1 Samuweli 18 - IBAYIBOLO 2024

¹ Bo u Devedi amala pakunenezannya nu Sabuli, u Yonatani nu Devedi bakaba pabumanyani ubwenecho, umwakuti u Yonatani akamughana nkani u Devedi ngati mumo akiyighanila mwene.

² Ukwandila pisiku lilalila u Sabuli akamusungagha u Devedi munyumba yache, sona atakamwitikizya ukuti anyokele kunyumba iya wise.

³ Po u Yonatani akafingana ulufingo nu Devedi, pachifukwa ichakuti akamughana nkani ngati mumo akiyighanila mwene.

⁴ U Yonatani akavula inkazo yiyo akavwalagha nukumupa u Devedi, poka ni vyakuvwala ivya bwite nupanga nubwele sona nulamba wache.

⁵ Kosi kuko u Sabuli akamutumagha pakulwa ubwite, u Devedi akabapotagha abalwani bache. Po u Sabuli akamubika pakuba we songo uwa basilikali bache bosi. Ichi Chikabahobosya nkani abantu bosi, poka na makambala agha Sabuli.

U Sabuli ali na kabini nu Devedi

⁶ Bo abantu bakubwelako kubwite, kuko u Devedi akamughogha umu Filisiti yula, abakolo bakafumila kuzi mutwaya tosi utwa mu Izilayeli pakukomana nu mwene u Sabuli, bo bakwimba nukujina ukuti bamupokele u mwene wabo u Sabuli. Bakimbagha inyimbo izyakulanjizya ukuhoboka kwabo, sona bakalizya ivisekeseke na mapango.

⁷ Abakolo bala bakimbagha bakatinji, “U Sabuli abaghogha abantu amasabuzani bulo, loli u Devedi abaghogha abantu 10,000.”

⁸ Ichi chitakamuhobosya u Sabuli, sona chikamukalalizya nkani. Po akati, “Bakumupala u Devedi ukuti abaghogha abantu ama 10,000, loli nizya ane bakuti naghogha abantu amasabuzani bulo. Nkimba po choni chicho chasyalapo, te pakunfyula ubumwene bwane?”

⁹ Po ukwandila pakabalilo kalakala u Sabuli akamwennyanga u Devedi ni lyiso ichesamu.

¹⁰ Indabi yache umuzimu umubibi uwakufuma kwa Chala ghukamwinjila u Sabuli. Po akanda pakulolota munyumba yache, bo u Devedi akulizya ipango ngati mumo akabombelagha bwila. U Sabuli akaba ni mpalala munyobe yache,

¹¹ po akayisumba nukwinong'ona ukuti, “Nkwiza pakumulasa u Devedi mupaka nukumukomela kulubumba.” Loli u Devedi akayileghuka kabili kosi.

¹² U Sabuli akanda pakumunyila u Devedi pachifukwa ichakuti u Mwene akaba nawe, loli akamukana u Sabuli.

¹³ Po u Sabuli akamwefyapo pamaso papache nukumutuma pakuba we songo uwa basilikali 1,000. U Devedi akabalongolelagha abasilikali bala.

¹⁴ U Devedi akapotagha nkani muvyosi, pachifukwa ichakuti u Mwene akaba nawe.

¹⁵ Bo u Sabuli ennya ukuti u Devedi akupota muvyosi, akanda pakumunyila nkani.

¹⁶ Loli aba Izilayeli, naba Yuda bosi bakamughana nkani u Devedi pachifukwa ichakuti akapotagha nkani kubwite.

U Devedi akumusenda umwana uwa Sabuli

¹⁷ Po u Sabuli akamubuzya u Devedi akati, “Nakupa u Melabu, umwana wane usongo uyu ukuti abanje muchi wako. Loli umbombelaye nu bujivu pakulwa ubwite ubwa Mwene.” Pakuti u Sabuli akinong'onagha akati, “Ntakwiza pakumughogha ni nyobe iyane ni yane, loli baleke aba Filisiti bamughoghe.”

¹⁸ Loli u Devedi akamulalusya u Sabuli akati, “Nkimba ane ne wenu, sona abamunyumba iya tata bo bawenu muchisu icha Izilayeli ukuti imbanje ne mukwalima uwa mwene?”

¹⁹ Loli bo akabalilo kakwana akakuti u Devedi asendane nu Melabu, mubuzilo bwache uwise akamupa u Adiliyeli uwaku Mehola ukuti abanje muchi wache.

²⁰ Loli u Mikali umwana umulindu uwa Sabuli akamughana nkani u Devedi, sona bo u Sabuli ivwa zinizi akahoboka nkani.

²¹ U Sabuli akati, “Nkwiza pakumupa u Mikali ukuti abanje chipingo, umwakuti aba Filisiti bamughoghe.” Po u Sabuli akamubuzya u Devedi akabubili akati, “Losi ulu ukwiza pakuba we mukwalima wane.”

²² U Sabuli akaghalamula amakambala ghache akati, “Mumuteketele u Devedi muti, ‘Umwene u Sabuli ahobokite nkani nawe, sona ghope amakambala ghache ghakughanite nkani. Polelo ubanje we mukwalima wache.’ ”

²³ Po amakambala ghala ghakamubuzya u Devedi amazyu ghanagha. Loli u Devedi akanena akati, “Fwandi mukuchisenda chintu chipepe nkani pakuba mukwalima uwa mwene? Ane ne muntu umupina, sona te nemumanyikwe napo panandi.”

²⁴ Bo amakambala ghala ghamubuzya u Sabuli zizyo u Devedi akanena,

²⁵ u Sabuli akamula akati, “Mumubuzye u Devedi muti, ‘Umwene atakulonda ubwimazu nabumobumo, loli twene utukwela utwakuntazi kunkule izya banavuli 100 aba ba Filisiti, ukuti imbatanizizye abalwani bane.’ ” U Sabuli akabatika ukuti aba Filisiti bamughoghe u Devedi.

²⁶ Bo amakambala ghala ghamubuzya u Devedi zizyo u Sabuli akanena, u Devedi akahoboka nkani pakuba mukwalima uwa mwene. Bo akabalilo akakuti amusende umuchi katakwanite,

²⁷ u Devedi akabuka poka na bantu bache nukubaghogha aba Filisiti 200. Po akiza nato utukwela tula nukumupa u mwene umwakuti angaba mukwalima wache. U Sabuli akamupa umwana wache u Mikali ukuti abanje muchi wache.

²⁸ Bo u Sabuli azyaghannya ukuti u Mwene akaba nu Devedi, sona nukuti umwana wache umulindu u Mikali akamughana nkani u Devedi,

²⁹ u Sabuli akendelela pakumunyila nkani u Devedi, umwakuti u Devedi akaba mulwani wache mubumi bwache bosi.

³⁰ Abasilikali aba ba Filisiti bakabukagha pakulwa ubwite, loli akabalilo kosi u Devedi akapotagha ukughachila amakambala aghanji ghosi agha Sabuli. Po itabwa ilya Devedi likamanyikwa nkani.