1 Samuweli 4 - IBAYIBOLO 2024

Aba Filisiti bakulifyula Ibokosi ilya Lufingo

¹ Isiku limo aba Izilayeli bakabuka pakulwa ubwite naba Filisiti. Aba Izilayeli bala bakazenga ivisakasa vyabo mu Ebenezeli, sona aba Filisiti bakazenga ivisakasa vyabo mu Afeki.

² Aba Filisiti bakababambika abasilikali babo ukuti balwe ubwite naba Izilayeli, po bakanda pakulwa. Bo bakulwa ubwite, aba Filisiti bakabapota aba Izilayeli nukubaghogha abantu 4,000.

³ Bo abasilikali banyokela kuvisakasa vyabo, abalongozi aba Izilayeli bakalalusya bakati, “Nkimba choni chicho u Mwene atubika munyobe izya ba Filisiti? Twende tulisende Ibokosi ilya Lufingo ulwa Mwene mu Shilo, umwakuti u Mwene ize pakasi papitu nukutupoka munyobe izya balwani bitu.”

⁴ Po abantu bakatuma intumi ku Shilo ukuti basende Ibokosi ilya Lufingo ilya Mwene Uwamaka Ghosi, yuyo akwikala pakasi pa bakelubi. Abana babili aba Eli nu Hofini sona nu Finehasi bakaba kulakula poka ni Bokosi ilya Lufingo ilya Chala lila.

⁵ Bo Ibokosi ilya Lufingo ilya Mwene biza nalyo muvisakasa, aba Izilayeli bosi bakakolomoka nkani umwakuti ichisu chikaneng'ena.

⁶ Aba Filisiti bakivwa ichongo chila, po bakalalusya bakati, “Nkimba ichongo chosi chinichi muvisakasa ivya ba Hebeli cha choni?” Bo aba Filisiti bivwa ukuti Ibokosi ilya Lufingo ilya Mwene lyafika muvisakasa ivya ba Izilayeli,

⁷ aba Filisiti bakanyila nkani. Po bakati, “Abachala bizite muvisakasa ivya ba Izilayeli. Tuli muntamyo! Ichintu ngati chinichi chitabonekitepo nalumo!

⁸ Twaghuniwa! Nkimba wewenu yuyo angatupoka munyobe izya bachala abamaka banaba? Banaba bo bachala babo bakabaghogha aba Ijiputi ni viwaya ivyakulekanalekana munkolongo mula!

⁹ Mwee ba Filisiti, jimba umoyo! Mubanje mwe banavuli, lumo mukwiza pakuba pasi pabulaghili ubwa ba Hebeli, ngati mumo bakabela pasi papinyu. Mubanje mwe banavuli, sona mulwanje ubwite!”

¹⁰ Po aba Filisiti bakalwa ubwite nukubapota aba Izilayeli bosi, sona umuntu wesi akachimbilila ku chisakasa chache. Abantu abinji bakaghoghiwa kubwite, umwakuti abasilikali 30,000 aba ba Izilayeli abakwenda pasi bakafwa.

¹¹ Ibokosi ilya Lufingo ilya Chala likafyuliwa, sona abana babili aba Eli, u Hofini nu Finehasi bakaghoghiwa.

Ubufwe ubwa Eli

¹² Pisiku lilalila umu Benjamini yumo akachimbila kubwite nukufika ku Shilo, bo azepuye amenda ghache, sona akikupulila ulufumbi pamutu pachifukwa icha chitima.

¹³ Bo afika akamwagha u Eli ikaye pachitengo mulubazu mumusebo, bo amaso ghali kuzila, pakuti umoyo wache ghukapasikizya Ibokosi ilya Lufingo ilya Chala lila. Bo umuntu yula injila mukaya kala nukwanda pakubapangila abantu zizyo zikabombiwa kubwite, abantu bosi mukaya kala bakalila nkani.

¹⁴ U Eli akivwa ukulila ukwa bantu mukaya mula. Po akalalusya akati, “Nkimba ukulila kunuku kukung'anamula choni?” Umuntu yula akachimbilila kwa Eli,

¹⁵ yuyo akaba na maka 98, umwakuti amaso ghache ghatakennyanga.

¹⁶ Umuntu yula akamubuzya u Eli akati, “Nafuma kubwite, umwakuti natoloka bulo umusanya ughu.” U Eli akamulalusya akati, “Wee mwana wane, kwawachi?”

¹⁷ Umuntu yula akamwamula akati, “Aba Izilayeli babachimbiye aba Filisiti, sona abasilikali abinji nkani baghoghiwa. Abana bako babili bala, u Hofini nu Finehasi baghoghiwa, sona lyope ni Bokosi ilya Lufingo ilya Chala lyafyuliwa.”

¹⁸ Bo umuntu yula atambula Ibokosi ilya Lufingo ilya Chala lila, u Eli akawila ichakwisinda pachitengo chache papipi nu mulyango uwa lupaso. Akapyoka isingo nukufwa, pachifukwa ichakuti akaba mughosi, sona akang'wama nkani. U Eli akaba mulongi uwa ba Izilayeli amaka 40.

Nizya bufwe ubwa muchi uwa Finehasi

¹⁹ Umulasagha uwa Eli, yuyo akaba muchi uwa Finehasi akaba pabung'wamu, sona akaba papipi pakusayiwa. Bo ivwa ukuti Ibokosi ilya Lufingo ilya Chala lyafyuliwa, sona nukuti u Eli uwisevyala, poka nu mulume wache bafuye, akabalilo akakusayiwa kakamufikila, po akapapa umwana.

²⁰ Bo umukolo yula akufuta ilyabumalilo, umuzamba akamubuzya akati, “Jimba umoyo, wapapa umwana umulumendo.” Loli atakamulako nachimochimo, sona atakabikilako umoyo.

²¹ Akamwita umwana yula ukuti we Ikabodi kokuti, “Ubuchindamu ubwa Chala bwepapo pakasi paba Izilayeli!” Akanena bunubu pachifukwa icha kufyuliwa ukwa Ibokosi ilya Lufingo ilya Chala, sona nu bufwe ubwa wisevyala u Eli nu mulume wache.

²² Akati, “Ubuchindamu bwepapo pakasi paba Izilayeli pakuti Ibokosi ilya Lufingo ilya Chala lyafyuliwa.”