1 Samuweli 30 - IBAYIBOLO 2024

U Devedi ali pakulwa ubwite naba Amaleki

¹ Bo ghachilapo amasiku mabili, u Devedi poka na bantu bache bakafika mu Zikilagi. Pakabalilo kalakala aba Amaleki bakakanangannya akaya aka Negebu naka Zikilagi nukukocha.

² Bakabalema abakolo na bantu bosi babo bakaba mulamula, abanandi na basongo bulo pakuba bazya. Batakamughoghapo nayumoyumo umuntu, loli bakabasenda bulo bumi nukubuka nabo.

³ Bo u Devedi poka na bantu bache bafika mu Zikilagi, bakagha ukuti akaya kala kapiye numoto, sona abachi babo na bana bakalemiwa pakuba bazya.

⁴ Po u Devedi na bantu bache bakakalila nkani mupaka batakaba sona na maka aghakulilila.

⁵ Abachi babili aba Devedi, u Ahinowamu uwamu Yezileli nu Abigelo, umukolo umufwilwe uwa Nabali uwamu Kalimeli bope bakalemiwa pakuba bazya.

⁶ U Devedi akaba muntamyo inkulu nkani, pakuti chikabababa nkani abantu bache pachifukwa icha bana na bachi babo umwakuti bakalondagha pakumusumba na mabwe. Loli u Mwene, u Chala wache akamukazya.

⁷ U Devedi akamubuzya umuputi u Abiyatala, umwana uwa Ahimeleki akati, “Mpanga u efodi.” Po u Abiyatala akamupa.

⁸ U Devedi akamubuzikizya u Mwene akati, “Nkimba ningakakonka akabukatila aka mavyondongo? Nkimba nkwiza pakubagha nukubapoka abantu babo babalemite?” U Mwene akamwamula akati, “Bakonke, ukwiza pakubagha, sona ukwiza pakubapoka abantu babo babalemite.”

⁹ Po u Devedi poka na bantu bache 600 bala bakanyamuka. Bo bafika palusoko ulwa Besoli, bamo bakasyalikila palapala,

¹⁰ pachifukwa ichakuti abantu 200 bakalita nkani umwakuti bakapotwa pakuloboka ulusoko lula. Loli u Devedi na bantu 400 bakabakonka abantu bala.

¹¹ Abantu babo bakaba poka nu Devedi bakamwagha umu Ijiputi yumo mumughunda, po bakiza nawe kwa Devedi. Bakamupa ichibama ukuti alye, nukumupa amizi ukuti ang'wele.

¹² Bakamupa ivitumbuwa ivya makuyu, sona ni vitumbuwa ivya mampesya amumizu. Bo alya, amaka ghakanyokelamo pakuti akikala amasiku matatu umusanya nu busiku, ukusita ukulyapo ichakulya pamo ukung'wela amizi.

¹³ U Devedi akamulalusya akati, “Nkimba u mwene wako wewenu, sona wafuma kwiyi?” Umuntu yula akamwamula akati, “Ane ne mu Ijiputi, umuzya uwa umu Amaleki yumo. U mwene wane akandeka kwisinda amasiku matatu ghagho ghachilagha pachifukwa ichakuti nkaba ne mubine.

¹⁴ Tukalwanga ubwite muchigaba chimo kuntende ukwa Yuda, muchisu icha ba Keleti, sona na muchigaba icha ba Kalebu. Tukocha akaya akakulu aka Zikilagi.”

¹⁵ U Devedi akamulalusya akati, “Nkimba ungandangizyako kuko kuli akabukatila aka mavyondongo ghanagha?” Umuntu yula akamwamula akati, “Lapa pamaso pa Chala ukuti utakwiza pakungogha pamo ukumbika munyobe izya mwene wane, po nkwiza pakukulanjizya kuko kuli abantu banaba.”

¹⁶ Bo afika nawe kulakula, akaghagha amavyondongo ghala ghasatite posi na posi bakulya nukung'wela, sona nukwimba, pachifukwa icha vintu ivyinji vivyo bakavifyula muchisu icha ba Filisiti nicha ba Yuda.

¹⁷ U Devedi na bantu bache bakalwa nabo ukwanda kubuche mupaka pachamabwila mupaka indabi yache. Patakabapo nayumoyumo umuntu uwakupona, loli bene abantu 400 bala, babo bakakwela pangamila nukuchimbila.

¹⁸ U Devedi akavifyula ivintu vyosi vivyo aba Amaleki bakasenda, poka na bachi bache babili bala.

¹⁹ Chitakabapo nachimochimo ichintu chicho chikasobelapo. Abana abanandi pamo abasongo, abalumendo pamo abalindu, pamo ivintu vyosi vivyo u Devedi bakavifyula bakiza navyo.

²⁰ U Devedi wepe akafyula ing'ozi ni ng'ombe zyosi, abantu bache bakazisokolela kuntazi ukwa vitekwa ivyamwabo, po bakatinji, “Ivi vintu vya Devedi.”

²¹ Po u Devedi akafika kuko kukaba abantu 200 bala, babo bakalita nkani umwakuti bakapotwa pakumukonka, sona babo bakasyalikila palusoko ulwa Besoli. Abantu bala bakiza pakukomana nu Devedi poka na bantu babo akaba nabo. U Devedi akabalamuka abantu bala, bo afika papipi nabo.

²² Abantu bamo ababibi sona na bapela ntamyo babo bakabuka poka nu Devedi bakati, “Pachifukwa ichakuti abantu banaba batakabuka poka naswe, tutakwiza pakugabana nabo ivintu vivyo tukafyula. Loli umwanavuli wesi angamusenda umuchi wache poka na bana bache nukubuka.”

²³ U Devedi akabamula akati, “Mwe bakamu bane, mutakabombaye bunubu ni vintu vivyo u Mwene atupa. U Mwene atuzighilila akiza, sona akababika munyobe zyitu abasilikali, babo bakiza pakulwa naswe ubwite.

²⁴ Nkimba wewenu yuyo angivwana ni fundo yiniyi? Pakuti abantu babo bakasungililagha ukatundu bapokelaye umwakuyana bulo na bantu babo bakabuka pakulwa ubwite.”

²⁵ Ukwandila pisiku lilalila u Devedi akalamula ukuti ifundo yiniyi yibanje lulaghilo pakasi paba Izilayeli mupaka nilelo bulo.

²⁶ Bo u Devedi afika mu Zikilagi, akabatumila abasongo aba ba Yuda, babo bakaba bamanyani bache ivintu vimo vivyo akavifyula nukuti, “Nabatumila ichabupi icha vintu vivyo tukabafyula abalwani aba Mwene.”

²⁷ Akabatumila ivyabupi vila abantu aba mu Beteli naba mu Lama kuntende kuchisu icha Yuda naba mu Yatili

²⁸ naba mu Aloyeli naba mu Sifumoti naba mu Eshitemowa

²⁹ naba mu Lakali mutwaya utukulu nkani utwa ba Yelamiyeli naba mu Keni

³⁰ naba mu Holima naba mu Bolashani naba mu Ataki

³¹ naba mu Hebuloni sona na bosi aba mutwaya utukulu nkani tuto u Devedi na bantu bache bakendaghako.