1 Samuweli 8 - IBAYIBOLO 2024

Aba Izilayeli bakulonda pakuba nu mwene

¹ Bo u Samuweli aghosipa, akabasala abana bache pakuba balongi aba ba Izilayeli.

² Umwana wache ukatote akaba we Yoweli, sona uwabubili akaba we Abiya. Abana bache bosi banaba bakaba balongi mukaya aka Belisheba.

³ Loli abana banaba batakasendelako inkalo inyiza iya wise, umwakuti bakabombelagha bulo zyo ndalama. Bakanda pakupokela amabeko nukulonga inongwa umwakunyongannya ubwanaloli.

⁴ Po abasongo bosi aba ba Izilayeli bakabungana poka nukwiza kwa Samuweli mu Lama.

⁵ Bakamubuzya bakati, “Ennya waghosipa, sona abana bako bate ni nkalo ngati yako. Losi ulu utusalile u mwene uwakuti atulaghilaye ngati mumo inko izinji zibeleye.”

⁶ Loli bo banena amazyu aghakuti, “Utusalile u mwene uwakuti atulaghilaye.” Amazyu ghalaghala ghatakamuhobosya u Samuweli. Po u Samuweli akiputa kwa Mwene.

⁷ U Mwene akamwamula akati, “Bomba bulo zyosi zizyo abantu banaba bakulonda. Abantu banaba batakukukana awe, loli bakunkana ane ukuti imbanje ne mwene wabo.

⁸ Ukwandila pisiku lilyo nkabefyamo mu Ijiputi mupaka nilelo, bakunkana, sona bakubabombela abachala abanji. Po ilelo bakukubombela bulo bulabula.

⁹ Losi ulu bomba bulo zyosi zizyo abantu banaba bakulonda. Loli ubasoke nkani, sona ubabuzye inkalo yosi iya mwene yuyo bakumulonda yikwiza pakubela.”

¹⁰ Po u Samuweli akababuzya abantu babo bakamulondagha u mwene yula, amazyu ghosi agha Mwene.

¹¹ U Samuweli akati, “Izi zyo zizyo u mwene yuyo mukumulonda akwiza pakubombagha. Akwiza pakubafyenga abana binyu abalumendo pakulwa ubwite, abanji bakwiza pakuba bakwendezya ingolo izya bwite, bamo abakukwela impunda zyache, sona abanji abakuchimbila pantazi pangolo zyache zila.

¹² Bamo bakwiza pakuba basongo aba basilikali 1,000, abanji pakuba basongo aba basilikali 50, abamwabo bakwiza pakuba balimi, abanji bakwiza pakuba binuli mumaghunda ghache. Bamo bakwiza pakuba bakusyana ivilwilo ivya bwite, sona ni vyela ivya ngolo zyache.

¹³ Akwiza pakubapela abana binyu abalindu pakuba bakwenga amafuta aghakununkila, na bakumupiyila, sona na bakupiya ivibama.

¹⁴ Akwiza pakubafyula amaghunda ghinyu amiza nkani, nagha mampesya, sona nagha misyunguti nukughapa amakambala ghache.

¹⁵ Akwiza pakusendapo ichigaba choka pa vigaba 10 ivya malezi ghinyu, sona ni vya mampesya ghinyu nukubapavyo amakambala ghache na bakapitawa bache.

¹⁶ Akwiza pakubafyula abambombo binyu abanavuli na bakolo bulo, sona ni ng'ombe zyinyu inyine poka ni mpunda zyinyu pakuzibombezya imbombo zyache.

¹⁷ Akwiza pakusendapo ichigaba choka pavigaba 10 ivya ng'ozi zyinyu, sona amwe mukwiza pakuba mwe bazya bache.

¹⁸ Bo akabalilo kalakala kakwana, mukwiza pakumulilila u mwene yuyo mwisalila mwebene ukuti abavwe, po u Mwene atakwiza pakubamula.”

¹⁹ Loli abantu batakamwivwila u Samuweli. Po bakati, “Awe, tukulonda u mwene uwakuti atulaghilaye.

²⁰ Po tukwiza pakuyana bulo ninko izinji zizyo zili nu mwene. Tukulonda u mwene uwakutulaghila, sona nu wakutulongolela kubwite.”

²¹ Bo u Samuweli ivwa amazyu ghosi agha bantu bala akabuka pakumubuzya u Mwene.

²² U Mwene akamwamula u Samuweli akati, “Bomba bulo zyosi zizyo abantu bakulonda, ubape u mwene.” Po u Samuweli akababuzya aba Izilayeli akati, “Mwebosi bwelagha kukaya.”