1 Samuweli 24 - IBAYIBOLO 2024

U Devedi akukana pakumughogha u Sabuli

¹ Bo u Sabuli abwelako pakulwa ubwite naba Filisiti akivwa ukuti, u Devedi ali munkolongo iya Eni Gedi.

² Po u Sabuli akabasala abasilikali 3,000 pakasi paba Izilayeli bosi nukubuka nabo pakumulonda u Devedi poka na bantu bache ku Mabwe agha Mbabala.

³ Akafika pa vibagha ivya ng'ozi pazila mulubazu ulwa musebo, papo pakaba impako. U Sabuli akinjila mulamula ukuti iyavwe mwene. U Devedi na bantu bache bakaba mukasi nkani mumpako yilayila.

⁴ Abasilikali aba Devedi bakamubuzya bakati, “Ulu lo lusako lwako, lulo u Mwene akanena akati, ‘Nkwiza pakumubika umulwani wako munyobe zyako, ukuti umubombele chosi chicho ukulonda.’ ”

⁵ Loli pisinda pache u Devedi akatamiwa nkani nu mabyebye, pachifukwa ichakuti akadumula kamo akamwenda aka nkazo iya Sabuli.

⁶ Po akababuzya abantu bache akati, “U Mwene ankanizye ukuti intakamubombele ichintu ichibibi u mwene wane uyu, yuyo mupakiwa uwa Mwene pamo ukumuvulazya napo panandi pakuti mupakiwa uwa Mwene.”

⁷ Na mazyu ghanagha u Devedi akabachemela abantu bache, umwakuti atakabitikizya ukuti balwe ubwite nu Sabuli. Po u Sabuli akepamo mumpako mula nukubuka.

⁸ U Devedi wepe akepamo mumpako mula nukumwitizya u Sabuli ukuti, “Wee mwene, tata wane!” U Sabuli akaghalabuka, po u Devedi akafughama, bo icheni chache chikotamiye pasi.

⁹ Akamulalusya u Sabuli akati, “Nkimba choni chicho ukubivwila abantu babo bakuti, u Devedi akulonda pakukughogha?”

¹⁰ Ilelo wiyenezya wemwene ukuti u Mwene akubikite munyobe zyane mumpako mula. Abantu bane bamo bakambuzya ukuti nkughoghe, loli nkakakana. Nkati, “Ntangamuvulazya u mwene wane, pakuti mupakiwa uwa Mwene.”

¹¹ Tata wane, ennya akamwenda aka nkazo yako munyobe yane. Ngali nakughoghite loli nkadumula bulo akamwenda aka. Po uzimanye ukuti ane inte ni nyinong'ono nazimo izya kukusambukila pamo ukughogha. Ane intakunangiyepo nachimochimo, loli ukumbingambinga ukuti ungoghe.

¹² U Mwene alonge yuyo amunangila uwamwabo pakasi papako nane, sona akufunde pachifukwa icha vivyo wambombela, loli ane ntakwiza pakukubombela nachimochimo ichintu ichibibi.

¹³ Uchimenye ichili ichakale ichakuti, “U muntu umubibi zyope imbombo zyache mbibi.” Po ane ntakwiza pakukubombela nachimochimo ichintu ichibibi, awe.

¹⁴ Mwennye umuntu yuyo u mwene uwa Izilayeli akulonda pakumughogha. Mwennye umuntu yuyo ali pakumulondelezya. Nkimba ukulonda pakungogha ne mbwa imfwe, sona ne kapantila bulo?

¹⁵ U Mwene alonge nukumwagha yuyo amunangila uwamwabo pakasi papako nane, sona anyimilaye nukumpoka munyobe zyako.

¹⁶ Bo u Devedi amala pakunena zinizi, u Sabuli akalalusya akati, “Wee mwana wane Devedi, fwandi naloli wewe?” Po akanda pakulila nkani.

¹⁷ Po akamubuzya u Devedi akati, “Awe wame muntu umugholosu, loli ane name muntu mubibi. Naloli utanangiyepo nachimochimo, loli ane ne nakunangila nkani.

¹⁸ Ilelo wambombela ubwiza pakuti utangoghite, bo u Mwene ambika munyobe zyako.

¹⁹ Nanti umuntu amwagha umulwani wache, nkimba angamuleka bulo? Polelo u Mwene akupe umuvwalo umukulu pachifukwa icha vivyo wambombela ilelo.

²⁰ Naloli ilelo nazimanya ukuti ukwiza pakuba we mwene uwa Izilayeli, sona nukuti ubumwene ubwa Izilayeli bukwiza pakuba pasi pabulaghili bwako.

²¹ Losi ulu ulapile mwitabwa ilya Mwene ukuti utakwiza pakubazimizya abaluko lwane, pamo pakulizimya itabwa lyane pakasi pa bamunyumba iya tata wane.”

²² Po u Devedi akalapa vyosi vinivi pamaso pa Sabuli. U Sabuli akabwela kukaya kache, loli u Devedi na bantu bache bakanyokela mumpako mumo bakavwamagha.