1 Samuweli 3 - IBAYIBOLO 2024

U Mwene akumwitizya u Samuweli

¹ Umulumendo u Samuweli akamubombelagha u Mwene umwakulongoziwa nu Eli. Po mumasiku ghalaghala amazyu agha Mwene ghatakivwikagha pipipipi, sona ivisetuka vitakaboneka kabilikabili.

² Amaso agha Eli ghakennyanga akafobela, umwakuti atakennyanga pabutali nkani. Po ubusiku bumo u Eli akalambalalagha muchipinda chache.

³ U Samuweli wepe akalambalalagha mu Nyumba iya Mwene, mumo mukabamo Ibokosi ilya Lufingo. Pakabalilo kalakala inyale iya Chala yikaba yichili yikwaka.

⁴ Po u Mwene akamwitizya u Samuweli akati, “Samuweli! Samuweli!” U Samuweli akamula akati, “Nafika.”

⁵ Akachimbilila kwa Eli nukuti, “Nafika, wanyitizyanga.” Loli u Eli akamwamula akati, “Intakwitizizyepo, nyokela kalambalalaye.” Po akanyokela pakulambalala.

⁶ U Mwene akamwitizya sona akati, “Samuweli!” Panapo na panapo u Samuweli akanyamuka nukubuka kwa Eli. Akamubuzya akati, “Nafika, wanyitizyanga.” U Eli akati, “Wee mwana wane, ntakwitizizyepo, nyokela kalambalalaye.”

⁷ Pakabalilo kalakala u Samuweli akaba achili atamumenye u Mwene, sona nukuti u Mwene akaba achili atanenite nawe.

⁸ U Mwene akamwitizya sona u Samuweli akabutatu. Po u Samuweli akanyamuka sona nukubuka kwa Eli nukuti, “Nafika, wanyitizyanga.” U Eli akazyaghannya ukuti akaba we Mwene yuyo akamwitizyanga umulumendo yula.

⁹ Po u Eli akamubuzya u Samuweli akati, “Buka kaghonaye, nanti akukwitizya sona uti, ‘Nena Mwene, pakuti ne mubombi wako nkwivwa.’ ” U Samuweli akanyokela pakulambalala.

¹⁰ U Mwene akiza nukwimilila palapala. Po akitizya sona ngati mumo akitizizyanga pakwanda ukuti, “Samuweli! Samuweli!” U Samuweli akamula akati, “Nena pakuti ne mubombi wako nkwivwa.”

¹¹ Po u Mwene akamubuzya u Samuweli akati, “Ennya indi papipi pakubomba ichintu chimo ichakoghofya nkani mu Izilayeli, chicho chikwiza pakumutengula umuntu wesi yuyo akuchivwa.

¹² Pakabalilo kalakala nkwiza pakuzibomba zyosi zizyo nkanena nizya Eli na bamunyumba yache, ukwandila pabwandilo mupaka pabumalilo.

¹³ Pakuti nkamubuzya u Eli ukuti nkwiza pakubalonga abamunyumba yache bwila na bwila pachifukwa icha mbibi yiyo akayimanya kale. Abana bache bakinyazya bene, loli u Eli atakabakanizya.

¹⁴ Ichi cho chifukwa nkalapa nkati, ‘Imbibi iya bamunyumba iya Eli yitakwiza pakuhobokeliwapo nalumo, manyi pakubika ichakwiyipa ichakupepesezya pamo ivyabupi.’ ”

¹⁵ U Samuweli akalambalala mupaka pandabindabi, nukwighula inyiyi izya Nyumba iya Mwene. U Samuweli akanyilagha nkani ukuti amubuzye u Eli ichisetuka chache.

¹⁶ Loli u Eli akamwitizya akati, “Samuweli, mwana wane!” U Samuweli akitika akati, “Nafika!”

¹⁷ U Eli akamulalusya u Samuweli akati, “Nkimba u Mwene akakubuzya choni? Utakanvinde nachimochimo, u Chala akwiza pakukufunda nkani nanti ukunfisa zyosi zizyo akakubuzya.”

¹⁸ Po u Samuweli akamubuzya zyosi ukusita kumuvinda ichintu nachimochimo. Po Eli akati, “Uyu we Mwene muleke abombaye chosi chicho chikumuhobosya.”

¹⁹ U Samuweli akakulagha, sona u Mwene akaba nawe, umwakuti zyosi zizyo u Samuweli akanenagha zikakwanilisiwanga.

²⁰ Po aba Izilayeli bosi ukwandila muchisu icha Dani mupaka muchisu icha Belisheba bakazyaghannya ukuti u Samuweli akaba mulaghuzi umusubiliwa uwa Mwene.

²¹ U Mwene akivumbula mwene mu Shilo, sona kulakula akamubonekela u Samuweli nukunena nawe. Bo u Samuweli anena bulo amazyu ghache, aba Izilayeli bosi bakamuteghelezya.