2 Abamwene 10 - IBAYIBOLO 2024

U Yehu akubaghogha abaluko ulwa Ahabu

¹ Pakabalilo kalakala u Ahabu akaba na baluko 70 babo bakikalagha mu Samaliya. Po u Yehu akasimba abakalata nukubatuma ku makambala agha mu Yezileli, na ku basongo, sona na ku basungilili aba baluko ulwa Ahabu ukuti,

² “Amwe mwe mukubasungilila abaluko ulwa mwene winyu u Ahabu, sona muli ni ngolo izya bwite ni falasi ni vilwilo ivya bwite sona nakaya akakulu nkani kako kali ni linga. Po nanti mwapokela bulo ukalata uyu,

³ musale uwaluko weka uwa mwene winyu u Ahabu yuyo abaghiye pakuba mulongozi. Po mumwimike ukuti abanje we mwene winyu, sona amwe mubalwilaye abamunyumba iya mwene winyu.”

⁴ Loli abantu bala bakanyila nkani, po bakati, “Nanti abamwene babili bala bakapotwa pakulwa nawe, po nkimba aswe tungalwa nawe bulibuli?”

⁵ Po usongo uwa kunyumba iya bumwene, sona mulongozi uwa akaya akakulu nkani kala poka na basongosongo na basungilili aba baluko bakamutumila u Yehu amazyu aghakuti, “Aswe twe bambombo bako, sona tukwiza pakubomba zyosi zizyo ukutubuzya. Tutakwiza pakumusala nayumoyumo umuntu ukuti abanje we mwene. Bomba bulo chosi chicho ukwinong'ona ukuti chiza.”

⁶ Po u Yehu akabasimbila ukalata uyunji akati, “Nanti muli kulubazu lwane, sona nanti mukunyivwila, dumula imitu iya baluko ulwa mwene winyu, mwize nayo kuno ku Yezileli indabi pakabalilo ngati kanaka.” Pakabalilo kalakala abaluko 70 abamwene bakikalagha na basongo aba mukaya akakulu nkani aka Samaliya, babo bakabasungililagha.

⁷ Bo abasongo bala bapokela ukalata yula, bakabaghogha abaluko bosi 70 ulwa Ahabu. Bakayibika imitu yabo muvidudunga nukuyituma kwa Yehu yuyo akaba mu Yezileli.

⁸ Bo intumi yafika, yikamubuzya u Yehu yikati, “Biza nayo imitu iya baluko ulwa Ahabu.” Po u Yehu akabalamula akati, “Muyibunganike muvibunga vibili pamulyango uwa lupaso ulwa kaya akakulu nkani nukuyileka palapala mupaka pandabindabi.”

⁹ Pandabindabi u Yehu akabuka pamulyango, po akimilila pamaso pabantu bosi nukubabuzya ukuti, “Amwe mute ninongwa nayimoyimo.” Nene nananga, pakuti nkabatika nizya kumughogha u mwene wane. Loli nkimba wewenu yuyo akabaghogha abantu bosi banaba?

¹⁰ Polelo muzimanye ukuti amazyu ghosi ghagho u Mwene akanena nizya bamunyumba iya Ahabu ghakwanilisiwa aghakuti, “U Mwene avibomba vivyo akanena ukwendela mu mubombi wache u Eliya.”

¹¹ Po u Yehu akabaghogha bosi abamunyumba iya Ahabu babo bakasyalapo mu Yezileli poka na basongosongo bosi na bamanyani bache bosi na baputi bosi sona patakabapo nayumoyumo yuyo akasyala mumi.

Ukughoghiwa ukwa bakamu abamwene u Ahaziya

¹² U Yehu akanyamuka nukubuka ku Samaliya. Bo afika pa Beti Ekedi papo pakaba visakasa ivya badimi abang'ozi,

¹³ akakomana na kabukatila aka bakamu aba Ahaziya u mwene uwamu Yuda. Po akabalalusya akati, “Nkimba mwe bawenu?” Bakamwamula bakati, “Twe bakamu aba Ahaziya, twiza pakubalamuka abana abamwene u Ahabu, sona nunyina uwa mwene u Yezibeli.”

¹⁴ U Yehu akabalamula abantu bache akati, “Mubaleme bumi.” Po bakabalema bumi nukubaghoghela bosi papipi ni chiziba mu Beti Ekedi. Bosi poka bakabapo 42, sona patakabapo nayumoyumo yuyo akasyala mumi.

¹⁵ Bo epako kulakula, u Yehu akakomana nu Yonadabu umwana uwa Lekabu, yuyo akizagha pakukomana nawe. U Yehu akamulamuka akati, “Inyinong'ono zyako ni nyinong'ono zyane ziyanite bulo.” U Yehonadabu akamula akati, “Momumo.” U Yehu akati, “Nanti momumo, lema inyobe yane.” U Yehonadabu akamulema inyobe yache, po u Yehu akamukwezya mungolo yache.

¹⁶ U Yehu akamubuzya akati, “Zagha kuno wennye namumo imbeleye nu lweke kwa Mwene.” Po bosi poka bakakwela mungolo iya Yehu.

¹⁷ Bo u Yehu afika mu Samaliya, akabaghogha bosi abamunyumba iya Ahabu, babo bakasyala bumi. Ukuyana namumo u Mwene akamubuzizya u Eliya.

U Yehu akubaghogha abaputi aba Baala

¹⁸ Pisinda pache u Yehu akababungannya poka abantu bosi aba mu Samaliya nukubabuzya ukuti, “U Ahabu akamwiputa u Baala panandi bulo. Loli ane nkwiza pakumwiputa ukuchilapo.

¹⁹ Polelo mubitizye abalaghuzi bosi aba Baala, na babombi bache, sona na baputi bache bosi. Mwenelezye ukuti atakabepo nayumoyumo umuntu uwakusobelapo, pachifukwa ichakuti nkulonda pakubika ichakwiyipa ichikulu nkani kwa Baala. Nanti umuntu yumo anyoka, akwiza pakughoghiwa.” Loli u Yehu akazibombela bulo mubuchevu umwakuti abanangannye ababombi bosi aba Baala.

²⁰ U Yehu akalamula akati, “Mufumusye ukuti kubanje lukomano ulwakumuchindikila u Baala.” Po bakafumusya ukuti lubanjeko.

²¹ U Yehu akatuma intumi muchisu chosi icha Izilayeli, po ababombi bosi aba Baala bakiza, sona atakabapo nayumoyumo umuntu uwakunyoka. Bosi bakabungana munyumba iyakumwiputilamo u Baala, mupaka inyumba yosi yikizula umwakuti patakasyalapo ubuzilo nabumobumo.

²² U Yehu akamulamula umuntu uwakusungagha inkazo yula akati, “Wize ni nkazo ukuti ababombi bosi aba Baala bavwalaye.” Po umuntu yula akiza ni nkazo zila.

²³ U Yehu nu Yonadabu umwana uwa Lekabu bakinjila munyumba iya Baala yila. Po u Yehu akababuzya ababombi aba Baala bala akati, “Mwenelezye ukuti patakabepo nabamobamo pano ababombi aba Mwene poka namwe, loli bene ababombi aba Baala.”

²⁴ Po bakinjila munyumba yila pakubika ivyakwiyipa ivyakocha ni vyakwiyipa ivinji. Pakabalilo kalakala u Yehu akababambika abantu 80 kuzi nukubasoka ukuti, “Mubaghoghe abantu bosi banaba. Nanti yumo akumuleka umuntu weka uwa bantu banaba ukuti achimbile, umuntu yulayula akwiza pakughoghiwa.”

²⁵ Bo u Yehu amala pakubika ichakwiyipa ichakocha, akabalamula abalindilili na basongo aba basilikali akati, “Injila mukasi nukubaghogha bosi, sona atakabepo nayumoyumo umuntu uwakuchimbila!” Po bakabadumula imitu na bapanga nukubaghogha bosi babo bakaba mulamula nukuyisumbila kuzi imivimba yabo yosi. Po bakinjila muchipinda ichamukasi nkani icha nyumba iya Baala yila.

²⁶ Bakefyamo ichifwani icha Baala nukuchocha.

²⁷ Po bakachimongolannya ichifwani icha Baala, sona ni nyumba iya Baala nukuyipela pakuba lizyenje, umwakuti abantu bakulibombezya mupaka nilelo bulo.

²⁸ Umu momumo u Yehu akachimazizya ichiputo icha Baala mu Izilayeli.

²⁹ Loli u Yehu atakazileka imbibi zizyo u mwene u Yelobowamu umwana uwa Nebati akabombagha nukubapela aba Izilayeli ukuti bope banangaye pakwiputa ivifwani ivya golide ivya ngwata, vivyo vikaba mu Beteli, na mu Dani.

³⁰ U Mwene akamubuzya u Yehu akati, “Pakuti wababombela abaluko ulwa Ahabu zyosi zizyo nkakulamula, po nkukulayizya ukuti abaluko lwako bakwiza pakulaghila mu Izilayeli mupaka inkulilo iyafolo.”

³¹ Loli u Yehu atakazikonka indaghilo izya Mwene u Chala uwa ba Izilayeli nu moyo wache ghosi. Atakazileka imbibi izya Yelobowamu zizyo zikabapelagha aba Izilayeli ukuti bope banangaye.

Ubufwe ubwa Yehu

³² Pakabalilo kalakala, u Mwene akanda pakuchefyako impaka izya chisu icha Izilayeli. U mwene u Hazayeli uwa ba Siliya akabapota aba Izilayeli muchisu chabo chosi,

³³ ukwandila kubufumilo bwizuba ubwa Yolodani muchisu chosi icha Giliyadi kokuti ichigaba icha Gadi nicha Lubeni sona nicha Manase. Ukwandila ku Aloyeli papipi nu lusoko ulwa Alinoni nukudumusannya mu Giliyadi mupaka ku Bashani.

³⁴ Imbombo izinji zyosi zizyo u Yehu akabomba zisimbiwe mwibuku ilya Mbili iya abamwene aba Izilayeli.

³⁵ U Yehu akafwa nukusyiliwa mu Samaliya. Po umwana wache u Yehowahazi akamupyana pakuba we mwene.

³⁶ U Yehu akalaghila mu Izilayeli amaka 28 bo ali mu Samaliya.