1 Samuweli 7 - IBAYIBOLO 2024

¹ Po abantu aba mu Kiliyati Yeyalimu bakiza nukulinyamula Ibokosi ilya Lufingo ilya Mwene, sona bakabuka nalyo kunyumba iya Abinadabu, yiyo yikaba pighamba. Bakamupaghula umwana wache u Eleyazala ukuti abanje we wakulyenelezya Ibokosi ilya Lufingo ilya Mwene lila.

U Samuweli akubalongozya aba Izilayeli

² Ibokosi ilya Lufingo ilya Mwene likikala mu Kiliyati Yeyalimu pipipipi amaka 20. Pakabalilo kosi kanaka aba Izilayeli bakamulililagha u Mwene ukuti abavwe.

³ U Samuweli akababuzya aba Izilayeli bosi akati, “Nanti mukulonda pakunyokela kwa Mwene nu moyo winyu ghosi, mubefye abachala abayeni, ni vifwani ivya Ashitoleti. Mumubombelaye u Mwene nu moyo winyu ghosi, po akwiza pakubapoka munyobe izya ba Filisiti.”

⁴ Aba Izilayeli bakabefya aba Baala ni vifwani ivya Ashitoleti, nukwanda pakumubombela u Mwene.

⁵ Po u Samuweli akati, “Babungannye poka aba Izilayeli bosi mu Mizipa, ane nkwiza pakubiputila kwa Mwene.”

⁶ Bo aba Izilayeli babungana mu Mizipa, bakasemba amizi ghamo nukughakupulila pamaso pa Mwene. Pisiku lilalila aba Izilayeli bakatuzya pakulya, nukwilata imbibi zyabo ukuti, “Twamunangila u Mwene.” U Samuweli akaba mulongi uwa ba Izilayeli mu Mizipa.

⁷ Bo aba Filisiti bivwa ukuti aba Izilayeli babungana mu Mizipa, abalongozi fayivi aba ba Filisiti bakiza pakulwa nabo ubwite. Aba Izilayeli bakivwa zinizi, po bakabanyila nkani aba Filisiti bala.

⁸ Bakamubuzya u Samuweli bakati, “Utakalitaye pakutulilila kwa Mwene u Chala witu, umwakuti atupoke munyobe izya ba Filisiti bala.”

⁹ U Samuweli akasenda umwana uwa ng'ozi, yuyo akonkagha nukumubika ukuti chibanje chakwiyipa ichakocha kwa Mwene. Akamulilila u Mwene mubuzilo ubwa ba Izilayeli, po u Mwene akamwamula.

¹⁰ Bo u Samuweli akubika ichakwiyipa ichakocha chila, aba Filisiti bakiza pakulwa ubwite naba Izilayeli. Loli pisiku lilalila u Mwene akabajilimizizya aba Filisiti bala ngati vula, po bakavulungana nkani, umwakuti aba Izilayeli bakabapota.

¹¹ Aba Izilayeli bakepamo mu Mizipa pakubachimbizya aba Filisiti bala mupaka ku Beti Kali, sona bakabaghogha zila yosi.

¹² Po u Samuweli akimika ibwe pakasi pa kaya akakulu aka Mizipa naka Sheni. Akalyita ibwe lila ukuti Ebenezeli nukuti, “U Mwene atwavwa mupaka pakabalilo aka.”

¹³ Aba Izilayeli bakabapota aba Filisiti, umwakuti aba Filisiti bala batakapyanila sona muchisu icha Izilayeli. U Mwene akalwanga naba Filisiti pakabalilo kosi aka bumi ubwa Samuweli.

¹⁴ Utwaya tosi utukulu nkani utwa ba Izilayeli ukwandila ku Ekiloni mupaka ku Gati, tuto aba Filisiti bakatufyula, bakabanyosezya abenecho aba Izilayeli. Pisinda pache pakasi paba Izilayeli naba Kenani pakabapo umutende.

¹⁵ U Samuweli akaba mulongi uwa ba Izilayeli mubumi bwache bosi.

¹⁶ Umwaka nu mwaka akakendelagha akaya akakulu nkani aka Beteli naka Giligali, sona naka Mizipa, sona akalongagha inongwa izya bantu mutwaya tosi tunutu.

¹⁷ Loli akabalilo kosi akabwelagha ku Lama kukaya kache. Kulakula kope akabalongagha aba Izilayeli, sona ko kuko akamuzengela ichighemo u Mwene.