1 Samuweli 19 - IBAYIBOLO 2024

U Sabuli akulonda pakumughogha u Devedi

¹ U Sabuli akamulamula umwana wache u Yonatani, poka na makambala ghache ghosi ukuti bamughoghe u Devedi. Loli u Yonatani akamughana nkani u Devedi.

² Po akamuyebela u Devedi akati, “Weya wee, utata wane akulonda pakukughogha. Indabi pandabindabi uchebaye nkani, ubuke pakuvwama nukwikala kulakula.

³ Nkwiza pakwima papipi nu tata wane mumughunda, mumo ukwiza pakuvwama. Po nkwiza pakunenezannya nawe nizya awe, sona nkwiza pakukubuzya zizyo akwiza pakunena.”

⁴ U Yonatani akanena ubwiza ubwa Devedi pamaso pa wise nukuti, “Wee mwene, utakamubombele nachimo ichibibi umubombi wako u Devedi, pakuti atakunangiyepo nachimo, sona vyosi vivyo abombagha vyakwavwa nkani.

⁵ Akabika ubumi bwache pachulu pakughogha umu Filisiti yula. U Mwene akabomba ivintu ivikulu nkani ukuti aba Izilayeli bapote ubwite. Awe ukavyennya vinivi, sona ukahoboka nkani navyo. Po nkimba choni chicho ukulonda pakumubombela ichintu ichibibi umuntu umusita nongwa pakulonda ukumughogha u Devedi?”

⁶ U Sabuli akamuteghelezya u Yonatani, po akalapa akati, “Mwitabwa ilya Mwene umumi u Devedi atakwiza pakughoghiwa.”

⁷ Po u Yonatani akamwitizya u Devedi nukumubuzya zyosi zizyo akanenezannya nu wise. U Yonatani akiza nu Devedi pamaso pa Sabuli, po u Devedi akamubombela imbombo ngati po pakwanda pala.

⁸ Pakabalilo kamo pakabapo sona ubwite. Po u Devedi akalwa ubwite naba Filisiti nukubaghogha aba Filisiti abinji nkani, umwakuti bakachimbila.

⁹ Umuzimu umubibi uwakufuma kwa Mwene ghukamwinjila u Sabuli, bo ikaye munyumba yache, sona akaba ni mpalala munyobe yache. U Devedi akaba mulamula, sona akalizya ipango lyache.

¹⁰ Po u Sabuli akayezya pakumukomela kulubumba ni mpalala yila, loli u Devedi akayileghuka, sona impalala yikalasa ulubumba. Ubusiku bulabula u Devedi akachimbila nukupona.

¹¹ Ubusiku bulabula u Sabuli akabatuma abantu kunyumba iya Devedi nukumuvwamilila pandabindabi. Loli umuchi u Mikali akamusoka u Devedi akati, “Nanti utakuchimbila ubusiku ubu, indabi ukwiza pakufwa.”

¹² U Mikali akamufumizya u Devedi pibwindo, po u Devedi akachimbila nukupona.

¹³ U Mikali akasenda ichifwani nukuchilambalika pachitala, akachibika ichinulilo icha meya agha mbuzi kumutu, sona akachivwinka nu mwenda.

¹⁴ Bo abantu aba Sabuli bafika ukuti bamuleme u Devedi, u Mikali akababuzya akati, “U Devedi abinite.”

¹⁵ Po u Sabuli akabatuma sona abantu bala ukuti bamwennye u Devedi nukubabuzya ukuti, “Mwize nawe kuno, bo alambalaye pachitala chache umwakuti imughoghe.”

¹⁶ Loli bo abantu bala binjila, bakachennya ichifwani pachitala pala, sona kumutu kukaba ichinulilo icha meya agha mbuzi.

¹⁷ U Sabuli akamulalusya u Mikali akati, “Nkimba choni chicho ukanzimbula pakumwitikizya umulwani wane ukuti achimbile?” U Mikali akamwamula akati, “U Devedi akambuzya akati, ‘Nanti utakunyitikizya ukuti inchimbile, nkwiza pakukughogha.’ ”

¹⁸ Bo u Devedi apona, akabuka kwa Samuweli mu Lama nukumubuzya vyosi vivyo u Sabuli akamubombela. Po u Devedi nu Samuweli bakabuka ku Nayoti nukwikala kulakula.

¹⁹ U Sabuli akivwa ukuti u Devedi akaba mu Nayoti mu Lama.

²⁰ Po akabatuma abantu ukuti bamuleme. Loli bo bennya akabukatila aka balaghuzi kali pakulaghula, sona nukuti u Samuweli akaba mulongozi wabo, Umuzimu uwa Chala akabinjila abantu bala, po bope bakanda pakulaghula.

²¹ Bo u Sabuli ivwa zinizi, akabatuma sona abantu abanji, bope bakanda pakulaghula. Po u Sabuli akabatuma sona abantu akabutatu, bope bakanda pakulaghula.

²² Pabumalilo u Sabuli umwenecho akabuka ku Lama kulakula. Bo afika pachiziba ichikulu nkani mu Seku, akalalusya akati, “Nkimba u Samuweli nu Devedi bali kwiyi?” Umuntu yumo akamwamula akati, “Bali ku Nayoti ku Lama.”

²³ Bo u Sabuli akubuka ku Nayoti, Umuzimu uwa Chala ghukamwinjila, po wepe akanda pakulaghula mupaka ku Nayoti.

²⁴ U Sabuli akavula inkazo yache nukwanda pakulaghula pamaso pa Samuweli. Akaghona nkule pamusanya na pabusiku bula. Ichi cho chifukwa abantu bakunena ichili ichakuti, “Fwandi u Sabuli wepe wa bamo uwa ba balaghuzi?”