1 Yohani 3 - IBAYIBOLO 2024

Abana aba Chala

¹ Ennya namumo u Tata u Chala atughaniye, umwakuti tukwitiziwa bana bache! Naloli twe bana bache! Ichifukwa chicho ichisu ichapasi chitakutumanya chakuti ichisu chinichi chitamumenye u Chala.

² Mwee bamanyani bane abaghaniwa, ilelo aswe twe bana aba Chala, loli chichili chitavumbuliwe namumo tukwiza pakubela. Loli bo akwiza, tuzimenye ukuti tukwiza pakuyana nawe, pakuti tukwiza pakumwennya mumo abeleye.

³ Umuntu wesi yuyo ali nu lusubilo ulu, akwiswefya mwene bulo, ukuyana namumo u Kilisitu umwenecho musita chilema nachimochimo.

⁴ Umuntu wesi yuyo akubomba imbibi, kokuti akunangannya indaghilo izya Chala, pakuti ukubomba imbibi, ko kunangannya indaghilo.

⁵ Loli muzimenye ukuti u Kilisitu akiza, umwakuti efye imbibi, pakuti mumwache mutalimo nayimoyimo imbibi.

⁶ Po umuntu wesi yuyo amamatilana poka nu Kilisitu, atakwendelela pakunanga. Loli umuntu wesi yuyo akwendelela pakunanga, atamwenizyepo nalumolumo u Kilisitu pamo ukumumanya.

⁷ Mwee bana bane, patakabepo nayumo umuntu uwakubazimbula! Umuntu wesi yuyo akubomba chicho chigholosu wepe bulo mugholosu, ukuyana namumo u Kilisitu abeleye.

⁸ Umuntu wesi yuyo akwendelela pakubomba imbibi, mwana uwa Satana, pachifukwa ichakuti u Satana mubibi ukwandila ko kubwandilo. Pakuti u Mwana uwa Chala akiza umwakuti anangannye imbombo izya Satana yula.

⁹ Umuntu wesi yuyo mwana uwa Chala atakwendelela pakubomba imbibi, pakuti ubumi ubwa Chala buli mumwache, po atangendelela pakubomba imbibi pakuti u Chala we Wise.

¹⁰ Umu momumo Abana aba Chala na bana aba Satana balekaniye: Umuntu wesi yuyo atakubomba chicho chigholosu, pamo umuntu yuyo atamughanite umukamu wache, ate mwana uwa Chala.

Tughananaye

¹¹ Amazyu ghagho mukaghivwa ukwandila ko kubwandilo gho agha: Tughananaye.

¹² Tutakabe ngati we Kayini yuyo mwana uwa Mubibi, sona yuyo akamughogha umuzuna wache. Nkimba choni chicho akamughogha? Pachifukwa ichakuti ivintu vivyo akabombagha vikaba vibibi, loli ivintu vivyo umuzuna wache akabombagha vikaba vigholosu.

¹³ Po bakamu bane, mutakaswighaye nanti abantu aba muchisu ichapasi bakubabenga.

¹⁴ Tuzimenye ukuti twepamo mu bufwe, twikwinjila mubumi, pachifukwa ichakuti tubaghanite abakamu bitu. Umuntu wesi yuyo atakumughana umukamu wache achili ali mu bufwe.

¹⁵ Umuntu wesi yuyo amubengite umukamu wache, kokuti mughoghi, sona muzimenye ukuti umughoghi ate nubumi ubwa bwila na bwila.

¹⁶ Tulumenye ulughano ulwenecho namumo lubeleye pakuti u Kilisitu akabutagha ubumi bwache pachifukwa icha sweswe. Polelo naswe bulo tubaghiye pakwiyipa ubumi bwitu pachifukwa icha bakamu bitu.

¹⁷ Nanti umuntu yumo umukabi akumwennya umuntu uyunji yuyo mupina loli atakumupelela ichisa, nkimba umuntu yunuyu anganena bulibuli ukuti amughanite u Chala?

¹⁸ Mwee bana bane, ulughano lwitu lutakabanje lwa pa mulomo pene, awe. Loli lubanje lwanaloli, lulo lukwilanjizya lwene mumbombo.

¹⁹ Umu momumo tukwiza pakumanyila ukuti tuli pa bwanaloli, sona nukuti tukwiza pakwikalana pamaso pa Chala.

²⁰ Loli nanti umabyebye witu akutususya, kokuti tukuzimanya ukuti u Chala mukulu ukuchila umabyebye witu, sona avimenye vyosi.

²¹ Mwee bamanyani bane abaghaniwa, nanti umabyebye witu atakutususya, kokuti twe bajivu nkani pamaso pa Chala.

²² Polelo tukupokela chosi chicho tukumulaba pachifukwa ichakuti tukukonka amalamulo ghache nukubomba vivyo vikumuhobosya.

²³ Ili lyo lilamulo lyache: Tumusubilaye u Mwana wache u Yesu Kilisitu, sona tughananaye ukuyana namumo akatulamulilila.

²⁴ Umuntu yuyo akukonka amalamulo agha Chala, akwikala mukumamatilana poka nu Chala, sona wepe u Chala akwikala mukumamatilana poka nawe. Pachifukwa icha Muzimu Umuzelu yuyo u chala akatupa, tuzimenye ukuti u Chala akwikala mukumamatilana poka naswe.