1 Samuweli 25 - IBAYIBOLO 2024

Ubufwe ubwa Samuweli

¹ Bo u Samuweli afwa aba Izilayeli bosi bakabungana poka nukumulila. Po bakamusyila kukaya kache aka Lama. Pisinda pache u Devedi akabuka kunkolongo iya Palani.

Nizya Devedi nu Abigelo

² Kukabako umuntu yumo ku Mawoni mukaya aka Kalimeli, yuyo akaba ni vyuma nkani. Umuntu yunuyu akaba mukabi nkani, sona akaba ni ng'ozi 3,000 ni mbuzi 1,000. Pakabalilo kalakala akaba mu Kalimeli pakudumulila ing'ozi zyache.

³ Umuntu yunuyu akaba we Nabali, umuchi akaba we Abigelo. Umuchi wache akaba wamahala sona uwakuboneka akiza, loli umulume umu Kalebu akaba nu moyo umukafu, sona akaba mupunganu.

⁴ Bo u Devedi ali munkolongo, akivwa ukuti u Nabali ali pakudumulila ing'ozi zyache.

⁵ Po akabatuma abalumendo 10 nukubabuzya ukuti, “Mubuke ku Kalimeli ukuti mundamukileko u Nabali.

⁶ Mumubuzye muti u mwene u Devedi akukulamuka akuti, ‘Umutende ubanje nawe, poka na bamunyumba yako bosi, sona ni vintu vyosi vivyo uli navyo.

⁷ “ ‘Nkwivwa ukuti uli na bantu babo bali pakudumulila ing'ozi. Bo abadimi bako bali poka naswe kuno, aswe tutakababombela nachimochimo ichintu ichibibi, sona chitalipo nachimochimo ichintu chabo chicho chikasobelapo pakabalilo kosi kako bakaba ku Kalimeli.

⁸ Ubalalusye abambombo bako, po bakwiza pakubabuzya. Ilelo twiza kulusekelo, po ubapokele ni chisa abantu bane. Nalamba ubape abambombo bane, sona nane bulo ne mumanyani wako u Devedi ivintu vyosi vivyo ungaba navyo.’ ”

⁹ Bo abantu aba Devedi bafika, bakamulingannya u Nabali zyosi zizyo u Devedi akababuzya. Po bakalindilila.

¹⁰ Loli u Nabali akabamula akati, “Nkimba u Devedi umwana uwa Yese wewenu? Amasiku agha abambombo abinji bakubasambukila abamwene babo.

¹¹ Nkimba choni chicho insende ivibama vyane na mizi ghane, ni nyama yiyo nabaghoghela abambombo bane aba kudumulila ing'ozi nukubapa abantu babo ntabamenye kuko bafuma?”

¹² Abantu aba Devedi bakanyokela pakumulingannya u Devedi amazyu ghosi ghagho u Nabali akanena.

¹³ U Devedi akabalamula abantu bache bala akati, “Umuntu wesi apinyilile upanga wache.” Po umuntu wesi akapinyilila upanga wache, sona wepe u Devedi akapinyilila upanga wache. Pipipipi abantu 400 bakabuka poka nu Devedi, loli abantu 200 bakasyalikila pakusungilila ukatundu.

¹⁴ Uwambombo yumo akamubuzya u Abigelo umuchi uwa Nabali akati, “U Devedi akatuma intumi bo ali munkolongo pakumulamuka u mwene witu, loli akazisamula nkani.

¹⁵ Abambombo banaba bakatubombela ivintu ivyiza nkani. Batakatubombela nachimochimo ichintu ichibibi, sona akabalilo kosi kako tukaba mumaghunda papipi nabo, chitalipo nachimochimo ichintu chitu chicho chikasobelapo.

¹⁶ Umusanya nu busiku bakaba lupaso lwitu akabalilo kosi bo tuli pakudima ing'ozi zyitu papipi nabo.

¹⁷ Nalondagha ukuti nkumanyisye bulo zinizi, sona bombapo zimo, pakuti chinichi chingamupelela intamyo u mwene witu poka na bamunyumba yache. U mwene witu uyu ali nu moyo umukafu nkani umwakuti akwighalila amakutu ghache nanti umuntu akumubuzya.”

¹⁸ U Abigelo atakazyelazyela, loli akasenda ivibama 200, ni nyambi izya ikwela zibili inyizule nu vinyo, ni ng'ozi inyoche fayivi, na makilogalamu 17 agha ngano nkazinge, ni vitumbuwa ivya mampesya amumizu 100, sona ni vitumbuwa ivya makuyu 200 nukuvikwezya pampunda.

¹⁹ Po akababuzya abambombo bache akati, “Longolelapo, nkubagha.” Loli atakamubuzya nachimochimo umulume wache.

²⁰ Bo u Abigelo akwelite pampunda yache akafika muntende mwighamba limo, akamwennya u Devedi na bantu bache bakwika pighamba, po akakomana nabo.

²¹ Pakabalilo kalakala u Devedi akanenagha mwene ukuti, “Naloli natamiwa pabulo pakusungilila ukatundu uwa muntu yunuyu munkolongo, umwakuti chitalipo nachimochimo ichintu chache chicho chikasobelapo. Loli antanizya ichibibi pa bwiza bubo nkamubombela.

²² U Chala anfunde nkani nanti ukufika pandabindabi ntakubaghogha abanavuli bosi babo bali poka nawe.”

²³ Bo u Abigelo amwennya u Devedi, akika pampunda yache nukufughama pamaso pa Devedi, bo icheni chache chikotamiye pasi.

²⁴ Bo achili ali pasi munyayo izya Devedi akanena akati, “Wee mwene wane, nalamba unteghelezye, leka inongwa yiniyi yibanje pamutu wane. Unyitikizye ne wambombo wako ukuti inene nawe, sona unteghelezye zizyo nkulonda pakunena.

²⁵ Mwene wane, utakamuteghelezyanje u Nabali umuntu umupunganu uyu. Ayanite bulo namumo itabwa lyache likung'anamulila, kokuti mupunganu! Loli ane ne wambombo wako, ntakabennya abantu bako babo ukabatuma.

²⁶ “Pakuti we Mwene yuyo akukanizya ukuti utakamughoghe umuntu nayumoyumo pakutanizya ububibi bubo akakubombela, losi ulu nkulapa pamaso pa Mwene umumi, sona na mwitabwa lyako ukuti abalwani bako na bosi babo bakulonda pakukubombela ichibibi bafundiwanje ngati we Nabali.

²⁷ Po pokela ivyabupi vivyo ne wambombo wako niza navyo ukuti ubape abantu bako babo bali poka nawe.

²⁸ Nalamba unhobokele ne wambombo wako. U Mwene akwiza pakubukazya nkani ubumwene bwako bwila na bwila, pachifukwa ichakuti ukumulwila ubwite u Mwene. Po utakwiza pakubombapo nachimochimo ichintu ichibibi mubumi bwako bosi.

²⁹ Nanti abantu bakusambukiye nukukulondelezya ukuti bakughoghe, u Mwene u Chala wako akwiza pakukupoka. Loli akwiza pakubusumba ubumi ubwa balwani bako ngati libwe mu fyata.

³⁰ Nanti u Mwene akubombela ivyiza vyosi vivyo akakulayizya, sona nukuti akupakazya pakuba we mulaghili uwa Izilayeli,

³¹ utakwiza pakuba sona nu mabyebye uwakuti ukakupula ibanda pamo ukatanizya apasita ichifukwa. Po bo u Mwene akubombela ivyiza vyosi, utakanduvye ane ne mubombi wako.”

³² U Devedi akamubuzya u Abigelo akati, “Apaliwanje u Mwene, u Chala uwa Izilayeli, yuyo akutuma ukuti ukomane nane ilelo!

³³ U Chala akusaye pachifukwa icha mahala ghako, pakunkanizya ukuti ntakatanizye pakubaghogha abantu abasita nongwa.

³⁴ U Chala, u Mwene uwa Izilayeli weyuyo ankanizya ukuti ntakakughoghe. Loli nkulapa pamaso pa Mwene umumi uwa Izilayeli ukuti nanti utakizagha pakukomana nane, abanavuli bosi babo bali poka nu Nabali ngali bafuye ukufika pandabindabi.”

³⁵ Po u Devedi akapokela ivyabupi vivyo umukolo yula akiza navyo nukumubuzya ukuti, “Bwelagha mumutende! Nkwiza pakubomba zizyo wandaba.”

³⁶ Bo u Abigelo anyokela kwa Nabali, u Nabali akaba munyumba bo ali nu lusekelo ulukulu nkani ngati ulwa mwene. U Nabali akahoboka nkani, pakuti akakolwa nkani. U Abigelo atakamubuzyapo nachimochimo mupaka indabi yache.

³⁷ Pandabindabi bo ukukolwa kula kwamala, umuchi wache yula akamubuzya zyosi. Umoyo wache ghukaleka pakufuta, sona umubili wache ghosi ghukafwa.

³⁸ Bo ghachila amasiku teni, u Mwene akamughogha u Nabali.

³⁹ Bo u Devedi ivwa ukuti u Nabali afwa akati, “U Mwene apaliwanje yuyo antanizikizya ububibi bubo u Nabali akambombelagha, sona ankanizya ne mubombi wache ukuti ntakamubombele u Nabali ichintu ichibibi, loli ukuti imbibi yache yibanje pamutu wache.” Po u Devedi akatuma intumi kwa Abigelo ukuti bamusipe pakuba muchi wache.

⁴⁰ Abambombo bache bala bakabuka mukaya akakulu nkani aka Kalimeli nukumubuzya u Abigelo ukuti, “U Devedi atutuma pakukusenda ukuti ubanje muchi wache.”

⁴¹ U Abigelo akafughama, bo icheni chache chikotamiye pasi nukuti, “Ane ne wambombo wache niyanizye pakumubombela nukusukuzya inyayo izya songo wane.”

⁴² Panapo na panapo u Abigelo akakwela pampunda yache, poka na bambombo bache abalindu fayivi nukubuka poka na bambombo aba Devedi pakuba muchi uwa Devedi.

⁴³ U Devedi akamusenda sona u Ahinowamu uwaku Yezileli, po bosi babili banaba bakaba bachi bache.

⁴⁴ Loli u Sabuli akamupa u Paliti umwana uwa Layishi uwaku Galimu, umwana wache u Mikali, yuyo akaba muchi uwa Devedi.