1 Samuweli 17 - IBAYIBOLO 2024

U Goliyati akubasamula aba Izilayeli

¹ Pakabalilo kalakala aba Filisiti bakababungannya abasilikali babo pa Soko muchisu icha Yuda pakulwa ubwite. Bakazenga ivisakasa vyabo pa Efeso Damimu, pakasi pa kaya aka Soko naka Azeka.

² U Sabuli akababungannya poka aba Izilayeli, po bakazenga ivisakasa vyabo mwikombe ilya Ela, nukubabambika abasilikali babo pakulwa ubwite naba Filisiti.

³ Aba Filisiti bakaba pighamba limo, bo aba Izilayeli bali pighamba ilinji, sona pakasi pakaba ikombe.

⁴ Po umuntu uwamaka nkani, yuyo akaba we Goliyati uwamu Gati akafuma muvisakasa ivya ba Filisiti. Ubutali bwache bukaba amamita matatu.

⁵ Akavwalagha ichisote icha mukuba, sona ni laya ilya chela lilyo likang'wamagha amakilogalamu 57.

⁶ Akavwalagha ivyakuzighila ivinama ivya mukuba, sona akanyamulagha impalala iya mukuba pachipunko chache.

⁷ Amino agha mpalala yila ghakaba ngati chikwi ichakulukila amenda chicho ubung'wamu bwache bukaba pipipipi amakilogalamu seveni. Pantazi papache pakendagha umuntu uwakumunyamulila ingulu.

⁸ U Goliyati akimilila nukubakolomokela abasilikali aba ba Izilayeli ukuti, “Nkimba choni chicho mwiza mwe binji nkani pakulwa ubwite? Ane ne mu Filisiti, sona amwe mwe bazya aba Sabuli? Musale umuntu weka ukuti alwe nane.

⁹ Nanti angalwa nane nukungogha, aswe tukwiza pakuba twe bazya binyu. Loli nanti namupota, nukumughogha, amwe mukwiza pakuba mwe bazya bitu nukutubombela.”

¹⁰ Po umu Filisiti yula akati, “Umusanya ughu nkubasamula abasilikali aba ba Izilayeli! Mpanga umuntu ukuti alwe nane.”

¹¹ Bo u Sabuli poka naba Izilayeli bosi bivwa amazyu agha mu Filisiti yula, bakanyila nkani nukutetema.

U Devedi afika muvisakasa ivya Sabuli

¹² U Devedi akaba mwana uwa Yese umu Efulayimu uwamu Betelehemu muchisu icha Yuda. U Yese akaba na bana abalumendo eyiti, sona pakabalilo aka Sabuli kalakala, u Yese akaba muntu umughosi nkani.

¹³ Abana abasongo batatu aba Yese bakaba poka nu Sabuli kubwite. Abana banaba bakaba bo aba: U Eliyabu umwana wache ukatote nu Abinadabu umwana wache uwabubili, sona nu Shama umwana wache uwabutatu.

¹⁴ U Devedi akaba we nkwangu. Abana bache batatu abasongo bala bakaba poka nu Sabuli kubwite.

¹⁵ Loli u Devedi akabukagha kuvisakasa kula nukunyokako, pakuti akadimagha ing'ozi izya wise mu Betelehemu.

¹⁶ U Goliyati umu Filisiti yula akababechelagha aba Izilayeli pandabindabi na pachamabwila posi amasiku 40.

¹⁷ Isiku limo u Yese akamubuzya umwana wache u Devedi akati, “Ubasendele abawamwinyu amakilogalamu 10 agha amapemba aghakukazinga ni vibama 10 ivi, buka navyo lubilolubilo kuvisakasa vyabo.

¹⁸ Umusendele sona usongo uwa basilikali amafuta agha lukama. Buka wennye namumo abawamwinyu babeleye, po wize nacho chimo chisimikizyo ichakuti bali akiza.

¹⁹ Abawamwinyu bali mwikombe ilya Ela poka nu Sabuli, sona naba Izilayeli pakulwa ubwite naba Filisiti.”

²⁰ Pandabindabi nkani u Devedi akamulekela umudimi ing'ozi. Akasenda ivyakulya nukubuka ngati mumo u Yese akamubuzizya. Akafika kuvisakasa kula, bo abasilikali bakubuka mubuzilo bwabo ubwa bwite, kuno bakukolomoka inkolo iya bwite.

²¹ Aba Izilayeli naba Filisiti bakababambika abasilikali babo umwakwenannya.

²² U Devedi akamulekela umusungilili ivyakulya vila, po akachimbilila kuko kukaba abasilikali nukubalamuka abawamwabo bala.

²³ Bo ali pakunenezannya nabo, akamwennya u Goliyati umu Filisiti uwamaka uwamu Gati yula akufuma pakasi pabasilikali aba ba Filisiti nukwanda pakubabechela aba Izilayeli ngati mumo akababechelelagha bwila, po u Devedi akamwivwa.

²⁴ Nanti aba Izilayeli bamwennya bulo umuntu yula, bakamuchimbilagha pachifukwa ichakuti bakamunyilagha nkani.

²⁵ Aba Izilayeli bala bakati, “Nkimba mukwennya namumo umuntu uyu alindiye bulo pakubabechela aba Izilayeli? Umuntu wesi yuyo angamughogha, u mwene akwiza pakumupa ichuma ichinji nkani. Akwiza pakumupa umwana wache umulindu ukuti abanje muchi wache, sona abamunyumba iya wise batakwiza pakusonkagha nalumo umusonko.”

²⁶ U Devedi akabalalusya abantu babo bakaba papipi nawe akati, “Nkimba akwiza pakumubombela ichoni umuntu yuyo angamughogha umu Filisiti yunuyu nukubefya isoni aba Izilayeli? Nkimba umu Filisiti umusita kusilimuliwa uyu wewenu, ukuti abasamule abasilikali aba Chala umumi?”

²⁷ Abantu bala bakamubuzya sona u Devedi zizyo bakamubuzya pakwanda zizyo u mwene akanena ukuti akwiza pakumubombela umuntu yuyo angamughogha umuntu yunuyu.

²⁸ Bo u Eliyabu, umukulu uwa Devedi amwivwa akunena na bantu bala, akamukalalila nkani, po akamulalusya akati, “Nkimba wiza pakubomba choni kuno? Nkimba ing'ozi wamulekela uwenu mukunkolongo mula? Inzimenye ukuti awe we muntu uwakwitutumula, sona we muntu umubibi nkani. Awe wiza kuno pakwennya bulo ubwite!”

²⁹ U Devedi akamwamula akati, “Nkimba nananga choni? Ane nalalusyanga bulo.”

³⁰ Po u Devedi yula akaghalabuka nukumulalusya umuntu uyunji ilalusyo lilalila, sona umuntu wesi akamwamula ngati mumo bakamwamulila pakwanda pala.

³¹ Abantu bakaghivwa amazyu agha Devedi, nukumulingannya u mwene u Sabuli, po u mwene yula akamwitizya u Devedi.

³² U Devedi akamubuzya u Sabuli akati, “Wee mwene, patakabepo nayumoyumo umuntu uwakumunyila umu Filisiti uyu. Ane ne wambombo wako nkwiza pakulwa nawe.”

³³ U Sabuli akamwamula akati, “Awe utangalwa nawe umu Filisiti uyu, pakuti uchili we mwana munandi, sona izubiye pakulwa ubwite ukwandila ko kubwana bwache.”

³⁴ Loli u Devedi akamubuzya u Sabuli akati, “Ane ne wambombo wako nadimagha ing'ozi izya tata. Nanti inkalamu yafika pamo ulabwe nukulemapo umwana uwa ng'ozi,

³⁵ ane nkachichimbizyanga ichinyamana chila nukuchighogha mupaka nukumupoka umwana uwa ng'ozi yula. Po nanti changalabukila ikuti chindeme, nkachilemagha kusingo mupaka nukuchighogha.

³⁶ Ane ne wambombo wako naghoghapo inkalamu na balabwe, po umu Filisiti umusita kusilimuliwa uyu nkwiza pakumughogha ngati mumo nkavighoghelagha ivinyamana vila, pachifukwa ichakuti akubasamula abasilikali aba Chala umumi.

³⁷ U Mwene yuyo akampoka ku nkalamu naku balabwe, akwiza pakumpoka munyobe izya mu Filisiti yunuyu.” Po u Sabuli akamubuzya u Devedi akati, “Bukagha, u Mwene abanje nawe.”

³⁸ U Sabuli akamuvwalika u Devedi ivyakuvwala vyache ivya bwite, sona ni chisote icha mukuba.

³⁹ U Devedi akamupinyilila upanga mumusana, nukuyezya pakwendakwenda, loli akapotwa, pachifukwa ichakuti atakizubizannya navyo. Po akamubuzya u Sabuli akati, “Ntangakwanisya pakwenda navyo, pachifukwa ichakuti intizubizanizye navyo.” Po akavula ivyakuvwala ivya bwite vila.

⁴⁰ Akasenda indisa munyobe yache, nukuseba isangalabwe izya mabwe fayivi mulusoko nukuzibika munyambi yache iyakudimila ing'ozi. Bo asenda ifyata yache, akabuka pakukomana nu mu Filisiti yula.

U Devedi akumupota u Goliyati

⁴¹ Pakabalilo kalakala umu Filisiti yula akanda pakumupalamila u Devedi, bo umuntu uwakumunyamulila ingulu yache ali pantazi papache.

⁴² Bo umu Filisiti amwennya u Devedi yula, akanda pakumusamula, pachifukwa ichakuti akaba muchesamile, sona uwakuboneka akiza nkani.

⁴³ Akamulalusya u Devedi akati, “Fwandi ne mbwa, ukuti unyizile ni ndisa?” Po umu Filisiti yula akamughuna u Devedi pakutambula amatabwa agha bachala bache.

⁴⁴ Akamubuzya u Devedi akati, “Zagha kuno, nkwiza pakuvisumbila iviyuni ni vinyamana umuvimba wako.”

⁴⁵ Loli u Devedi akamubuzya umu Filisiti yula akati, “Awe ukwiza kukwane nupanga ni mpalala sona ni ntughu loli ane nkwizila mwitabwa ilya Mwene Uwamaka Ghosi, u Chala uwa basilikali aba ba Izilayeli, yuyo wamusamula.

⁴⁶ Umusanya ughu u Mwene akwiza pakukubika munyobe zyane sona nkwiza pakukukoma nukukudumula umutu. Umusanya ughu nkwiza pakuvisumbila iviyuni ni vinyamana imivimba iya basilikali aba Filisiti, sona ichisu chosi ichapasi chikwiza pakumanya ukuti mu Izilayeli alimo u Chala.

⁴⁷ Abantu bosi babo babungana pano bakwiza pakuzimanya ukuti u Mwene atakumupoka umuntu pakubombezya upanga pamo impalala. Pakuti u Mwene weyuyo akulwa ubwite, sona akwiza pakubabika mwebosi munyobe zyitu.”

⁴⁸ Bo umu Filisiti yula akupalamila ukuti ande pakulwa nu Devedi, u Devedi akachimbilila lubilolubilo ku muzele uwabwite ukuti alwe nawe.

⁴⁹ Akatumya munyambi yache yila nukusendamo ibwe, akawesa ifyata nukumulasa umu Filisiti yula pacheni. Ibwe lila likinjila mumutu, po akawa pasi umwakukupama.

⁵⁰ U Devedi akamupota umu Filisiti yula pakubombezya ifyata sona nibwe. Atakaba nupanga munyobe yache.

⁵¹ U Devedi akachimbila nukwima pamwanya pa mu Filisiti yula, akawesa upanga uwamu Filisiti yula munyambi yache. Bo amughogha, po akadumula umutu wache nupanga. Bo aba Filisiti bennya ukuti umuntu uwamaka yula aghoghiwa, bakachimbila.

⁵² Abasilikali aba ba Izilayeli naba ba Yuda bakanyamuka nukukolomoka pakubachimbizya aba Filisiti bala mupaka ku Gati na kubumalilo ubwa Ekiloni. Imivimba iya ba Filisiti yikaba posi na posi ukwandila ku Shalayimu mupaka ku Gati na ku Ekiloni.

⁵³ Bo aba Izilayeli banyokako pakubachimbizya aba Filisiti, bakafyula ivintu muvisakasa vyabo.

⁵⁴ U Devedi akaghusenda umutu uwamu Filisiti yula nukubuka nagho ku Yelusalemu, loli akavisunga ivilwilo ivya mu Filisiti yula muchisakasa chache.

⁵⁵ Bo u Sabuli akumwennya u Devedi akubuka pakulwa nu mu Filisiti yula, akamulalusya u Abinala, usongo uwa basilikali bache akati, “Nkimba umulumendo uyu mwana wawenu?” U Abinala akamwamula akati, “Wee mwene, nkulapa mwitabwa lyako ukuti ntamumenye.”

⁵⁶ U mwene u Sabuli akati, “Buzikizya, umulumendo yunuyu mwana wawenu.”

⁵⁷ Bo u Devedi anyokako pakumughogha umu Filisiti yula, u Abinala akiza nawe pamaso pa Sabuli, bo achili anyamuye umutu uwamu Filisiti yula.

⁵⁸ U Sabuli akamulalusya u Devedi akati, “Wee mulumendo, nkimba we mwana wawenu?” U Devedi akamula akati, “Ne mwana uwa mubombi wako u Yese uwamu Betelehemu.”