1 Timoti 3 - IBAYIBOLO 2024

Abalongozi muchipanga

¹ Amazyu agha ghanaloli: Nanti umuntu ali nu moyo pakuba mulongozi uwa chipanga we akunyonywa imbombo inyiza nkani.

² Umulongozi uwa chipanga abanje ni nkalo inyiza, abanje nu muchi weka, atakakolwanje, abanje wakwilema nu mololo nu wamuchizi nu wakupokela abayeni, uwakumanya pakumanyisya.

³ Atakabe we ching'wela, pamo umuntu uwa lombwa, loli abanje mololo. Atakabe wavyongo, sona atakazighanaye indalama.

⁴ Amanyaghe pakulongozya akiza inyumba iyache ni yache nukwenelezya akiza ukuti abana bache bakumwivwila nu muchizi nkani.

⁵ Nanti umuntu atamenye pakulongozya akiza inyumba iyache ni yache, nkimba angasungilila bulibuli ichipanga icha Chala?

⁶ Atakabanje muntu yuyo apinduka nukuzileka imbibi lunulu bulo, pakunyila ukuti angituvya nukufundiwa ukuyana namumo u Satana akafundiliwa.

⁷ Abanje muntu yuyo akuchindikiwa na bantu kuzi ukwa chipanga, pakunyila ukuti angakoziwa isoni nukuwila muchipingo icha Satana.

Abavwilizi muchipanga

⁸ Umwakuyana bulo, bope abavwilizi muchipanga babanje ni nkalo inyiza, sona abasubiliwa. Batakang'welaye nkani uvinyo, pamo pakuba baghana ndalama.

⁹ Babulemelezyanje nkani ubwanaloli ubwibizu ubwa lwitiko nu mabyebye umwiza.

¹⁰ Bayeliwanje tasi, sona nanti bakwela, po bangaba babombi.

¹¹ Umwakuyana bulo, bope na bachi babo babanje ni nkalo inyiza, sona batakabanje ni yebo, awe. Batakakolwanje, sona babanje basubiliwa muvyosi.

¹² Umwavwilizi uwa chipanga abanje nu muchi weka. Abalelaye akiza abana bache nukusungilila akiza inyumba yache.

¹³ Pakuti abavwilizi babo babomba akiza imbombo zyabo bakwikabila ipangwi ilyiza, sona nukujimba pakunena nizya lwitiko lwabo mwa Kilisitu u Yesu.

Nizya busyefu ubukulu nkani

¹⁴ Bo nkukusimbila ukalata uyu, nkusubila ukuti nkwiza kunuko, lunulu.

¹⁵ Loli nanti nakaba, ukalata uyu akwiza pakukumanyisya mumo abantu babaghiye pakwikalilagha mu Nyumba iya Chala, yiyo chipanga icha Chala umumi, sona we mpanda nu lwalo ulwa bwanaloli.

¹⁶ Umwakusita ukwilamwa nakumokumo, ubusyefu ubwa chiputo chitu bukulu nkani: Umwene akaboneka nu mubili uwa buntu akasimikiziwa nu Muzimu Umuzelu pakuba mugholosu, na bantumi bulo aba kumwanya bakamwennya. Umwene akalumbililiwa pakasi pabantu aba inko zyosi. Po abantu bosi aba muchisu chosi ichapasi bakamusubila, sona akasendiwa pakubuka kumwanya nu buchindamu.