1 Samuweli 5 - IBAYIBOLO 2024

Ibokosi ilya Lufingo ilya Chala muchisu icha ba Filisiti

¹ Bo aba Filisiti balifyula Ibokosi ilya Lufingo ilya Chala, bakafuma nalyo ku Ebenezeli nukubuka nalyo ku Ashidodi.

² Po bakalyinjizya munyumba iya Dagoni, uchala wabo nukulibika papipi ni chifwani icha Dagoni.

³ Bo abantu aba mu Ashidodi balamusya pandabindabi, bakachennya ichifwani icha Dagoni chighuye ubukupama pantazi pi Bokosi ilya Lufingo ilya Mwene. Po abantu bakachimika pabuzilo bwache.

⁴ Loli indabi yache pandabindabi, bo balamusya bakagha ichifwani chila chighuye sona ubukupama pantazi pi Bokosi ilya Lufingo ilya Mwene. Pakabalilo kanaka umutu ni nyobe zyache vikadumuka nukuwila pamulyango. Ichimubili chache chene cho chicho chikasyalikila.

⁵ Ichi cho chifukwa mupaka nilelo bulo abaputi aba Dagoni, na bantu bosi babo bakwinjilamo batakukanyapo pamulyango uwa nyumba iya Dagoni mu Ashidodi.

⁶ U Mwene akabafunda nkani abantu aba mu Ashidodi, poka na bapalamani babo ni vitufya.

⁷ Bo abantu bala bennya namumo ivintu vikabela bakati, “Tutakulilonda sona Ibokosi ilya Lufingo ilya Chala uwa ba Izilayeli kuno, pachifukwa ichakuti atufunda nkani, aswe poka nu chala witu u Dagoni.”

⁸ Po bakabitizya abalongozi bosi aba ba Filisiti nukubalalusya ukuti, “Nkimba tubombe ichoni ni Bokosi ilya Lufingo ilya Chala uwa ba Izilayeli?” Abantu bala bakamula bakati, “Ibokosi ili tubuke nalyo ku Gati.” Po bakabatuma abantu ukuti babuke ni Bokosi ilya Lufingo ilya Chala ku Gati kula.

⁹ Loli bo bafika nalyo mu Gati, u Mwene akakafunda akaya akakulu nkani kala pakubayivya abantu ni vitufya, abanandi na basongo bulo, sona mukaba ukuvulungana ukukulu nkani.

¹⁰ Po bakabatuma abantu ukuti babuke ni Bokosi lila ku Ekiloni, akaya akanji aka ba Filisiti. Loli bo lyafika kula, abantu bakakolomoka bakati, “Bizite kuno ni Bokosi ilya Lufingo ilya Chala uwa Izilayeli pakutughogha, aswe poka na bantu bitu!”

¹¹ Po bakabitizya abalongozi bosi aba ba Filisiti nukubabuzya ukuti, “Efya Ibokosi ilya Lufingo ilya Chala uwa Izilayeli, umwakuti litakatughoghe, aswe poka na bantu bitu.” Pakuti mukaya kosi akakulu nkani mula mukabamo ukuvulungana ukukulu nkani pachifukwa icha bufwe. U Chala akabafunda nkani abantu bala.

¹² Abantu babo bakapona, bakayiviwa nkani ni vitufya, po ukulila ukwa bantu aba mukaya akakulu nkani kala kukafika kumwanya.