1 Samuweli 29 - IBAYIBOLO 2024

Aba Filisiti bakumukana u Devedi

¹ Aba Filisiti bakababungannya poka abasilikali babo bosi mu Afeki, bope aba Izilayeli bakazenga ivisakasa vyabo papipi ni chiziba mu Yezileli.

² Bo abamwene aba ba Filisiti bakubuka nu tubukatila twabo utwa basilikali 100 sona nutwa 1,000 pakulwa ubwite, u Devedi na basilikali bache bakizagha kwisinda ukwa mwene u Akishi.

³ Abasongo aba basilikali aba ba Filisiti bakalalusya bakati, “Nkimba aba Hebeli aba bakulonda ichoni pano?” U Akishi akabamula akati, “Yunuyu we Devedi, ikambala ilya Sabuli, u mwene uwa Izilayeli. Ikalagha nane akabalilo akatali nkani, sona ntamwaghite ni chifukwa nachimochimo ukwandila pisiku lilyo akafikilagha kuno.”

⁴ Loli abalongozi aba ba Filisiti bakamukalalila nkani u Akishi, po bakati, “Mumubwezye umuntu yunuyu kukaya kache kako mukamupa. Atakwiza pakubuka naswe kubwite, lumo angatusambukila. Umuntu yunuyu angasayana nu mwene wache pakubaghogha abasilikali bitu.”

⁵ Nkimba yunuyu te we Devedi yuyo abakolo bakimbagha bakati, “U Sabuli abaghogha abantu amasabuzani bulo, loli u Devedi abaghogha abantu ama 10,000?”

⁶ Po u Akishi akamwitizya u Devedi nukumubuzya ukuti, “Nkulapa pamaso pa Mwene umumi ukuti awe wame muntu umusubiliwa kukwane, sona wanhobosya nkani namumo wababombela abasilikali bane. Ntakwaghite ni chifukwa nachimochimo ukwandila pisiku lilyo ukafikilagha kuno. Loli abamwene abanji batakukulonda.

⁷ Polelo bwelagha mumutende, umwakuti utakabombe nachimochimo chicho chingabakalalizya.”

⁸ U Devedi akalalusya akati, “Wee mwene nkimba nananga ichoni? Nkimba wanyagha ni chifukwa choni ukwandila pisiku lilyo nkafikila kuno? Nkimba choni chicho ntangabuka poka nu mwene wane, pakulwa ubwite na balwani bache?”

⁹ U Akishi akamula akati, “Inzimenye ukuti wame muntu umusubiliwa kukwane ngati wantumi uwa Chala. Loli abamwene abanji batakulonda ukuti ubuke poka naswe kubwite.

¹⁰ Polelo indabi ulabile nkani poka na bantu babo ukiza nabo, po munyamuke bo kwacha bulo.”

¹¹ Po u Devedi na bantu bache bakalabila pandabindabi nukunyokela kuchisu icha ba Filisiti, loli aba Filisiti bakabuka ku Yezileli.