1 Samuweli 9 - IBAYIBOLO 2024

U Samuweli akukomana nu Sabuli

¹ Pakabapo umu Benjamini yumo umumanyikwe nkani, yuyo akaba we Kishi, umwana uwa Abiyeli, umwizukulu uwa Zeloli, yuyo akaba mwana uwa Bekolati, umwana uwa Afiya umu Benjamini.

² U Kishi akaba nu mwana umulumendo yuyo akaba we Sabuli. U Sabuli akaba mulumendo uwakuboneka akiza nkani, umwakuti pakasi paba Izilayeli patakabapo nayumo yuyo akayana nawe, sona akaba muntu mutalipo ukubachila abanji bosi.

³ Isiku limo impunda zimo izya Kishi zikasobela. Po akamulamula umwana wache u Sabuli akati, “Sendapo uwambombo weka pakuzilondelezya impunda zizyo zisobelite.”

⁴ Akadumusannya muchisu icha mumaghamba icha Efulayimu, nicha Shalisha, loli batakazyagha. Po bakabuka mupaka muchigaba icha Shalimu, loli pope bulo impunda zila batakazyagha. Akadumusannya muchisu icha Benjamini, loli pope bulo batakazyagha.

⁵ Bo bafika muchigaba icha Zufi, u Sabuli akamubuzya uwambombo yuyo akaba nawe akati, “Twende tubwelaye, lumo utata angaleka pakuzipasikizya impunda, nukwanda pakutupasikizya.”

⁶ Loli uwambombo yula akamwamula akati, “Mukaya akakulu aka muli umuntu yumo uwa Chala umuchindikiwa nkani, pachifukwa ichakuti zyosi zizyo akunena zikukuba zyanaloli. Twende tubuke kulakula, lumo angatubuzya kuko tungazyagha impunda zila.”

⁷ U Sabuli akamulalusya uwambombo yula akati, “Nanti tungabuka kulakula, nkimba tungamusendela ichoni umuntu yunuyu?” Ichakulya chicho tukapaya mumasaka ghitu chamala. Aswe tute ni chabupi nachimochimo ichakuti tungamusendela umubombi uwa Chala yula. Nkimba tuli nacho chimo?

⁸ Uwambombo yula akamwamula akati, “Indi ni salabazya yoka iya siliva, po nkwiza pakumupa umubombi uwa Chala yula, ukuti atubuzye kuko tungazyagha impunda zila.”

⁹ Kale mu Izilayeli nanti umuntu akubuka pakubuzikizya kwa Chala, akatinji, “Twende kwa mwenelezyi,” pachifukwa ichakuti ilelo yuyo bakuti mulaghuzi kale bakatinji mwenelezyi.

¹⁰ Po u Sabuli akamubuzya uwambombo wache yula akati, “Wabomba akiza. Twende tubukaye.” Po bakabuka mukaya kako mukabamo umubombi uwa Chala yula.

¹¹ Bo bakukwela pighamba ukubuka mukaya kala, bakakomana na balindu bamo babo bakiza pakusemba amizi. Po bakabalalusya bakati, “Nkimba umwenelezi yula alipo?”

¹² Bakamula bakati, “Eee, alipo. Lubilo, ali kuntazi kukwinyu, afika bulo lunulu mukaya kitu, pachifukwa ichakuti ilelo abantu bakubika ichakwiyipa pabuzilo ubwapamwanya ubwakwiputilapo ivifwani.

¹³ Bo mwinjila bulo mukaya kala mukwiza pakumwagha, bo atabukite kubuzilo ubwakwiputilapo pakulya. Abantu batanganda pakulya nanti atafikite, pakuti weyuyo abaghiye pakuchisaya tasi ichakwiyipa chila. Pisinda pache abantu abakwitiziwa bala bakwanda pakulya. Losi ulu bukagha mukomane nawe.”

¹⁴ Bakinjila mukaya kala, nukumwennya u Samuweli akwiza kuntazi kukwabo, bo akubuka kubuzilo ubwakwiputilako.

¹⁵ Ulutazi bo u Sabuli atizite, u Mwene akamuvumbulila u Samuweli akati,

¹⁶ “Indabi pakabalilo ngati kanaka nkwiza pakumutuma umuntu uwa muchisu icha Benjamini. Umupakazye amafuta ukuti abanje we mwene uwa bantu bane aba Izilayeli. Akwiza pakubapoka abantu bane munyobe izya ba Filisiti. Naghennya amayimba agha bantu bane, sona nivwa ukulila kwabo.”

¹⁷ Bo Samuweli amwennya bulo u Sabuli, u Mwene akamubuzya akati, “Yunuyu muntu yuyo nkakubuzya ukuti akwiza pakubalaghila abantu bane.”

¹⁸ Po u Sabuli akapalamila kwa Samuweli, bo ali pamulyango uwa lupaso nukumulalusya ukuti, “Nkimba inyumba iya mwenelezyi yili ko kwiyi?”

¹⁹ U Samuweli akamwamula akati, “Umwenelezyi yula nene. Longolela kubuzilo ubwakwiputilako, pakuti ilelo ukwiza pakulya poka nane, sona pandabindabi nkwiza pakukubuzya zizyo wizila, po ukwiza pakubwela.

²⁰ Mutakapasyanje nizya mpunda zyinyu zizyo zikasobela ulutazi, pachifukwa ichakuti zyaghiwa. Nkimba wewenu yuyo aba Izilayeli bakumulonda nkani? Nkimba te wewe poka na bosi abamunyumba iya ghuso?”

²¹ U Sabuli akamula akati, “Loli ane ne mu Benjamini, lulo luko lunandi nkani pakasi pa inko zyosi izya Izilayeli. Po nkimba ukukumbusya bulibuli amazyu ghanagha?”

²² Po u Samuweli akamwinjizya u Sabuli nu wambombo wache yula muchipinda ichikulu nukubikazya pabuzilo ubwa muchizi kuntazi ukwa bantu abakwitiziwa, babo bosi poka bakabapo pipipipi 30.

²³ U Samuweli akamubuzya umupiyi yula akati, “Zagha ni chipuza chicho nkakupa, nkakubuzya ukuti uchibike palubazu.”

²⁴ Po umupiyi yula akasenda ichinama nukumupa u Sabuli. U Samuweli akati, “Inyama yiyo nkakusungila yo iyi. Lyanga, pakuti nkayibika palubazu ukulindilila akabalilo kanaka bo natinji, ‘Nabitizya abayeni.’ ” Po pisiku lilalila u Sabuli akalya poka nu Samuweli.

²⁵ Bo bikako kubuzilo ubwakwiputila bula, nukwinjila mukaya akakulu, u Samuweli akamuyanizizya u Sabuli apakughonapo muchipinda icha pamwanya icha nyumba yache.

U Samuweli akumupakazya u Sabuli

²⁶ Kubuche bakalalusya, po u Samuweli akamwitizya u Sabuli pachisonje pala nukumubuzya ukuti, “Nyamuka, nkusindikile.” Bo u Sabuli iyannya, bosi babili bakafuma kuzi.

²⁷ Bo bafika kubumalilo ubwa kaya kala, u Samuweli akamubuzya u Sabuli akati, “Umulamule uwambombo wako ukuti alongolele, loli awe usyalikile tasi, umwakuti nkubuzye amazyu aghakufuma kwa Chala.” Po uwambombo yula akalongolela.