwene ukufuma ku Nyumba iya Mwene ukwinjilila pamulyango uwa balindilili mupaka kunyumba iya bumwene. Po u mwene akikala pachitengo chache icha bumwene.

²⁰ Abantu bosi aba muchisu chila bakahoboka nkani, sona mukaya akakulu nkani kala mukaba bulo myee, pachifukwa ichakuti u Ataliya akaghogheliwa munyumba iya bumwene.

²¹ U Yowashi akanda pakulaghila bo ali na maka seveni.