1 Samuweli 27 - IBAYIBOLO 2024

U Devedi ali pakasi paba Filisiti

¹ U Devedi akanena mwene akati, “Isiku limo u Sabuli akwiza pakungogha. Chingaba chizapo ukuti insamalile kuchisu icha ba Filisiti. U Sabuli atakwiza pakundondelezya mu Izilayeli muno, po nkwiza pakupona.”

² U Devedi akanyamuka poka na bantu bache 600 nukubuka kwa Akishi umwana uwa Mawoki, u mwene uwamu Gati.

³ Po u Devedi na bantu bache bakikala ku Gati poka nu Akishi. Umuntu wesi akaba na bamunyumba yache kulakula, sona u Devedi akaba na bachi bache babili, u Ahinowamu umu Yezileli, sona nu Abigelo umu Kalimeli, yuyo akaba mufwilwe uwa Nabali.

⁴ Bo u Sabuli ivwa ukuti u Devedi achimbilila ku Gati, atakamukonkelezya.

⁵ Po u Devedi akamubuzya u Akishi akati, “Nanti naloli wahoboka nane, umpeko ubuzilo bumo muchisu chako ichi ubwakuti nikalayemo. Nkimba choni chicho ukuti ne wambombo wako nikalaye nu mwene mukaya akakulu nkani aka?”

⁶ Pisiku lilalila u Akishi akamupa u Devedi akaya aka Zikilagi. Ichi cho chifukwa akaya kala ko kaya aka bamwene aba ba Yuda mupaka nilelo bulo.

⁷ U Devedi akikala muchisu icha ba Filisiti umwaka ghoka na mezi folo.

⁸ Po u Devedi na bantu bache bakabuka pakulwa ubwite naba Geshuli, naba Gilizi, sona naba Amaleki. Abantu banaba bakaba benekaya ukwanda kale bulo. Impaka iya chisu chabo yikafika ku Shuli, mupaka ku Ijiputi.

⁹ Pakabalilo kosi kako u Devedi akabukagha pakulwa ubwite, akabaghoghagha abantu bosi, ukusita ukumulekapo mumi nayumoyumo umwanavuli pamo umukolo. Loli akasenda ing'ozi ni ng'ombe ni mpunda ni ngamila sona na menda nukwiza navyo kwa Akishi.

¹⁰ Bo u Akishi akumulalusya u Devedi ukuti, “Nkimba ilelo wame kwiyi pakulwa ubwite?” U Devedi akamula akati, “Twalwanga ubwite kuntende ukwa Yuda,” pamo “Kuchisu icha Yelamiyeli,” pamo, “Kuchisu icha ba Keni.”

¹¹ U Devedi atakamulekaghapo umwanavuli pamo umukolo mumi, ukunyila ukuti nanti angamuleka yumo lumo angamulongelela kwa Gati, vivyo yuyo na bantu bache bakabombagha. Akabalilo kosi kako u Devedi akikalagha muchisu icha ba Filisiti, akabombagha bunubu.

¹² U Akishi akamusubila nkani u Devedi umwakuti akanena mwene akati, “Aba Izilayeli bamubengite nkani. Po akwiza pakumbombela mubumi bwache bosi.”