1 Samuweli 26 - IBAYIBOLO 2024

U Devedi akukana sona pakumughogha u Sabuli

¹ Isiku limo abantu aba mu Zifi bakiza kwa Sabuli mu Gibeya nukumubuzya ukuti, u Devedi akuvwama pighamba ilya Hakila kubufumilo bwizuba ubwa nkolongo iya Yudeya.

² Po u Sabuli akabuka kunkolongo iya Zifi, poka na basilikali bache abamaka 3,000, aba mu Izilayeli babo akabasala pakumulondelezya u Devedi.

³ U Sabuli akazenga ivisakasa vyache pighamba ilya Hakila mulubazu ulwa musebo, kubufumilo bwizuba ubwa nkolongo iya Yudeya. Loli u Devedi akaba mo munkolongo mulamula. Bo u Devedi azyaghannya ukuti u Sabuli akamukonka,

⁴ akabatuma abatendezi, po bakagha ukuti naloli u Sabuli akaba kulakula.

⁵ U Devedi akabuka kuvisakasa ivya Sabuli, po akabumanya ubuzilo bubo u Sabuli nu Abinala, umwana uwa Neli usongo uwa babwite aba Sabuli bakaghonaghapo. U Sabuli akaghonagha muvisakasa mula, bo abasilikali bamuzyunguliye.

⁶ Po u Devedi akamulalusya u Ahimeleki umu Hiti, sona nu mukulu uwa Yowabu, umwana uwa Zeluya akati, “Nkimba wewenu yuyo angabuka nane muvisakasa ivya Sabuli?” U Abishayi akamula akati, “Nene.”

⁷ Po u Devedi nu Abishayi bakabuka kuvisakasa ivya Sabuli pabusiku nukumwagha u Sabuli aghonite muchisakasa chache, bo asimika impalala yache pasi papipi nu mutu wache. U Abinala na basilikali bache bakaghona umwakumuzyungulila.

⁸ U Abishayi akamubuzya u Devedi akati, “Ilelo u Chala amubika umulwani wako munyobe zyako. Po unyitikizye ukuti imulase ni mpalala yane nukumusimikila pasi lyoka bulo. Te imulase kabili, awe.”

⁹ Loli u Devedi akamubuzya u Abishayi akati, “Awe, utakamubombele ichintu ichibibi. Nkimba wewenu yuyo angamubombela ichintu ichibibi umupakiwa uwa Mwene, nukuba musita nongwa?”

¹⁰ Akanena sona akati, “Nkulapa pamaso pa Mwene umumi ukuti u Mwene weyuyo akwiza pakumughogha. Nanti isiku lyache lyakwana, akwiza pakufwa, pamo akwiza pakufwila kubwite.

¹¹ Loli u Mwene ankanizye ukuti intakamubombele ichintu ichibibi umupakiwa wache. Losi ulu senda impalala yache nu lubako lwache ulwa mizi, lulo luli papipi nu mutu wache, po tubukaye.”

¹² Po u Devedi akasenda impalala nu lubako ulwa mizi vivyo vikaba papipi nu mutu wache nukubuka. Atakabapo nayumoyumo yuyo akazyennya pamo ukuzimanya, sona nayumoyumo yuyo akanyamuka. Bosi bakakononagha pakuti u Mwene akabaghoneka nu tulo utwa kufwa nato.

¹³ Po u Devedi akalobokela kulubazu ulunji ulwa ighamba nukwimilila pabutalipo pamwanya pighamba.

¹⁴ U Devedi akabitizya abasilikali nu Abinala umwana uwa Neli akati, “Wee Abinala, nkimba utakunyamula?” U Abinala akamwamula akati, “Nkimba wewenu we ukumwitizya u mwene?”

¹⁵ U Devedi akamubuzya u Abinala akati, “Wee Abinala, nkimba te we mwanavuli? Nkimba wewenu ayanite nawe mu Izilayeli? Nkimba choni chicho ukapotwa pakumuzighilila u mwene wako? Losi ulu umuntu yumo izite kunuko ukuti amughoghe u mwene wako.

¹⁶ Imbombo yakupota! Nkulapa pamaso pa Mwene umumi ukuti awe poka na bantu bako mwebosi mubaghiye pakufwa, pachifukwa ichakuti mwapotwa pakumuzighilila u mwene winyu, yuyo mupakiwa uwa Mwene. Talankannya! Nkimba impalala iya mwene nu lubako lwache ulwa mizi vivyo vikaba papipi nu mutu wache vili ko kwiyi?”

¹⁷ U Sabuli akalimanya izyu ilya Devedi, po akalalusya akati, “Nkimba awe te we Devedi, umwana wane?” U Devedi akamwamula akati, “Nene, mwene wane.”

¹⁸ Akanena sona akati, “Nkimba choni chicho u mwene wane akundondelezya bunubu ne mubombi wache? Nkimba nabomba ichoni? Nkimba napalaghula nongwa yoni?

¹⁹ Wee mwene wane teghelezya amazyu agha mubombi wako. Nanti we Mwene yuyo akulonda ukuti unsambukile, po apokele ichakwiyipa ichakupepesezya imbibi. Loli nanti bantu bachibomba bunubu, u Mwene abaghune. Ilelo banyefyamo mumpyana iya Mwene sona bakuti, ‘Bukagha pakubabombela abachala abanji.’

²⁰ Polelo utakanyitikizye ukuti imfwile muchisu icha kubutali nu Mwene, pakuti u mwene uwa Izilayeli iza pakundondelezya ne kapantila ngati akubinga inkwale mumaghamba.”

²¹ Po u Sabuli akati, “Wee Devedi mwana wane, nananga nyokela! Ntakwiza pakukubombela sona nachimochimo ichintu ichibibi pakuti ubumi bwane wabupima pakuba bwapamwanya nkani. Naloli ane nkabomba ivyabupunganu, sona nkapuvya nkani.”

²² U Devedi akamula akati, “Wee mwene, impalala yako iyi! Umutume umuntu ize ayisende.

²³ U Mwene akumusaya umuntu pachifukwa icha bugholosu nu busubiliwa bwache. Ilelo u Mwene akubikite munyobe zyane, loli intakalondagha ukuti nkubombele ichintu ichibibi we mupakiwa uwa Mwene.

²⁴ Ilelo ubumi bwako nabupima pakuba bwapamwanya nkani, umwakuyana bulo u Mwene abupime ubumi bwane pakuba bwapamwanya nkani, sona ampoke kuntamyo zyane zyosi.”

²⁵ U Sabuli akamubuzya u Devedi akati, “Wee mwana wane Devedi, u Chala akusaye. Ukwiza pakubombagha ivintu ivikulu nkani, sona ukwiza pakupotagha muvintu vyosi.” Po u Devedi akepapo, wepe u Sabuli akabwela.