1 Samuweli 16 - IBAYIBOLO 2024

U Samuweli akumupakazya u Devedi

¹ U Mwene akamubuzya u Samuweli akati, “Nkimba ukwiza pakuba ni chitima nu Sabuli mupaka liyi, pakuti ane namukana ukuti atakabanje sona we mwene uwa ba Izilayeli? Losi ulu senda amafuta ubuke kunyumba iya Yese mu Betelehemu. Ane namusala yumo umwana wache umulumendo ukuti abanje we mwene.”

² U Samuweli akamulalusya u Mwene akati, “Nkimba ningabukako bulibuli? Nanti u Sabuli ivwa zinizi akwiza pakungogha!” U Mwene akamubuzya akati, “Bo ukubuka usende ing'ombe impampali, po unene uti, ‘Niza pakubika ichakwiyipa kwa Mwene.’

³ Umwitizye u Yese ukuti ize kuko ukubika ichakwiyipa, po nkwiza pakukubuzya izyakubomba. Umupakazye amafuta umuntu yuyo nkwiza pakukuvumbulila.”

⁴ U Samuweli akabomba zizyo u Mwene akamulamula. Bo afika mu Betelehemu, abalongozi aba mukaya kala bakatetemagha bo bakumupokela. Po bakamulalusya bakati, “Nkimba ukwiza kwako kwa mutende?”

⁵ U Samuweli akabamula akati, “Eee, kwa mutende. Niza pakubika ichakwiyipa kwa Mwene. Mwipaghule mwebene, tubukaye poka pakubika ichakwiyipa.” Po u Samuweli akamupaghula u Yese, poka na bana bache abalumendo, sona akabitizya ukuti babuke poka nawe pakubika ichakwiyipa.

⁶ Bo bafika, u Samuweli akamwennya u Eliyabu nukwinong'ona ukuti, “Naloli, umupakiwa uwa Mwene we uyu imiliye pamaso pa Mwene.”

⁷ Loli u Mwene akamubuzya u Samuweli akati, “Utakennyanje akabonekele kache, pamo ubutali bwache, pakuti ane namukana. U Mwene atakwennya ukuyana namumo abantu bakwenezezya. Abantu bakwennya akabonekele, loli u Mwene akwennya mumoyo.”

⁸ Po u Yese akamwitizya u Abinadabu ukuti ize pamaso pa Samuweli. Loli u Samuweli akati, “Awe, u Mwene atamusalitepo yunuyu.”

⁹ U Yese akamwitizya u Shama ukuti ize pamaso pa Samuweli. Loli u Samuweli akati, “Awe, u Mwene atamusalitepo yunuyu.”

¹⁰ Po u Yese akabitizya abana bache bosi seveni bala ukuti bize pamaso pa Samuweli. Loli u Samuweli akati, “U Mwene atamusalitepo nayumoyumo.”

¹¹ U Samuweli akamulalusya u Yese akati, “Nkimba aba bo bana bene babo uli nabo?” U Yese akamwamula akati, “Alipo unkwangu, loli ali pakudima ing'ozi.” U Samuweli akamubuzya akati, “Umutume umuntu ukuti abuke pakumusenda, pakuti tutangabika ichakwiyipa mupaka ize.”

¹² U Yese akamutuma umuntu pakumusenda, po akiza nawe. U Devedi akaba muchesamile, sona uwakaboneka akiza nkani. Po u Mwene akamubuzya u Samuweli akati, “Uyu weyuyo, umupakazye amafuta!”

¹³ U Samuweli akasenda amafuta nukumupakazya u Devedi pamaso pa bawamwabo bala. Po ukwandila pisiku lilalila umuzimu uwa Mwene akamwinjila u Devedi na maka. Pisinda pache u Samuweli akabwela ku Lama.

U Devedi akumubombela u Sabuli

¹⁴ Pakabalilo kalakala umuzimu uwa Mwene akepamo mwa Sabuli, sona umuzimu umubibi uwakufuma kwa Mwene ghukanda pakumutamya.

¹⁵ Abambombo bache bakamubuzya bakati, “Ennya, umuzimu umubibi uwakufuma kwa Chala ghuli pakukutamya.

¹⁶ Wee Songo, utwitikizye aswe twe bambombo bako ukuti tukulondele umuntu yuyo amenye pakulizya ipango. Umuntu yunuyu akwiza pakulizya ipango nanti umuzimu uwakufuma kwa Chala winjila mumwako, po ukwiza pakuba akiza sona.”

¹⁷ U Sabuli akababuzya abambombo bache bala akati, “Mundondele umuntu yuyo amenye pakulizya ipango, po mwize nawe kuno.”

¹⁸ Uwambombo wache yumo akati, “Umwana uwa Yese uwamu Betelehemu weyuyo amenye pakulizya ipango, sona muntu mujivu nkani pakulwa ubwite. Achebite nkani pamulomo, sona ali na kabonekele akiza nkani. U Mwene ali nawe.”

¹⁹ Po u Sabuli akamutumila intumi u Yese ukuti, “Untumile umwana wako u Devedi, umudimi uwa ng'ozi yula.”

²⁰ U Yese akasenda impunda, yiyo yikanyamula ivibama, ni nyambi inyizule nu vinyo, sona nu mwana uwa mbuzi, nukumutuma umwana wache u Devedi ukuti abuke navyo kwa Sabuli.

²¹ U Devedi akafika kwa Sabuli nukwanda pakumubombela. U Sabuli akamughana nkani, umwakuti akamusala pakuba wakumunyamulila ivilwilo vyache ivya bwite.

²² Po u Sabuli akamutumila amazyu u Yese aghakuti, “Umwitikizye u Devedi ukuti ambombelaye, pakuti nahoboka nawe nkani.”

²³ Pakabalilo kosi nanti umuzimu umubibi uwakutumiwa nu Chala winjila mwa Sabuli, u Devedi akasendagha ichinanda chache nukwanda pakulizya. Umuzimu umubibi ghukepamo, po u Sabuli akaba sona akiza.