1 Yohani 4 - IBAYIBOLO 2024

Umuzimu uwanaloli nu muzimu umumyasi

¹ Mwee bamanyani bane abaghaniwa, mutakabasubilaye abantu bosi babo bakuti bali nu Muzimu Umuzelu, loli mubayezyanje ukuti mumanye nanti naloli umuzimu ghugho bali nagho wakwa Chala. Pakuti abalaghuzi abamyasi binji nkani muchisu chosi ichapasi.

² Umu momumo mungamumanyila nanti umuntu ali nu Muzimu uwa Chala: Umuntu wesi yuyo akwitika ukuti u Yesu Kilisitu akiza mumubili uwa buntu, umuntu yunuyu ali nu Muzimu wakwa Chala.

³ Loli umuntu wesi yuyo atakumwitika u Yesu, umuntu yunuyu ate nu Muzimu wakwa Chala. Umuzimu ghugho ali nagho wamulwani uwa Kilisitu, ghugho mukivwa ukuti ghukwiza, sona losi ulu ghuli kale muchisu ichapasi.

⁴ Loli amwe mwe bana bane, mwe bache ba Chala sona mwabapota abalaghuzi abamyasi bala, pachifukwa ichakuti u Muzimu yuyo ali mumwinyu wamaka nkani ukuchila yuyo ali muchisu ichapasi.

⁵ Abalaghuzi abamyasi banaba ba muchisu ichapasi, pakuti bakunena ivintu ivya muchisu ichapasi, ichi cho chifukwa abantu bakubateghelezya.

⁶ Loli aswe twe bache aba Chala. Umuntu wesi yuyo amumenye u Chala akututeghelezya. Loli umuntu wesi yuyo atamumenye u Chala atakututeghelezya. Umu momumo tungalesanizya Umuzimu uwa bwanaloli nu muzimu uwa bumyasi.

U Chala we lughano

⁷ Mwee bamanyani bane abaghaniwa, zagha tughananaye, pakuti ulughano lukufuma kwa Chala. Umuntu wesi yuyo ali nu lughano mwana uwa Chala, sona amumenye u Chala.

⁸ Umuntu wesi yuyo ate nu lughano atamumenye u Chala, pakuti u Chala we lughano.

⁹ U Chala akatulanjizya ulughano lwache pakututumila u Mwana wache mwene na mwene muchisu ichapasi, umwakuti tubanje nubumi ukwendela mumwache.

¹⁰ Ulughano ulwenecho lo ulu: Tute sweswe twe tukamughana u Chala, awe. Loli u Chala weyuyo akatughana nukututumila u Mwana wache ukuti abanje chakwiyipa ichakuhobokela imbibi zyitu.

¹¹ Mwee bamanyani bane abaghaniwa, pakuti u Chala akatughana nkani, naswe bulo tubaghiye tughananaye nkani.

¹² Nayumo umuntu yuyo amwenizyepo u Chala. Loli nanti tukughanana, kokuti u Chala akwikala mumwitu, polelo ulughano lwache lukuba lwakufikapo mumwitu.

¹³ Tuzimenye ukuti tukwikala mukumamatilana poka nu Chala, sona wepe akwikala mukumamatilana poka naswe, pachifukwa ichakuti atupiye u Muzimu wache.

¹⁴ Aswe twennya nukuzisimikizya ukuti u Tata akatuma u Mwana wache pakuba Mupoki uwa bantu aba muchisu ichapasi.

¹⁵ Nanti umuntu akwitika ukuti u Yesu Mwana uwa Chala, kokuti akwikala mukumamatilana poka nu Chala, sona wepe nu Chala akwikala mukumamatilana poka nawe.

¹⁶ Polelo aswe tuzimanye nukusubila ukuti naloli u Chala atughanite nkani. U Chala we lughano. Umuntu wesi yuyo ali nu lughano, kokuti akwikala mukumamatilana poka nu Chala, sona wepe nu Chala akwikala mukumamatilana poka nawe.

¹⁷ Bunubu ulughano lukuba lwakufikapo mumwitu, umwakuti tukwiza pakuba twe bajivu nkani pisiku lilyo u Chala akwiza pakubalonga abantu pachifukwa ichakuti muchisu ichapasi tuyanite bulo nawe.

¹⁸ Mulughano lunulu mutalimo ubogha, pakuti ulughano ulwenecho lukuchimbizya ubogha bunubu. Nanti umuntu ali nubogha kokuti akulunyila ulufundo. Ichi chikulanjizya ukuti pakuba nubogha kokuti atalumenye ulughano ulwa Chala umwafikapo.

¹⁹ Aswe tumughanite u Chala, pakuti weyuyo akanda pakutughana aswe.

²⁰ Nanti umuntu yumo akuti, “Imughanite u Chala”, loli amubengite umukamu wache, kokuti mumyasi. Umuntu wesi yuyo atakumughana umukamu wache yuyo akumwennya na maso, kokuti atangamughana u Chala, yuyo atamwenizyepo nalumo.

²¹ Ilamulo lilyo u Kilisitu atupiye lyo ili: Umuntu wesi yuyo amughanite u Chala, amughane sona nu mukamu wache.