1 Timoti 4 - IBAYIBOLO 2024

Nizya bamanyisi abamyasi

¹ U Muzimu Umuzelu akunena umwakwivwika nkani ukuti mumasiku aghabumalilo abantu bamo bakwiza pakutagha ulwitiko lwabo. Abene bakwiza pakwivwila imizimu iya bumyasi nukukonka ivimanyisyo ivya imizimu imibibi.

² Ivimanyisyo vinivi ivya bantu abazimbuli, babo umabyebye wabo afuye ngati ochiwe ni chela ichipye.

³ Abantu banaba bakubakanizya abantu pakusendana, sona nukubalamula ukuti batakalyanje ivyakulya vimo. Loli u Chala akavipela ivyakulya vilavila ukuti vilyewanje na bantu babo bakusubila, sona bantu babo babumenye ubwanaloli, bo bapalizya kwa Chala.

⁴ Pakuti ichintu chosi chicho u Chala akachipela chiza, sona nachimochimo chibaghiye pakukaniwa, nanti chapokeleliwa nukupalizya kwa Chala,

⁵ pachifukwa ichakuti chikupaghuliwa na mazyu agha Chala nu lwiputo.

Nizya mubombi umwiza uwa Kilisitu u Yesu

⁶ Nanti ukubalingannya abakamu bako ivintu ivi, ukwiza pakuba we mubombi umwiza uwa Kilisitu u Yesu, uwakukulila mulwitiko na mubumanyisi ubwanaloli bubo wakonkagha.

⁷ Loli utuleghuke utupangwi utwamwalwe, tuto abakolo abaghosi bakupanga. Loli wiyizubizyanje wemwene pakuba nubumi ubwakumuchindika u Chala.

⁸ Ukwizubizya umubili kukumwavwa umuntu panandi, loli pakuba nubumi ubwakumuchindika u Chala kukumwavwa nkani umuntu muvintu vyosi, pakuti bukutupa aswe ilayizyo ilya bumi ubwilelo nubwa muntazi.

⁹ Agha gho mazyu ghanaloli, ghagho ghabaghiye pakwitikiziwa nukusubiliwa.

¹⁰ Ichi cho chifukwa tukwiyula nukubomba nkani imbombo, pakuti twabika ulusubilo lwitu mwa Chala umumi, yuyo Mupoki uwa bantu bosi, sona nkaninkani uwa bantu babo bakusubila.

¹¹ Ubalamulaye nukubamanyisya ivintu vinivi.

¹² Patakabepo umuntu uwakukusula pachifukwa ichakuti we mulumendo, loli ubanje we chifwanikizyo icha bitiki mukanenele, na munkalo, na mulughano, na mulwitiko, sona na mubumi ubwiza.

¹³ Ubikepo umoyo pakuchibelengela ichilundilo amazyu agha Chala, ukuchilumbilila nukuchimanyisya, mupaka nize.

¹⁴ Utakachisulaye ichabupi chako ichabuzimu chicho, ukapeghiwa ukwendela mu mazyu agha basongo, bo abasongo aba chipanga babika inyobe papako.

¹⁵ Wiyizubizyanje pakubomba ivintu vinivi nukwiyipa wemwene, umwakuti abantu bosi bennye ukuti ubumi bwako ubwabuzimu bukwendelela pakukula.

¹⁶ Wiyenelezye akiza wemwenecho nubumi bwako, sona ni chimanyisyo chako. Endelela pakubomba ivintu vinivi, pakuti pakubomba bunubu, u Chala akwiza pakukupoka, sona na bantu babo bakuteghelezya amazyu ghako.