1 Timoti 5 - IBAYIBOLO 2024

Nizya kubabombela abitiki abanji

¹ Utakamuchemelaye umuntu usongo, loli unenaye nawe ngati po we ghuso. Abalumendo wikalaye nabo ngati po bazuna bako.

² Abakolo abasongo wikalaye nabo ngati po banyoko, sona abalindu wikalaye nabo ngati po bayemba bako nu moyo ghosi umuzelu.

³ Ubachindikaye nukubavwa abakolo abafwilwe babo bate na bakamu bamo babo bangamusunga.

⁴ Loli nanti umukolo umufwilwe ali na bana, pamo abizukulu, banaba bo babo babaghiye pakumanyila tasi ukumunyila u Chala munyumba zyabo. Pakubomba bunubu bakwiza pakubanyokezya abapapi na basekulu babo, zizyo bakapokela kukwabo, pakuti ichi chikumuhobosya nkani u Chala.

⁵ Umukolo umufwilwe yuyo ali mwene bulo, sona ate nawe nayumo umuntu uwakumusunga, akubika ulusubilo lwache mwa Chala nukwendelela pakwiputa kwa Chala pamusanya na pabusiku nukumulaba ukuti amwavwe.

⁶ Loli umukolo umufwilwe yuyo akwihobosya mwene ni vintu ivya muchisu ichapasi, afuye kale, napapo mumi.

⁷ Ubape abantu indaghilo zinizi umwakuti batakabe ninongwa nayimoyimo.

⁸ Loli nanti umuntu wesi atakubavwa abakamu bache, nkaninkani abamunyumba yache, atagha ulwitiko lwache, sona we mubibi nkani nukuchila umuntu yuyo ate mwitiki.

⁹ Utakonjelezyepo nayumo umukolo umufwilwe pakabukatila aka bakolo abafwilwe, pene papo nanti achilite amaka 60. Abanje mukolo uwakuti akasendwa nu mwanavuli weka,

¹⁰ Abanje wakuti imbombo zyache nyiza. Abanje mukolo wakuti asungitepo akiza abana bache, apokelelagha akiza abayeni, yuyo akasukuzya inyayo izya bantu abazelu aba Chala, akubavwa abantu babo bali muntamyo, sona nukwiyipa mwene pakubomba zyosi imbombo inyiza.

¹¹ Loli utakabasimbaye abafwilwe abachilindu mukabukatila aka bafwilwe, pakuti nanti ubuntu bwabo ubwa mbibi bukwanda pakubatamya ukuti basendwe, bakuleghukako kwa Kilisitu.

¹² Polelo bakuba ninongwa pachifukwa ichakunanga ilayizyo lyabo ilyakwanda.

¹³ Abene bangamanyila pakuba bakata, umwakuti bakwendakwenda kunyumba iyi na yila. Vite vyo vinivi vyene, loli bakumanyila sona ukuyeba, na balumannye pakunena ivintu vivyo vitababaghiliye pakunena.

¹⁴ Polelo nalondagha ukuti ngali abafwilwe abachilindu basendiwe nukupapa abana nukusungilila akiza inyumba zyabo. Po abalwani bitu batakwiza pakulwaghilapo ulusako ulwakutunena ububibi.

¹⁵ Pakuti abakolo abafwilwe bamo bapaghukiye kale kwa Satana.

¹⁶ Loli nanti umukolo yuyo mwitiki ali na bakolo abafwilwe munyumba yache, abavwanje, umwakuti atakachipelelaye ichipanga intamyo iya kubavwilizya abakolo abafwilwe banaba, babo bafwililwe naloli.

¹⁷ Abasongo aba chipanga babo bakubomba akiza imbombo yabo bapokelaye umuvwalo uwakufikapo, nkaninkani babo imbombo yabo yakulumbilila nukumanyisya.

¹⁸ Pakuti Amasimbo ghakuti, “Mutakayipinyaye ing'ombe kumulomo, bo yikukoma amalezi” ghakunena sona ukuti, “Ababombi bapokelaye umuvwalo wabo.”

¹⁹ Utakateghelezyanje amazyu ghagho ghakususannya nu songo uwa chipanga, pene papo nanti pali abakaboni babili pamo batatu.

²⁰ Ubachemelaye pabuzelu abantu bosi babo bakubomba imbibi, ukuti abanji bosi banganyila.

²¹ Pantazi pa Chala, na pamaso pa Kilisitu u Yesu, sona na pamaso pa bantumi bosi abasaliwa, nkukulamula ukuti ukonkaye indaghilo zinizi nu bwanaloli, pamo ukwennya icheni icha muntu muvintu vyosi vivyo uli pakubomba.

²² Utakachimbililaye pakubika inyobe pa muntu, sona utakasendayepo ichigaba chimo pambibi izya bantu abanji. Wisungilile akiza wemwene.

²³ Utakang'welaye amizi ghene, loli ung'welayeko uvinyo panandi bulo pachifukwa icha ntamyo yiyo uli nayo mukasi, sona ni chifukwa icha kubinabina kwako.

²⁴ Imbibi izya bantu bamo zikubonekela pabuzelu bulo, sona ni mbibi zyabo zilongoleye kuntazi kukwabo pakubuka pabulongi. Loli imbibi izya bantu abanji zikumanyikwa pisinda pache.

²⁵ Umwakuyana bulo, imbombo inyiza zikubonekela pabuzelu bulo, loli nayimoyimo yiyo yitangafisiwa.