1 Samuweli 15 - IBAYIBOLO 2024

U Sabuli akulwa ubwite naba Amaleki

¹ U Samuweli akamubuzya u Sabuli akati, “Ane ne muntu yuyo u Mwene akantuma ukuti nkupakazye amafuta ukuti ubanje we mwene uwa bantu bache aba Izilayeli. Po losi ulu ivwa amazyu agha Mwene.

² U Mwene Uwamaka Ghosi ati, ‘Nkwiza pakubafunda aba Amaleki pachifukwa icha kulwa ubwite naba Izilayeli, bo bakwepamo mu Ijiputi.

³ Losi ulu, buka pakulwa ubwite naba Amaleki, sona muvinangannye ivintu vyabo vyosi. Patakabepo nayumoyumo umuntu uwakupona. Mubaghoghe abanavuli na bakolo na bana na babonda ni ng'ombe ni ng'ozi ni ngamila sona ni mpunda zyabo.’ ”

⁴ Po u Sabuli akababungannya poka abasilikali bache mu Telayimu nukubabelenga. Abasilikali abakwenda pasi bakabapo 200,000, sona abasilikali aba mu Yuda bakabapo 10,000.

⁵ Po u Sabuli akabuka mukaya akakulu nkani aka ba Amaleki nukubavwamilila mu kalusoko.

⁶ Akababuzya aba Keni akati, “Epapo pakasi paba Amaleki, lumo ningabaghoghela poka nabo, pakuti amwe mukabapelela ichisa aba Izilayeli, bo bakwepamo mu Ijiputi.” Po aba Keni bakepapo pakasi paba Amaleki bala.

⁷ U Sabuli akabapota aba Amaleki ukwandila ko ku Havila mupaka ku Shuli, kubufumilo bwizuba ubwa Ijiputi.

⁸ Akamulema mumi u Agagi u mwene uwa ba Amaleki nukubaghogha abantu bache bosi.

⁹ Loli u Sabuli na basilikali bache bakamuleka mumi u Agagi sona batakazighogha ing'ozi ni ng'ombe ni ngwata inyine nkani sona na bana abang'ozi. Batakachighogha ichintu chosi chicho chikaba chiza. Batakalondagha pakuvinangannya ivintu vinivi loli bakavinangannya ivintu vyosi vivyo vikaba vibibi sona vitakaba ni mbombo.

¹⁰ Po u Mwene akamubuzya u Samuweli akati,

¹¹ “Indi ni chitima nkani ukuti nkamwimika u Sabuli pakuba we mwene. U Sabuli ansambukila, sona aleka pakughakonka amalamulo ghane.” U Samuweli akakalala nkani, po akamulambilizya u Mwene ubusiku bosi bulabula.

¹² Pandabindabi nkani, u Samuweli akabuka pakukomana nu Sabuli, loli akabuziwa ukuti, “U Sabuli abukite ku Kalimeli, kuko akiyimikila mwene ichikumbusyo, sona akabuka ku Giligali.”

¹³ Bo u Samuweli amwagha u Sabuli, u Sabuli akamubuzya akati, “U Mwene akusaye! Nabomba zyosi zizyo u Mwene akandamula.”

¹⁴ Loli u Samuweli akalalusya akati, “Po nkimba choni chicho nkwivwa ukumeta ukwa ng'ozi nukumota ukwa ng'ombe?”

¹⁵ U Sabuli akamula akati, “Abasilikali bavisendite kuba Amaleki, sona basungiteko ing'ozi ni ng'ombe inyiza nkani ukuti zibanje chakwiyipa kwa Mwene u Chala wako, loli ivintu ivyinji vyosi twavinangannya.”

¹⁶ Po u Samuweli akamubuzya akati, “Banga myee! Leka nkubuzye zizyo u Mwene ambuzizye pabusiku.” U Sabuli akamula akati, “Mbuzya.”

¹⁷ U Samuweli akati, “Napapo kale ukipimagha wemwene pakuba we mwana umunandi nkani, nkimba te we mulongozi uwa inko izya Izilayeli? U Mwene akakupakazya amafuta ukuti ubanje we mwene uwa ba Izilayeli.

¹⁸ Po akakutuma akati, ‘Bukagha ubazimizye aba Amaleki, abantu ababibi bala. Buka ulwe nabo ubwite mupaka ubazimizye bosi.’

¹⁹ Nkimba choni chicho utakamwivwila u Mwene? Nkimba choni chicho ukachimbilila pa vyakufyula nukubomba vivyo vitakumuhobosya u Mwene?”

²⁰ Po u Sabuli akamwamula akati, “Loli ane nkamwivwila u Mwene, sona nkabomba zyosi zizyo akandamula. Ane nkabazimizya aba Amaleki bosi nukumulema mumi u Agagi u mwene wabo.

²¹ Abasilikali bane batakazighogha ing'ozi ni ng'ombe inyine zizyo bakazifyula, loli bakiza nazyo ukuti chibanje chakwiyipa kwa Mwene u Chala wako mu Giligali.”

²² Loli u Samuweli akati, “Nkimba u Mwene akuhoboka ni vyakwiyipa ivyakocha, sona ni vyabupi pamo ukughivwila amazyu ghache? Ukwivwila chintu chizapo ukuchila ichakwiyipa, ukughakonka amalamulo ghache chizapo, ukuchila ichakwiyipa icha mafuta agha dubi.

²³ Pakuti ukumusambukila u Mwene, kuyanite bulo na mayele. Ukwituvya yo mbibi, yiyo yiyanite bulo nukwiputa ivifwani. Pachifukwa ichakuti waghakana amazyu agha Mwene, wepe akukana ukuti utakabanje sona we mwene.”

²⁴ Po u Sabuli akamubuzya u Samuweli akati, “Nananga, ane ntakaghivwila amalamulo agha Mwene, sona ntakabomba zizyo akambuzya. Nkabanyilagha abantu, po nkabomba zizyo bakalondagha.

²⁵ Losi ulu nalamba, uhobokele imbibi yane, sona unyokele poka nane, umwakuti imwipute u Mwene.”

²⁶ Loli u Samuweli akamubuzya akati, “Ntangabuka poka nawe, pakuti ukaghakana amalamulo agha Mwene, po wepe akukana ukuti utakabanje we mwene uwa ba Izilayeli.”

²⁷ Bo u Samuweli aghalabuka ukuti abukaye, u Sabuli akalema muntende munkazo yache, po inkazo yila yikazepuka.

²⁸ U Samuweli akamubuzya akati, “U Mwene abuzepula ubumwene ubwa Izilayeli ukubwefyako kukwako ukwanda ilelo, po amupa umuntu yumo umwizapo ukukuchila awe.

²⁹ U Chala uwabuchindamu uwa Izilayeli atakutamanta, pamo ukwandula inyinong'ono. Pakuti te muntu ukuti andule inyinong'ono.”

³⁰ Po u Sabuli akamula akati, “Nananga! Loli nalamba, unchindikayeko pamaso pa balongozi aba bantu bane, sona na pamaso paba Izilayeli. Twende unyokele poka nane umwakuti imwipute u Mwene u Chala wako.”

³¹ U Samuweli akanyokela poka nawe, po u Sabuli akamwiputa u Mwene.

³² Po u Samuweli akamubuzya u Sabuli akati, “Zagha nawe kuno u Agagi, u mwene uwa Amaleki yula.” U Agagi akiza kwa Samuweli, bo ahobokite nkani, pakuti akinong'onagha akati, “Naloli intamyo zyamala, sona napona!”

³³ Loli u Samuweli akati, “Upanga wako abapelela abakolo pakuba basita bana, umwakuyana bulo unyoko akwiza pakuba musita bana.” Po u Samuweli akamudumulannya u Agagi yula pamaso pa Mwene mu Giligali.

³⁴ Pisinda pache u Samuweli akabuka ku Lama, wepe u Sabuli akabwela kukaya kache aka Gibeya.

³⁵ U Samuweli atakakomanapo sona nu Sabuli mupaka pisiku lilyo u Samuweli yula akafwila, napapo akamulililagha nkani. Po u Mwene akaba ni chitima nkani, pakuti akamwimika u Sabuli ukuti abanje we mwene uwa ba Izilayeli.