1 Samuweli 2 - IBAYIBOLO 2024

Ulwimbo ulwa Hana

¹ U Hana akiputa akati, “Umoyo wane ghuhobokite mwa Mwene ulupembe lwane lwaba na maka mwa Mwene. Umulomo wane ghukwituvya pa balwani bane, pakuti nhobokite pachifukwa ichakuti ukampoka!

² “Atalipo nayumo yuyo muzelu ngati we Mwene, sona ataliko nayumoyumo yuyo ayanite nawe. Litalipo nalimolimo ilyalabwe ilinji, lilyo liyanite nu Chala witu.

³ “Muleke pakwitutumula, sona amalomo ghinyu ghatakituvyanje. Pakuti u Mwene we Chala, yuyo azimenye imbombo izya bantu, sona akwiza pakubalonga ukuyana ni mbombo zyabo.

⁴ “Ubwele ubwa basilikali abamaka bwapyoka loli abantu babo bakipunula,” ilelo bali na maka nkani.

⁵ Abantu babo kale bakikuta ilelo bakulaba ichakulya. Loli babo bakaba nizala, ilelo bakwikuta. Umukolo yuyo akaba mughumba, ilelo apapa abana seveni. Loli umukolo yuyo akapapa abana abinji, ilelo asyala bulo mwene.

⁶ “U Mwene akubafyula abantu ubumi nukubunyosezya papo. Akubasendela abantu mwipumpa nukubazyusya.

⁷ U Mwene akubapela bamo pakuba bapina, sona abanji pakuba bakabi. Akubisya bamo, sona abanji akubakwezya.

⁸ Akubakwezya abapina ukufuma palufumbi, nukubanyamusya abapotwe ukufuma pachituntululu icha itoyi. Akubikazya poka na bamwene, nukubapa ichitengo icha muchizi. “Ulwalo ulwa chisu ichapasi lwa Mwene, sona akachikazya ichisu ichapasi palwalo lulalula.

⁹ Akwiza pakuzizighilila inyayo izya bantu bache abasubiliwa. Loli abantu ababibi bakwiza pakuba bulo myee muchisi. “Umuntu atangapota na maka aghache na ghache.

¹⁰ Abantu babo bakususannya nu Mwene, bakwiza pakuzimila, sona akwiza pakubapayila ukufuma kumwanya. U Mwene akwiza pakubalonga mupaka kubumalilo ubwa chisu ichapasi. “Akwiza pakumupa amaka u mwene wache, nukughakwezya amaka agha lupembe ulwa mupakiwa wache.”

¹¹ Po u Elikana akabwela ku Lama. Loli umulumendo u Samuweli akasyala ku Shilo kulakula pakumubombela u Mwene pasi pa umuputi u Eli.

Nizya bana ababibi aba Eli

¹² Abana aba Eli bakaba babibi nkani, babo batakamuchindikagha u Mwene.

¹³ Lukaba lwiho ulwa baputi ku bantu ulwakuti nanti umuntu yumo akulonda pakubika ichakwiyipa, sona nanti bali pakupiya inyama, uwambombo uwa muputi akizagha ni foloko iya mino matatu.

¹⁴ Akayinjizya ifoloko yila musonta, po chosi chicho ifoloko yila yikalasa, umuputi akachisendagha pakuba chache. Umu momumo abana aba Eli bakababombelagha aba Izilayeli bosi, babo bakizagha ku Shilo.

¹⁵ Ukonjelezyapo bo na mafuta ghatochiwe, uwambombo uwa muputi akizagha nukumubuzya umuntu yuyo akabikagha ichakwiyipa ukuti, “Mpanga inyama, imochele umuputi pakuti atakwiza pakuyipokela inyama yinyu impiye, loli yene imbisi.”

¹⁶ Nanti umuntu yula amula ukuti, “Ocha tasi amafuta, po ungasenda ukuyana namumo ukulondela.” Po uwambombo uwa muputi yula akamulagha akatinji, “Awe! Mpanga losi ulu. Nanti ukukana, nkwiza pakuyisenda pamaka!”

¹⁷ Imbibi iya bana aba Eli iyi yikaba nkulu nkani pamaso pa Mwene pachifukwa ichakuti bakachisamula ichakwiyipa icha Mwene.

U Samuweli mu Shilo

¹⁸ Loli u Samuweli akamubombelagha u Mwene, bo avwalite u efodi umutonte.

¹⁹ Umwaka nu mwaka unyina akamusonelagha inkazo inandi nukubuka nayo pakumupa, bo akubuka nu mulume wache pakubika ichakwiyipa icha mwaka nu mwaka.

²⁰ U Eli akamusayagha u Elikana nu muchi wache nukuti, “U Mwene akupe abana abanji mu mukolo yunuyu, ukuti asende ubuzilo ubwa yuyo ukamupa u Mwene.” Pisinda pache bakabwelagha kunyumba.

²¹ Po u Mwene akamusaya u Hana, umwakuti akapapa abana abanji fayivi, abalumendo batatu na balindu babili. Pakabalilo kanaka umulumendo u Samuweli akakula, bo akumubombelagha u Mwene.

U Eli na bana bache

²² Pakabalilo kalakala u Eli akaghosipa nkani, po akivwanga zyosi zizyo abana bache bakababombelagha aba Izilayeli, sona nukuti abana bache bala bakaghonanagha na bakolo, babo bakabombagha imbombo pamulyango uwa Chisakasa icha Mwene.

²³ Po akabalalusya abana bache bala akati, “Mwee bana bane, nkimba choni chicho mukubomba bunubu? Abantu bosi bakumbuzya ivintu vyosi ivibibi vivyo mukubomba.

²⁴ Awe, bana bane! Ipangwi lilyo likusata pakasi pabantu aba Mwene te lyiza.

²⁵ Nanti umuntu akumunangila uwamwabo, u Chala angamwimila. Loli nanti umuntu akumunangila u Mwene, nkimba wewenu angamwimila uwamwabo yula?” Pope bulo abana bala batakamwivwila uwise, pakuti bukaba bwighane ubwa Mwene ukuti abaghoghe abana bala.

²⁶ Pakabalilo kosi kanaka umulumendo u Samuweli akakulagha mumusinku, sona akamuhobosya u Mwene, poka na bantu bulo.

Ubulaghuzi nizya abamunyumba iya Eli

²⁷ Isiku limo umubombi uwa Chala akiza kwa Eli nukumubuzya ukuti, “U Mwene ati, ‘Nkimba ane ntakivumbula nemwene ku munyenya wako u Aloni, poka na bamunyumba yache, pakabalilo kako bakaba bazya aba Falabo mu Ijiputi?

²⁸ Nkamusala umunyenya wako pakasi pa inko zyosi izya ba Izilayeli pakuba muputi wane, ukuti bambombele pachighemo chane, pakufukizya utwakununkila, sona nukuti bavwalaye u efodi pamaso papane. Sona nkabapa ubulaghili ubwakusungila ichigaba icha chakwiyipa ichakocha.

²⁹ Po nkimba choni chicho ukuvisamula ivyakwiyipa vyane, vivyo nkalamula ukuti vibanje vya munyumba yane? Nkimba choni chicho ukubachindika abana bako ukunchila ane pakwiyinizya mwebene ni vigaba ivyiza nkani ivya vyakwiyipa vivyo abantu bane bakubika?

³⁰ “ ‘Ane ne Mwene u Chala uwa Izilayeli nkabalayizya abamunyumba yako na baluko lwako ukuti bakwiza pakuba baputi bane bwila na bwila. Losi ulu ntakulonda sona! Loli nkwiza pakubachindika abantu babo bakunchindika, loli abantu babo batakunchindika nane bulo ntakwiza pakubachindika.

³¹ Naloli akabalilo kakwiza kako nkwiza pakuchefyako amaka ghako, sona na maka agha bamunyumba iya ghuso, umwakuti patakabepo nayumoyumo umuntu umughosi munyumba yako.

³² Ukwiza pakuba muntamyo nkani, umwakuti ukwiza pakulwennya na kabini ulusayo losi lulo nkwiza pakubapa aba Izilayeli abanji, sona patakwiza ukubapo nayumoyumo umuntu umughosi munyumba yako.

³³ Pope bulo nkwiza pakumuleka mumi yumo uwaluko lwako pakuba muputi wane. Loli akwiza pakuba muntu umufwamaso nu musita ulusubilo, sona abaluko lwako abanji bosi bakwiza pakufwa kubwite ubwakoghofya, bo bachili balumendo.

³⁴ “ ‘Po chicho chikwiza pakubawila abana bako babili bala u Hofini nu Finehasi, chikwiza pakuba chimanyilo kukwako. Abana babili banaba bakwiza pakufwa pisiku lyoka.

³⁵ Po pisinda pache nkwiza pakwisalila nemwene umuputi umusubiliwa, yuyo akwiza pakubomba zizyo nkulonda. Nkwiza pakuyikazya nkani inyumba yache, sona akwiza pakumubombela umupakiwa wane akabalilo kosi.

³⁶ Po umuntu wesi uwa munyumba yako, yuyo akwiza pakupona akwiza pakumufughamilila umuputi yunuyu nukumulaba indalama pamo ichakulya nukuti, “Unyitikizye pakuba ne muputi, umwakuti inchaghilayemo ichakulya.” ’ ”