1 Samuweli 23 - IBAYIBOLO 2024

U Devedi akukapoka akaya akakulu aka Keyila

¹ Bo u Devedi ivwa ukuti aba Filisiti bali pakulwa ubwite nakaya akakulu aka Keyila, sona nukuti bali pakufyula inyinulo pabuzilo ubwakukomelapo inyinulo,

² akamubuzikizya u Mwene akati, “Nkimba ningabuka pakulwa ubwite naba Filisiti?” U Mwene akamwamula akati, “Kalwe nabo, umwakuti ukapoke akaya aka Keyila.”

³ Loli abantu aba Devedi bakamubuzya bakati, “Nanti muno mu Yuda tukunyila, po zingaba bulibuli nanti twabuka ku Keyila pakulwa ubwite na basilikali aba ba Filisiti?”

⁴ U Devedi akamubuzikizya sona u Mwene, po u Mwene akamwamula akati, “Bukagha ku Keyila, pakuti nkwiza pakubabika aba Filisiti munyobe zyako.”

⁵ U Devedi na bantu bache bakabuka ku Keyila pakulwa ubwite. Bakabaghogha aba Filisiti nukubafyula ivitekwa vyabo. U Devedi akabavulazya nkani aba Filisiti bala nukubapoka abantu aba mu Keyila.

⁶ Bo u Abiyatala umwana uwa Ahimeleki akuchimbilila kwa Devedi ku Keyila, akasenda u efodi.

⁷ Bo u Sabuli ivwa ukuti u Devedi achimbilila ku Keyila akati, “U Chala amubika munyobe zyane. U Devedi ipinya mwene pakwinjila mukaya akakulu kako kali ni nyiyi izya chela.”

⁸ Po u Sabuli akabitizya abasilikali bache bosi pakulwa ubwite, sona nukuti babuke ku Keyila ukuti bamuzyungulile u Devedi poka na bantu bache.

⁹ Bo u Devedi azimanya ukuti u Sabuli akubatika pakumubombela ichintu ichibibi, akamubuzya umuputi u Abiyatala akati, “Mpanga u efodi.”

¹⁰ Po u Devedi akati, “Wee Mwene, u Chala uwa Izilayeli, ne mubombi wako nivwa ukuti u Sabuli akubatika pakwiza mukaya aka Keyila nukukanangannya pachifukwa icha nene.

¹¹ Nkimba abenekaya aba mu Keyila bakwiza pakumbika munyobe izya Sabuli? Nkimba u Sabuli akwiza naloli ngati mumo ne mubombi wako nivwiliye? Wee Mwene, u Chala uwa Izilayeli, umbuzye ne mubombi wako.” U Mwene akamwamula akati, “Naloli u Sabuli akwiza.”

¹² U Devedi akalalusya sona akati, “Nkimba abenekaya aba mu Keyila bakwiza pakumbika ane na bantu bane munyobe izya Sabuli?” U Mwene akamula akati, “Eee, bakwiza pakubabika munyobe izya Sabuli.”

¹³ Po u Devedi na bantu bache, babo bosi poka bakabapo pipipipi 600 bakepamo mu Keyila nukuchimbilachimbila. Bo u Sabuli ivwa ukuti u Devedi epamo mu Keyila, atakabukako ku Keyila kula.

¹⁴ U Devedi akavwamagha mumaghamba na munkolongo iya Zifi. Isiku ni siku u Sabuli akamulondelezya u Devedi, loli u Chala atakamubika u Devedi munyobe zyache.

¹⁵ Bo u Devedi ali munkolongo iya Zifi mu Holeshi, akazimanya ukuti u Sabuli akalondagha pakumughogha.

¹⁶ U Yonatani umwana uwa Sabuli akabuka kwa Devedi ku Holeshi pakumukazya nukumubuzya ukuti u Chala akwiza pakumwavwa.

¹⁷ Akamubuzya akati, “Utakanyilaye. Utata wane atakwiza pakukughogha. Awe ukwiza pakuba we mwene uwa Izilayeli, sona ane nkwiza pakuba ne wabubili wako. Utata wane azimenye akiza bulo zinizi.”

¹⁸ Po abantu babili bala bakafingana ulufingo pamaso pa Mwene. U Yonatani akabwela nukumuleka u Devedi akwikala ku Holeshi kulakula.

¹⁹ Abantu bamo aba mukaya akakulu aka mu Zifi bakabuka kwa Sabuli mu Gibeya nukumubuzya ukuti, “U Devedi akuvwama muchigaba chitu mumpako iya Holeshi pighamba ilya Hakila, munkolongo iya Yuda.

²⁰ Wee mwene, aswe tuzimenye ukuti uli pakumulondelezya nkani u Devedi. Po wizaghe, aswe tukwiza pakumubika munyobe zyako.”

²¹ U Sabuli akabamula akati, “U Mwene abasaye pachifukwa icha kumpasikizya kwinyu.

²² Bukagha, mubuzikizye akiza nkani kuko akuvwama, sona nukuti wewenu yuyo amwenizye kulakula. Abantu bakumbuzya ukuti u Devedi achebite nkani.

²³ Kabuzikizye nkani kuko akuvwama, sona mwize mumbuzye ubwanaloli bosi. Po ane nkwiza pakubuka namwe. Nanti naloli ali kulakula, nkwiza pakumulondelezya pakasi pabantu bosi muchisu icha Yuda.”

²⁴ Po bakanyamuka nukubuka ku Zifi, bo u Sabuli atanyamukite. Pakabalilo kalakala u Devedi na bantu bache bakaba munkolongo iya Mawoni, mu Alaba kuntende kunkolongo iya Yudeya.

²⁵ Po u Sabuli na bantu bache bakanda pakumulondelezya u Devedi, loli bo u Devedi ivwa zinizi akachimbilila kwibwe munkolongo iya Mawoni nukwikala kulakula. Bo u Sabuli ivwa, wepe akabuka kunkolongo iya Mawoni pakumulondelezya u Devedi.

²⁶ U Sabuli na bantu bache bakendagha kulubazu loka, sona u Devedi wepe na bantu bache bakendagha kulubazu ulunji ulwa ighamba, ukuti bamuchimbile u Sabuli. Bo u Sabuli na basilikali bache bali papipi pakumulema u Devedi na bantu bache,

²⁷ intumi yikiza kwa Sabuli nukumubuzya ukuti, “Lubilo nyokela, aba Filisiti bali pakuchifyula ichisu chinichi!”

²⁸ Po u Sabuli akaleka pakumukonka u Devedi nukubuka pakulwa naba Filisiti. Ichi cho chifukwa ubuzilo bula bukwitiziwa ukuti Sela Hamalekoti.

²⁹ Po u Devedi akepako kulakula nukubuka pakwikala mumpako mu Eni Gedi.