1 Samuweli 20 - IBAYIBOLO 2024

U Yonatani akumwavwa u Devedi

¹ Po u Devedi akachimbilako ku Nayoti mu Lama, nukubuka kwa Yonatani. Akamulalusya akati, “Nkimba nananga choni? Nkimba indi ninongwa yoni? Nkimba namunangila choni ughuso umwakuti akulonda pakungogha?”

² U Yonatani akamwamula akati, “Awe napo panandi! Utakwiza pakufwa nalumo! Utata wane atangabomba ichintu chimo ichikulu pamo ichinandi ukusita ukumbuzya. Nkimba anganvinda bulibuli zinizi? Awe, te momumo.”

³ Loli u Devedi akalapa akati, “Ughuso azimenye akiza nkani ukuti awe unganite, po akati, ‘U Yonatani atakazimanye zinizi, lumo angaba ni chitima.’ Loli nkulapa pamaso pa Mwene umumi, sona na pamaso papako ukuti ubufwe buli pampuno.”

⁴ U Yonatani akamubuzya u Devedi akati, “Mbuzya chosi chicho ukulonda ukuti nkubombele.”

⁵ Po u Devedi akati, “Indabi kuli Ulusekelo ulwa Kupanta ukwa Mwezi, po ane imbaghiye pakulya poka nu mwene. Loli leka imbuke pakuvwama mumughunda mupaka pachamabwila ukulinda indabi.

⁶ Nanti ughuso akundonda, umubuzye ukuti, ‘U Devedi akandaba ukuti imwitikizye ukuti abwele kukaya ku Betelehemu, pachifukwa ichakuti abaluko lwache bali pakubika ichakwiyipa icha mwaka nu mwaka.’

⁷ Nanti ati, ‘Chiza bulo,’ kokuti ane ne wambombo wako nkwiza pakupona. Loli nanti akalala, uzimanye bulo ukuti akulonda pakumbombela ichintu chimo ichibibi.

⁸ Loli awe, umpelele ichisa ne wambombo wako, pakuti tukafingana ulufingo pamaso pa Mwene. Nanti nananga, po ungoghe wewe nukuchila ukuti umbike munyobe izya ghuso.”

⁹ U Yonatani akamwamula akati, “Awe napo panandi. Nanti naloli nazimanye ukuti utata wane akulonda pakukubombela ichintu chimo ichibibi, nkimba ngali ntakubuzizye?”

¹⁰ Po u Devedi akamulalusya u Yonatani akati, “Nkimba wewenu yuyo akwiza pakumbuzya nanti ughuso akukwamula nu bukali?”

¹¹ U Yonatani akamwamula akati, “Twende kumaghunda.” Po bakabuka bosi poka kulakula.

¹² U Yonatani akamubuzya u Devedi akati, “U Mwene, u Chala uwa Izilayeli abanje we kaboni. Akabalilo ngati kanaka ukulinda indabi, nkwiza pakumulalusya utata wane, nanti nagha ukuti akulonda pakukubombela ichintu ichiza, nkwiza pakukubuzya.

¹³ Loli nanti utata wane akulonda pakukubombela ichintu chimo ichibibi, u Mwene anfunde nkani nanti intakukubuzya nukukwavwa ukuti upone. U Mwene abanje nawe ngati mumo akabela nu tata wane.

¹⁴ Nanti inchili indi nubumi, umpelele ichisa ngati mumo u Mwene akumpelela ichisa, umwakuti ntakaghoghiwe,

¹⁵ sona utakaleke nalumo pakubapelela ichisa abamunyumba yane, napapo u Mwene abazimizya abalwani bako bosi pachisu ichapasi.”

¹⁶ Po u Yonatani akafingana ulufingo na bamunyumba iya Devedi nukuti, “Naloli u Mwene abatanizye abalwani aba Devedi.”

¹⁷ U Yonatani akamulapizya u Devedi ukuti atakaleke pakumughana, pachifukwa ichakuti u Yonatani akamughana nkani u Devedi ngati mumo akiyighanila mwene.

¹⁸ Po u Yonatani akamubuzya u Devedi akati, “Indabi kukwiza pakuba Ulusekelo ulwa Kupanta ukwa Mwezi, abantu bakwiza pakumanya ukuti utalipo, pachifukwa ichakuti pachitengo chako patakwiza pakubapo umuntu nayumoyumo.

¹⁹ Pachamabwila ukulinda indabi, abantu bakwiza pakumanya naloli ukuti utalipo, po kavwame kuko ukavwama isiku lila ku chibunga icha mabwe.

²⁰ Ane nkwiza pakusumba utulasilo tutatu, kulubazu ulunji ulwa chibunga chila ngati po nkulonda pakulasa ichintu chimo.

²¹ Po nkwiza pakumutuma umulumendo ukuti, ‘Buka, senda utulasilo.’ Nanti namubuzya umulumendo yula ukuti, ‘Senda utulasilo tuto tuli kulubazu lwako ulu!’ Po wize, pakuti nkulapa pamaso pa Mwene umumi, ukuti wapona, sona chitalipo nachimo ichakoghofya.

²² Loli nanti namubuzya umulumendo yula nati, ‘Utulasilo tuli pantazipo,’ po wepepo pakuti u Mwene weyuyo ati epapo.

²³ Polelo nizya lufingo lulo twafingana, u Mwene we kaboni pakasi papako nane uwa bwila na bwila.”

²⁴ Po u Devedi akabuka pakuvwama kumaghunda. Bo Ulusekelo ulwa Kupanta ukwa Mwezi lwafika, u mwene u Sabuli akikala pasi pakulya ichakulya.

²⁵ U Sabuli akikala pachitengo chache chicho akikalaghapo bwila papipi nulubumba, umwakwenannya nu Yonatani, sona u Abinala akikala kulubazu ulwa Sabuli. Loli pabuzilo ubwa Devedi patakabapo umuntu nayumoyumo.

²⁶ Pisiku lilalila u Sabuli atakanenapo nachimochimo pakuti akinong'onagha ukuti, “Ichintu chimo chamuwila u Devedi, lumo atiswefizye mwene ukuti angaba nabo palusekelo ulu.”

²⁷ Loli indabi yache, bo isiku ilyabubili ilya Kupanta ukwa Mwezi lyachila, pabuzilo ubwa Devedi patakabapo sona umuntu nayumoyumo. Po u Sabuli akamulalusya umwana wache u Yonatani akati, “Nkimba choni chicho umwana uwa Yese atiziteko kulusekelo ulu manyi mumabwila pamo ilelo?”

²⁸ U Yonatani akamwamula akati, “U Devedi akandaba ukuti imwitikizye abwele kukaya ku Betelehemu.

²⁹ Akati, ‘Nalamba unyitikizye ukuti imbwele pachifukwa ichakuti abaluko lwane bali nu lusekelo ulwakubika ichakwiyipa mukaya kala, po uwamwitu akandamula ukuti mupaka imbepo palusekelo lula. Nanti ungampelela ichisa unyitikizye imbwele ukuti imbennye abawamwitu.’ Ichi cho chifukwa atiziteko pakulya poka nu mwene.”

³⁰ Po u Sabuli akamukalalila nkani u Yonatani, umwakuti akamubuzya akati, “Wee mwana umupunganu nu wakunsambukila! Fwandi ukwennya ngati ntakuzimanya ukuti uli kulubazu ulwa mwana uwa Yese, pakwikozya wemwene isoni, poka nu nyoko?

³¹ Nkimba utakuzyaghannya ukuti nanti umwana uwa Yese achili mumi, utakwiza pakuba nalumo we mwene uwa chisu ichi? Losi ulu tuma abantu ukuti bamusende bize nawe kuno ukuti afwanje.”

³² U Yonatani akamulalusya uwise akati, “Nkimba choni chicho afwanje? Nkimba ananga choni?”

³³ Loli u Sabuli akamusumbila u Yonatani impalala yache ukuti amughoghe. Po u Yonatani akazyaghannya ukuti uwise akalondagha naloli pakumughogha u Devedi.

³⁴ Po u Yonatani akanyamuka pitebulo pala ni lyoyo nkani, umwakuti pisiku ilyabubili ilya Kupanta ukwa Mwezi lila atakalyapo ichintu nachimochimo pachifukwa ichakuti akaba ni chitima nkani, pakuti uwise akamusamula nkani u Devedi.

³⁵ Pandabindabi, u Yonatani poka nu mulumendo bakabuka kumaghunda ukuti akomane nu Devedi.

³⁶ Akamubuzya umulumendo yula akati, “Chimbila kasende utulasilo tuto nkwiza pakutusumba.” Bo umulumendo akuchimbila, u Yonatani akasumba akalasilo pantazipo pa mulumendo yula.

³⁷ Bo umulumendo afika papo akalasilo kala kakawila, u Yonatani akakolomoka akati, “Weya wee, akalasilo kali pantazi papako.”

³⁸ Po u Yonatani akakolomoka sona akati, “Lubilo, chimbila. Utakazyelaye!” Umulumendo akaseba akalasilo kala nukunyokela nako kwa Yonatani.

³⁹ Umulumendo yula atakamanyapo nachimochimo, loli u Yonatani nu Devedi bo babo bakazimanyagha.

⁴⁰ Po u Yonatani akamupa umulumendo yula ivilwilo vyache nukumubuzya ukuti, “Bwelagha navyo mukaya.”

⁴¹ Bo umulumendo yula abwela, u Devedi akafumamo muchibunga icha mabwe chila, akakupama pasi katatu pamaso pa Yonatani. Po u Devedi nu Yonatani bakalilagha bo bakufyofyontana, loli u Devedi weyuyo akalila nkani.

⁴² U Yonatani akamubuzya u Devedi akati, “Wende akiza pakuti twalapa ichilapo mwitabwa ilya Mwene pakunena ukuti, ‘U Mwene we kaboni pakasi papako nane, sona napa baluko lwako na baluko lwane bwila na bwila’ ” U Devedi akanyamuka nukubuka, po wepe u Yonatani akabwela kukaya akakulu nkani.