1 Samuweli 31 - IBAYIBOLO 2024

Ubufwe ubwa Sabuli na bana bache

¹ Pakabalilo kalakala aba Filisiti bakalwa ubwite naba Izilayeli. Aba Izilayeli bala bakabachimbila aba Filisiti, sona abinji nkani bakaghoghiwa pighamba ilya Gilibowa.

² Aba Filisiti bala bakamuchimbizya u Sabuli poka na bana bache, po bakamughogha u Yonatani nu Abinadabu, sona nu Malikishuwa.

³ Ubwite bula bukaba bwakoghofya nkani umwakuti bakamwavwanila u Sabuli. Bo abantu ababwele bamwagha bakamuvulazya nkani nu tulasilo.

⁴ U Sabuli akamubuzya umulumendo uwakumunyamulila ivilwilo akati, “Weya wee, wesa upanga wako, undase, lumo abantu abasita kusilimuliwa banganseka nukungogha.” Umulumendo yula akanyila nkani, umwakuti akakana pakumulasa. Loli u Sabuli akasenda impalala yache nukwisumbapo.

⁵ Bo umulumendo yula ennya ukuti u Sabuli afuye, wepe akisumbila pa panga wache nukufwila poka nu Sabuli.

⁶ Po u Sabuli na bana bache batatu poka nu mulumendo uwakunyamula ivilwilo, sona na bantu bache bosi bakafwa pisiku lilalila.

⁷ Bo aba Izilayeli babo bakaba mwikombe, na babo bakaba kwisila ilya lusoko ulwa Yolodani bennya ukuti u Sabuli poka na bana bache bafuye, bakatuleka utwaya twabo nukuchimbila. Po aba Filisiti bakiza nukwikala mulamula.

⁸ Indabi yache bo aba Filisiti biza pakuyivula amenda imivimba iya bantu babo bakaghoghiwa, bakamwagha u Sabuli poka na bana bache batatu bala bafuye pighamba ilya Gilibowa.

⁹ Bakamudumula u Sabuli umutu nukumuvula ivilwilo vyache ivya bwite. Po bakatuma intumi muchisu chosi icha ba Filisiti ukuti bafumusye ipangwi ilyiza ili ku bachala babo, sona na pakasi pabantu babo.

¹⁰ Bakavibika ivilwilo ivya Sabuli munyumba iyakumwiputilamo u Ashitoleti, sona bakaghukomela umuvimba wache kulubumba ulwa lupaso ulwa kaya akakulu nkani aka Beti Shani.

¹¹ Bo abantu aba mu Yabeshi Giliyadi bivwa zizyo aba Filisiti bakamubombela u Sabuli,

¹² abanavuli bosi abajivu nkani bakenda busiku bosi pakubuka ku Beti Shani. Bakawefyapo umuvimba uwa Sabuli poka niya bana bache batatu bala palubumba pala. Po bakabuka nayo ku Yabeshi nukuyocha kulakula.

¹³ Pisinda pache bakaghasenda amafupa ghabo nukughasyila muntende mwikwi ilya mupandapanda mu Yabeshi, po bakatuzya pakulya amasiku seveni.