1 Timoti 1 - IBAYIBOLO 2024

Ukulamuka

¹ Ane ne Pabuli, umutumiwa uwa Kilisitu u Yesu ukuyana ni lamulo ilya Chala Umupoki witu, sona nilya Kilisitu u Yesu, yuyo lusubilo lwitu.

² Nkukusimbila awe Timoti we mwana wane umwenecho mulwitiko. Ichisa nu mutende ivya kwa Chala u Tata, sona nu Kilisitu u Yesu u Mwene witu vibanje nawe.

Akumusoka nizya vimanyisyo ivyabumyasi

³ Bo nkubuka ku Makedoniya, nkakulaba ukuti wikale mu Efeso. Mulamula muli abantu bamo babo bakumanyisya ivimanyisyo ivyabumyasi, po nkulonda ukuti awe ubakanizye.

⁴ Ubabuzye ukuti baleke pakubikapo umoyo patupangwi bulo, sona ni mbatiko izya matabwa agha banyenya. Ivi vikwandizya bulo ivyongo, sona vite ni mbombo nayimoyimo pambombo iya Chala, ukwendela mu lwitiko.

⁵ Loli ifundo iyakubapela indaghilo izi yakuti abitiki bosi babanje nu lughano, lulo lukufuma mumoyo umuzelu nu mabyebye umwiza, sona nu lwitiko ulwenecho.

⁶ Abantu bamo bapaghukiteko kuvintu vinivi, nukutagha akabalilo na mazyu aghamwalwe.

⁷ Bakulonda pakuba bamanyisi aba Ndaghilo loli batavimenye ivintu vivyo bakunena, pamo chicho bakulonda pakusimikizya.

⁸ Tuzimenye ukuti Indaghilo nyiza nanti zikubombeliwa ukuyana namumo zibaghiye pakubombeliwanga.

⁹ Tubaghiye twivwisye ukuti indaghilo zitakapinyiwa pachifukwa icha bantu abagholosu, awe. Loli pachifukwa icha bantu abananga ndaghilo, na basita kwivwila. Zikapinyiwa pachifukwa icha bantu babo batamumenye u Chala, sona na bantu abambibi; pachifukwa icha abantu ababibi, na babo bakumukana u Chala; abantu babo bakughogha abawise, pamo abanyina pamo, abaghoghi,

¹⁰ na bamalaya, na banavuli babo bakughonana benebene, na bakwiba abantu, na bamyasi, na bakaboni abamyasi, sona na bosi babo bakususannya ni chimanyisyo ichenecho.

¹¹ Ichimanyisyo ichenecho chikwaghiwa mu Mazyu Amiza, aghakunena nizya buchindamu ubwa Chala umusayiwa ghagho umwenecho akampa ukuti indumbilile.

U Pabuli akumupalizya u Chala pachifukwa icha chisa chache

¹² Nkumupalizya u Kilisitu u Yesu u Mwene witu, yuyo ampiye amaka pambombo iyi. Nkumupalizya pakumpima pakuba ne musubiliwa nukunsala ukuti imbombe imbombo yache,

¹³ napapo kale nkaba ne wamusamu nu muvwimi, sona nu wavyongo. Loli u Chala akampelela ichisa, pachifukwa ichakuti intakachimanya chicho nkabombagha, pakuti intakaba nu lwitiko.

¹⁴ U Mwene akampungulila ichisa ichikulu nkani nukumpa ulwitiko nu lughano vivyo tuli navyo pakumamatilana poka nu Kilisitu u Yesu.

¹⁵ Agha gho mazyu aghanaloli, ghagho ghabaghiye pakwitikiziwa nukusubiliwa: U Kilisitu u Yesu akiza muchisu ichapasi pakupoka abambibi. Po ane mumwabo nkaba ne mubibi ukuchilapo.

¹⁶ Loli u Chala akampelela ichisa, umwakuti ukwendela mumwane ne mubibi ukuchilapo, u Kilisitu u Yesu alanjizye ubufisalyoyo bwache, umwakuti ningaba ne chifwanikizyo pakubavwa abantu bosi babo bangasubila mumwache nukupokela ubumi ubwa bwila na bwila.

¹⁷ Ubuchindamu nu muchizi vipeghiwanje kwa Chala bwila na bwila. We Mwene uwa bwila na bwila, umusita kufwa, sona nu musita kuboneka, yuyo mwene we Chala. Ameni.

¹⁸ Wee mwana wane Timoti, nkukupa ilamulo ili ukuyana na mazyu ghagho abalaghuzi bakalaghula. Leka amazyu agha ghabanje vilwilo vyako ukuti ungalwa ubwite ubwiza.

¹⁹ Sungilila ulwitiko lwako nu mabyebye umwiza. Abantu bamo batakamwivwila umabyebye wabo, po ulwitiko lwabo lwananganika.

²⁰ Mu banaba alimo u Himenaya nu Alikizandala, abantu banaba nababika munyobe izya Satana ukuti bamanyililepo ukuleka pakumusamula u Chala.