1 Samuweli 21 - IBAYIBOLO 2024

U Devedi akumuchimbila u Sabuli

¹ U Devedi akabuka ku muputi u Ahimeleki ku Nobu. U Ahimeleki akatetemagha bo akwiza pakumupokela, po akamulalusya akati, “Nkimba choni chicho wizite wemwene bulo ukusita umuntu uwakukusindikila?”

² U Devedi akamwamula umuputi u Ahimeleki akati, “Umwene antuma ukuti imbombe imbombo yimo kuno, sona akandamula akati, ‘Patakabepo nayumoyumo umuntu uwakumanya imbombo yiyo nkukutumila, sona yiyo nakulamula pakubomba.’ Loli nababuzya abantu bane ukuti bakomane nane pabuzilo bumo.

³ Nkimba mungabapo ni vyakulya vimo? Mumpeko ivibama fayivi pamo ichakulya chimo chicho mungaba nacho?”

⁴ Umuputi yula akamwamula akati, “Inte ni vibama ivyabulo, loli vyene ivipaghuliwa. Ungavisenda pene papo nanti abantu bako batinyazizyepo na bakolo.”

⁵ U Devedi akamula akati, “Abantu bane bakuba bakwilema akabalilo kosi. Abantu bane bakuba bakwilema napapo po pabulendo bulo, polelo babaghiye pakwilema ukuchilapo!”

⁶ Po umuputi yula akamupa ivibama ivyakupeghiwa pakuti patakabapo ivibama ivinji, loli vyene ivibama ivyakupeghiwa kwa Chala, vivyo akavyefya pamaso pa Mwene ukuti abikepo ivinji vivyo vitukiye.

⁷ Pisiku lilalila uwambombo yumo uwa Sabuli akaba palapala pachifukwa ichakuti akalondagha pakubomba ulwiho ulwa chiputo pamaso pa Mwene. Uwambombo yunuyu akaba we Dowegi umu Edomu, sona akaba we kapitawa uwa badimi aba Sabuli.

⁸ U Devedi akamulalusya u Ahimeleki akati, “Nkimba ungabako ni mpalala pamo upanga? Ane intizite nupanga pamo ichilwilo nachimochimo pachifukwa ichakuti u mwene akanchenusya bulo ukuti nize pakubomba imbombo kuno.”

⁹ Umuputi yula akamula akati, “Indi nupanga uwa Goliyati, umu Filisiti yuyo ukamughogha mwikombe ilya Ela. Imunnyembeteleye nu mwenda kunyuma kwa efodi. Nanti ukumulonda senda, pakuti cho chilwilo chene chicho indi nacho.” U Devedi akati, “Mpanga, pakuti atalipo nayumo upanga uyunji yuyo ayanite nawe.”

¹⁰ Pisiku lilalila u Devedi akamuchimbila u Sabuli nukubuka kwa mwene u Akishi uwamu Gati.

¹¹ Loli abambombo aba Akishi bakamulalusya bakati, “Nkimba uyu te we Devedi, u mwene uwa chisu? Umuntu yunuyu weyuyo abakolo bakajinagha nukumwimbila ukuti, ‘U Sabuli abaghogha abantu amasabuzani, loli u Devedi abaghogha abantu amasabuzani 10,000.’ ”

¹² Amazyu ghanagha ghakumupalamasya nkani u Devedi, umwakuti akanda pakumunyila u mwene u Akishi uwamu Gati.

¹³ Po akaba ngati po we chipena pamaso pabantu nukwanda pakusimbannya panyighi izya lupaso bo amati ghakusululuka ku ndevu.

¹⁴ U Akishi akababuzya abambombo bache akati, “Umuntu uyu we chipena! Nkimba choni chicho mwiza nawe pamaso papane?

¹⁵ Tuli nabo abachipena abinji nkani kuno. Nkimba choni chicho mwiza nu muntu yunuyu, yuyo akubomba ivyabuchipena pamaso papane munyumba yane?”