1 Samuweli 13 - IBAYIBOLO 2024

Ubwite naba Filisiti

¹ U Sabuli akimikiwa pakuba we mwene bo ali na maka 30, sona akabalaghila aba Izilayeli amaka 42.

² U Sabuli akabasala aba Izilayeli 3,000. Aba Izilayeli 2,000 bakaba poka nawe mu Mikimashi muchisu icha mumaghamba icha Beteli, sona aba Izilayeli 1,000 bakaba poka nu Yonatani mu Gibeya muchisu icha Benjamini. Po u Sabuli akababwezya aba Izilayeli abanji bosi kutwaya twabo.

³ U Yonatani akamughogha usongo uwa basilikali uwa ba Filisiti yuyo akaba mu Geba, po aba Filisiti bakivwa zinizi. U Sabuli akabatuma abantu ukuti balizye ipati muchisu chosi chilachila nukuti, “Aba Hebeli bivwe zinizi.”

⁴ Aba Izilayeli bosi bakabuziwa ukuti, “U Sabuli akamughogha usongo uwa basilikali aba ba Filisiti, sona nukuti aba Filisiti bakababenga nkani aba Izilayeli.” Po abasilikali bakitiziwa pakuba poka nu Sabuli mu Giligali.

⁵ Aba Filisiti bakabungana poka ukuti balwe ubwite naba Izilayeli. Bakaba ni ngolo izya bwite 30,000, na bendezya ingolo 6,000, sona na basilikali abinji nkani ngati musesenga uwa mulubazu ulwa nyanja. Bakazenga ivisakasa vyabo mu Mikimashi kubufumilo bwizuba ubwa Beti Aveni.

⁶ Bo aba Izilayeli bennya ukuti bali muntamyo nkani, sona nukuti abasilikali babo bakabavwanila, bakavwama mumpako na mumisitu, na mumabwe, na muvibwina, sona na muviziba.

⁷ Abanji bakaloboka ulusoko ulwa Yolodani nukufika muchisu icha Gadi, nicha Giliyadi. Loli u Sabuli akasyalikila mu Giligali, sona abasilikali bosi babo bakaba nawe bakatetemagha nubogha.

⁸ U Sabuli akamulindilila u Samuweli amasiku seveni ngati mumo akamubuzizya, loli pope bulo u Samuweli atakabukako ku Giligali kulakula, po abantu aba Sabuli bakanda pakumutoloka.

⁹ U Sabuli akati, “Zagha ni chakwiyipa ichakocha, poka ni vyakwiyipa ivyabupoka.” Po u Sabuli akabika ichakwiyipa ichakocha chila.

¹⁰ Bo amala bulo pakubika ichakwiyipa chila u Samuweli akafika, po u Sabuli akabuka pakumulamuka.

¹¹ U Samuweli akalalusya akati, “Nkimba wabomba choni?” U Sabuli akamula akati, “Bo nennya ukuti abantu bakuntoloka, nukuti utakiza pakabalilo kako kache, sona nukuti aba Filisiti bakabungana mu Mikimashi,

¹² Nkinong'onagha ukuti, ‘Aba Filisiti bakwiza pakulwa nane ubwite mu Giligali, sona nukuti intakamubuzikizya u Mwene.’ Po ninfyengite bulo ukuti imbike ichakwiyipa ichakocha chinichi.”

¹³ U Samuweli akamubuzya akati, “Wabomba ivyabupunganu nkani. Awe utakaghasunga amalamulo ghagho u Mwene u Chala wako akakupa. Nanti ukabombagha bunubu, ngali ikazizye ubumwene bwako pakasi paba Izilayeli bwila na bwila.

¹⁴ Loli ilelo ubumwene bwako butakwiza pakwikalana. U Mwene ilondela mwene umuntu uwa pamoyo wache, nukumusala ukuti abanje mulaghili uwa bantu bache, pachifukwa ichakuti utaghakonkite amalamulo agha Mwene.”

¹⁵ U Samuweli akanyamuka mu Giligali nukubuka ku Gibeya muchisu icha Benjamini, po u Sabuli akababelenga abantu babo bakaba nawe, sona bosi poka bakabapo 600.

¹⁶ Po u Sabuli nu mwana wache u Yonatani, poka na bantu babo bakaba nawe bakikala mu Gibeya muchisu icha Benjamini. Loli Aba Filisiti bakazenga ivisakasa mu Mikimashi.

¹⁷ Abasilikali aba ba Filisiti bakepamo muvisakasa vyabo mutubukatila tutatu. Akabukatila kakwanda kakabuka ku Ofula muchigaba icha Shuwala,

¹⁸ akabubili kakabuka ku Beti Holoni, sona akabutatu kakabuka kumpaka yiyo yikenannyanga ni kombe ilya Zeboyimu, sona ni nkolongo.

¹⁹ Pakabalilo kalakala mu Izilayeli mosi mutakabamo nayumoyumo uwakusyana, pachifukwa ichakuti aba Filisiti bakati, “Tutakabitikizye aba Hebeli ukuti bisyanile bene abapanga ni mpalala.”

²⁰ Po aba Izilayeli bosi bakabukagha kuba Filisiti ukuti babapyasikizye abapulabo na majembe ni ntemo sona ni sengo.

²¹ Umutengo uwakupyasikizya abapulabo na majembe ghukaba isalabazya yoka iya siliva, sona umutengo uwakupyasikizya intemo ni sengo ghukaba isalabazya zibili izya siliva.

²² Po pisiku ilya bwite lila patakabapo nayumoyumo umusilikali uwa Sabuli nu Yonatani, yuyo akaba nupanga pamo impalala munyobe yache. Loli u Sabuli nu mwana wache u Yonatani bo babo bakaba ni vilwilo.

²³ Po akabukatila aka basilikali aka ba Filisiti kakadumusannya piloboko ilya Mikimashi.