1 Samuweli 14 - IBAYIBOLO 2024

Imbombo izya Yonatani izya bujivu

¹ Isiku limo u Yonatani umwana uwa Sabuli akamubuzya umulumendo yuyo akamunyamulilagha ivilwilo vyache ivya bwite akati, “Twende tulobokele kwisila kuko kuli ivisakasa ivya ba Filisiti.” Loli atakamubuzyapo uwise.

² U Sabuli akazenga ichisakasa chache muntende mwikwi ilya manyele mu Miguloni, papipi nu Gibeya. U Sabuli akaba na bantu pipipipi 600.

³ Pakasi pabantu balabala pakabapo umuputi u Ahiya, yuyo akavwalagha u efodi. U Ahiya akaba mwana uwa Ahitubi, uwamwabo uwa Ikabodi, umwana uwa Finehasi, sona umwizukulu uwa Eli, yuyo akaba muputi uwa Mwene mu Shilo. Po abantu bala batakazimanya ukuti u Yonatani epitepo.

⁴ Piloboko ilya Mikimashi papo u Yonatani akalondagha apakulobokelapo ukuti afike kwisila kuko kukaba ivisakasa ivya ba Filisiti pakabapo amabwe mabili amasongoke kumbazu zyosi zibili. Ibwe lyoka likitiziwanga ukuti Bozezi, ilinji likitiziwanga ukuti Sene.

⁵ Ibwe lyoka likaba kumitu umwakwenannya nu Mikimashi, sona ilinji likaba kuntende umwakwenannya nu Geba.

⁶ U Yonatani akamubuzya umulumendo yula akati, “Twende tulobokele kwisila kuko kuli ivisakasa ivya bantu babo batasilimuliwe. Lumo u Mwene akwiza pakutulwila ubwite, pakuti chitalipo nachimochimo chicho chingamukanizya ukuti atupoke manyi twe binji pamo twe banandi.”

⁷ Umulumendo yula akamula akati, “Bombagha bulo chosi chicho ukulonda. Ane indi poka nawe.”

⁸ Po u Yonatani akamubuzya akati, “Twende tulobokele ku bantu bala, sona twilanjizye kukwabo.

⁹ Nanti bakuti, ‘Lindilila tasi panapo mupaka twize kunuko,’ po tukwiza pakubalindilila palapala.

¹⁰ Loli nanti bakuti, ‘Zagha kuno,’ po tukwiza pakubuka, pachifukwa ichakuti ichi chikwiza pakuba chimanyilo ichakuti u Mwene ababika munyobe zyitu.”

¹¹ Po bosi babili bala bakabuka pakwilanjizya bene pamaso paba Filisiti. Aba Filisiti bala bakati, “Ennya, aba Hebeli bakufumamo muviliba mumo bavwamiliyemo!”

¹² Po abasilikali aba ba Filisiti bakamwitizya u Yonatani, poka nu mulumendo yula bakati, “Zagha kuno, aswe tukwiza pakubayannya.” U Yonatani akamubuzya umulumendo yula akati, “Unkonke, u Mwene ababika abantu banaba munyobe izya ba Izilayeli.”

¹³ Po u Yonatani akakwela umwakwavula, po umulumendo yula akamukonkagha mwisinda. U Yonatani, poka nu mulumendo yula bakabaghogha aba Filisiti bala.

¹⁴ Pisiku lilalila u Yonatani poka nu mulumendo yula bakaghogha abantu pipipipi 20, pabuzilo ubwa mamita 35.

¹⁵ Abasilikali babo bakaba muvisakasa, na babo bakaba mumaghunda, na balindilili, sona naba mukabukatila akakufyula ivintu bakavulungana nkani pachifukwa icha bogha. U Chala akabatumila ukuvulungana ukukulu nkani, umwakuti ichisu chikaneng'ena, sona kukaba akasenyenta.

Aba Izilayeli bakubapota aba Filisiti

¹⁶ Abalindilili aba Sabuli aba mu Gibeya muchisu icha Benjamini bakabennya aba Filisiti bakunyampanila posi na posi pachifukwa icha kuvulungana.

¹⁷ Po u Sabuli akababuzya abantu babo bakaba nawe akati, “Babelenge abantu umwakuti twennye wewenu yuyo atalipo pano.” Bo bababelenga abantu bala, bakagha ukuti u Yonatani, poka nu mulumendo yuyo akamunyamulilagha ivilwilo vyache batakabapo palapala.

¹⁸ U Sabuli akamubuzya umuputi u Ahiya akati, “Zagha nu ni Bokosi ilya Lufingo ilya Chala.” Pakabalilo kalakala u efodi akaba naba Izilayeli.

¹⁹ Bo u Sabuli akunenezannya nu muputi yula, ukuvulungana kukonjelelagha bulo muvisakasa ivya ba Filisiti. Po u Sabuli akamubuzya umuputi yula akati, “Leka pakubuzikizya!”

²⁰ Po u Sabuli na bantu bache bosi bakabungana pakulwa ubwite naba Filisiti bala, nukubagha aba Filisiti bala bakaghoghanagha benebene pachifukwa icha kuvulungana.

²¹ Aba Hebeli babo pakwanda bakaba kulubazu ulwa ba Filisiti, sona babo bakabuka poka nabo kuvisakasa vyabo, bope bakasambuka nukuba poka naba Izilayeli, babo bakaba kulubazu ulwa Sabuli nu Yonatani.

²² Bo aba Izilayeli bosi babo bakavwama muchisu icha mumaghamba icha Efulayimu bivwa ukuti aba Filisiti bakuchimbila, bope bakiza pakubachimbizya aba Filisiti balabala.

²³ Po pisiku lilalila u Mwene akabapoka aba Izilayeli, sona ubwite bula bukalobokela mupaka mukaya akakulu nkani aka Beti Aveni.

U Yonatani akulya ubuchi

²⁴ Aba Izilayeli bakayimba nkani pisiku lilalila, pachifukwa ichakuti u Sabuli akalapa ichilapo pamaso pabantu bala akati, “Aghuniwanje umuntu wesi yuyo akulya ichakulya chimo bo kuchili pakwila, sona bo intabatanizizye abalwani bane.” Po patakabapo nayumoyumo yuyo akalabukapo ichakulya pisiku lyosi lilalila.

²⁵ Abantu bosi bakinjila mumusitu ghumo mumo bakabwagha ubuchi.

²⁶ Bo binjila mumusitu mula bakabwennya ubuchi bukutonya, loli patakabapo nayumoyumo umuntu uwa kubumyanta ubuchi bula, pachifukwa ichakuti bosi bakanyilagha ichilapo icha Sabuli.

²⁷ Loli u Yonatani atakivwa ichilapo chicho uwise akalapa pamaso pabantu bala. Polelo akatumya ndisa yache yila muvitenga ivya buchi nukubumyanta. Panapo na panapo amaka ghakanyokelamo.

²⁸ Po umusilikali yumo akati, “Ughuso akalapa ichilapo pamaso papitu akati, ‘Aghuniwanje umuntu wesi yuyo akulya ichakulya chimo ilelo.’ Ichi cho chifukwa twadedebala nkani.”

²⁹ U Yonatani akati, “Utata wane achipelela intamyo ichisu. Ennya amaka ghane ghanyokelamo bo naghonja ubuchi panandi bulo.

³⁰ Nanti abantu bitu bakalyangako ichakulya chimo pavintu vivyo bakabafyula abalwani babo, ngali chaba akiza bulo, sona ngali twabaghogha aba Filisiti abinji nkani ilelo.”

³¹ Pisiku lilalila bo aba Izilayeli babaghogha aba Filisiti ukwandila ku Mikimashi mupaka ku Ayaloni, bakalita nkani.

³² Po bakachimbilila pavintu vivyo bakabafyula abalwani babo, nukusendapo ing'ozi ni ng'ombe, sona ni ngwata nukuzibola. Bakalya inyama, bo ni banda lichili lili mumo.

³³ Umuntu yumo akamubuzya u Sabuli akati, “Ennya abantu bakumunangila u Mwene pakulya inyama, bo ni banda lichili lili mumo.” U Sabuli akati, “Ilelo mwamusambukila u Mwene! Bunguluzizya ibwe ikulu nkani kuno lubilolubilo.”

³⁴ Po sona akati, “Bukagha pakasi pabantu mubabuzye muti, ‘Umuntu wesi anyizile ni ng'ombe pamo ing'ozi azighoghele pano nukuzilya. Mutakamunangilaye u Mwene pakulya inyama, bo ni banda lichili lili mumo.’ ” Ubusiku bulabula umuntu wesi akiza ni ng'ombe yache nukuyighoghela palapala.

³⁵ U Sabuli akamuzengela ichighemo u Mwene, po kanaka kakaba kakwanda ukuti u Sabuli amuzengele u Mwene ichighemo.

³⁶ Po u Sabuli akati, “Twende tubuke pabusiku pakulwa ubwite naba Filisiti nukubafyula ivintu vyabo mupaka kubuche, sona patakabepo nayumoyumo umuntu uwakupona.” Bakamwamula bakati, “Bombagha bulo chosi chicho ukulonda.” Loli umuputi yula akati, “Leka tasi tubuzikizye kwa Chala.”

³⁷ Po u Sabuli akamulalusya u Chala akati, “Nkimba tungalwa ubwite naba Filisiti? Nkimba ukwiza pakubabika munyobe zyitu?” Loli u Chala atakamwamula pisiku lilalila.

³⁸ Polelo u Sabuli akati, “Mwee balongozi aba basilikali, zagha kuno, umwakuti twennye imbibi yiyo yabombiwa ilelo.

³⁹ Nkulapa pamaso pa Mwene umumi yuyo akubapoka aba Izilayeli, ukuti nanti umuntu yuyo ananga we mwana wane u Yonatani, naloli afwanje.” Loli patakabapo nayumo umuntu pakasi papabo yuyo akamwamula.

⁴⁰ Po u Sabuli akabalamula aba Izilayeli bosi akati, “Mwee banga kulubazu loka. Ane nu mwana wane u Yonatani tukwiza pakwimilila pano.” Abantu bala bakamwamula bakati, “Bomba bulo chosi chicho ukulonda.”

⁴¹ Po u Sabuli akiputa kwa Mwene, u Chala uwa Izilayeli akati, “Nkimba choni chicho utakunyamula ne mubombi wako ilelo? Nanti nene imbombite imbibi pamo u mwana wane u Yonatani, wamulile mu bulaghuzi ubwa Ulimu, loli nanti imbibi iyi iya bantu bako aba Izilayeli po wamulile mu bulaghuzi bwako ubwa Tumimu. Po ubulaghuzi bukamulema u Yonatani nu Sabuli, po abantu bosi batakaba ninongwa nayimoyimo.”

⁴² Po u Sabuli akati, “Bomba amayele pakasi papane nu mwana wane u Yonatani.” Po chikamuwila umwana wache.

⁴³ Po u Sabuli akamulalusya u Yonatani akati, “Mbuzya chicho wabomba?” U Yonatani akamwamula akati, “Nkamyanta ubuchi bumo panandi bulo na kukasonga aka ndisa yane. Po nkimba imbaghiye pakufwa!”

⁴⁴ U Sabuli akati, “U Chala anfunde nanti awe Yonatani nanti utakwiza pakufwa!”

⁴⁵ Loli abantu bala bakamubuzya u sabuli bakati, “Nkimba u Yonatani afwanje, yuyo abomba imbombo inkulu nkani iya kubapoka aba Izilayeli kubwite? Awe. Tukulapa mwitabwa ilya Mwene umumi ukuti nalimolimo isisi lyoka ilya kumutu wache lilyo likwiza pakuwa pasi, pakuti chicho abombite ilelo, achibomba na maka agha Chala.” Po abantu bala bakamupoka u Yonatani, umwakuti atakaghoghiwa.

⁴⁶ Pisinda pache u Sabuli akaleka pakubakonka aba Filisiti, po aba Filisiti bala bakanyokela kuchisu chabo.

U Sabuli na bamunyumba yache

⁴⁷ Bo u Sabuli aba we mwene uwa ba Izilayeli, akalwa ubwite na balwani babo bakamuzyungulila. Akalwa naba Mowabu naba Amoni sona naba Edomu na bamwene aba ku Zoba sona naba Filisiti. Kosi kuko akabukagha akabapotagha bosi.

⁴⁸ U Sabuli akalwa ubwite nu bujivu nkani, umwakuti akabapota aba Amaleki, sona akabapoka aba Izilayeli munyobe izya bantu babo bakabafyulagha ivintu vyabo.

⁴⁹ Abana aba Sabuli bakaba bo aba: U Yonatani nu Ishivi nu Malikishuwa. Umwana wache umulindu usongo akaba we Melabu, sona umunandi akaba we Mikali.

⁵⁰ Umuchi wache akaba we Ahinowamu, umwana uwa Ahimazi. Usongo uwa basilikali aba Sabuli akaba we Abinala, umwana uwa Neli, uwise umunandi.

⁵¹ Uwise uwa Sabuli u Kishi nu wise uwa Abinala u Neli bakaba bana aba Abiyeli.

⁵² U Sabuli akalwanga ubwite naba Filisiti mubumi bwache bosi, sona nanti u Sabuli amwennya umuntu uwamaka sona umujivu akamubikagha pa mbombo iya busilikali.