1 Samuweli 12 - IBAYIBOLO 2024

U Samuweli akubalagha abantu

¹ U Samuweli akababuzya aba Izilayeli akati, “Nabomba zyosi zizyo mukalondagha, sona nabimikila u mwene ukuti abalaghilaye.

² Losi ulu muli nu mwene uwakuti abalongozyanje. Ane naghosipa, sona kumutu kuli ivwi, abana bane bali poka namwe. Name mulongozi winyu ukwandila ko kubulumendo bwane mupaka ilelo.

³ Ane indi pano, nanti imbombitepo ichintu chimo ichibibi munsusye pamaso pa Mwene, na pamaso pa mupakiwa wache. Nkimba wewenu yuyo imufyulitepo ing'ombe yache? Nkimba alipo umuntu yumo yuyo imufyulitepo impunda yache? Nkimba wewenu yuyo imuzimbuyepo? Nkimba wewenu yuyo imuyivizyepo? Nkimba alipo umuntu yumo yuyo ampiyepo amabeko? Nanti imbombitepo ichintu chimo pavintu vyosi vinivi, nkwiza pakubanyosekezya vyosi.”

⁴ Abantu bala bakamula bakati, “Awe, utatuzimbuyepo pamo ukutuyivya napo panandi. Utamufyulitepo umuntu nayumoyumo ichintu chache.”

⁵ U Samuweli akababuzya abantu akati, “U Mwene we kaboni pakasi papane namwe, sona wepe umupakiwa wache we kaboni ilelo umwakuti mutanyaghitepo ninongwa nayimoyimo.” Abantu bakamula bakati, “Naloli u Mwene we kaboni.”

⁶ U Samuweli akababuzya abantu bala akati, “U Mwene weyuyo akamusala u Mozesi nu Aloni, ukuti abefyamo abanyenya binyu mu Ijiputi.

⁷ Polelo imilila bulo panapa ukuti imbasusye pamaso pa Mwene pambombo zyosi ingolosu zizyo u Mwene akababombela, amwe poka na banyenya binyu.

⁸ “Bo u Yakobo na bamunyumba yache babuka ku Ijiputi, aba Ijiputi bakabayivya. Bakamulilila u Mwene ukuti babavwe, po u Mwene akabatumila u Mozesi nu Aloni, babo bakabefyamo abanyenya binyu mu Ijiputi nukubikazya pabuzilo ubu.

⁹ “Loli abanyenya binyu bakamuluvya u Mwene u Chala wabo. Po u Mwene akababika munyobe izya Sisela, usongo uwa basilikali aba mu Hazoli, na munyobe izya ba Filisiti, sona na munyobe izya mwene uwa ba Mowabu, babo bakalwa nabo ubwite.

¹⁰ Bakamulilila u Mwene bakati, ‘Aswe twananga, pachifukwa ichakuti twamukana u Mwene, nukumubombela u Baala ni vifwani ivya Ashitoleti. Loli ilelo tupoke munyobe izya balwani bitu, po tukwiza pakukubombela.’

¹¹ U Mwene akamutuma u Yelubi Baala nu Balaki nu Yefuta, sona nu Samuweli, po akabapoka munyobe izya balwani binyu kunkuto zyosi, umwakuti mwikalaye umwakufwasa.

¹² “Loli bo mwennya ukuti u Nahashi u mwene uwa ba Amoni akwiza pakulwa namwe ubwite, amwe mukambuzya mukati, ‘Awe, tukulonda u mwene ukuti atulaghilaye, napapo u Mwene u Chala winyu akaba we mwene winyu.’

¹³ Ilelo u mwene yuyo mukamusala we uyu. U mwene yuyo mukamulondagha, weyuyo u Mwene abapiye.

¹⁴ Nanti mukumunyila u Mwene, nukumubombela nukumwivwila, ukusita ukukana amalamulo ghache, sona nanti amwe, poka nu mwene winyu yuyo akubalaghila mukumwivwila u Mwene u Chala winyu, chiza bulo.

¹⁵ Loli nanti mutakumwivwila u Mwene, nukughakana amalamulo ghache, po akwiza pakubafunda ngati mumo akabafundila abanyenya binyu.

¹⁶ “Polelo imilila bulo panapa ukuti mwennye ichintu ichikulu chicho u Mwene akwiza pakubomba pamaso papinyu.

¹⁷ Nkimba aka te kabalilo akakwinulila ingano? Pope bulo nkwiza pakwiputa, sona u Mwene akwiza pakubajilimizizya nukubawisizya ivula. Po mukwiza pakuzyaghannya ukuti mukabomba imbibi inkulu nkani pamaso pa Mwene pakumulaba ukuti abape u mwene.”

¹⁸ U Samuweli akiputa kwa Mwene, po pisiku lilalila Mwene akabajilimizizya nukubawisizya ivula, umwakuti abantu bosi bakamunyila nkani u Mwene, poka nu Samuweli.

¹⁹ Abantu bosi bakamubuzya u Samuweli bakati, “Twalamba, twiputileko kwa Mwene u Chala wako, aswe twe babombi bako ukuti tutakafwe, pakuti ilelo twazyaghannya ukuti pamwanya pambibi zyitu zyosi, tonjelezizyepo imbibi iyinji iyakuti tubanje nu mwene.”

²⁰ U Samuweli akabamula akati, “Mutakanyilaye. Amwe naloli mwananga, sona mutakamukane u Mwene. Loli mumubombelaye u Mwene nu moyo winyu ghosi.

²¹ Sona mutakavyiputaye ivifwani vivyo vite ni mbombo, vivyo vitangabavwa napo panadi, pamo ukubapoka bo muli muntamyo.

²² U Mwene atakwiza pakubakana abantu bache, ukuti lumo itabwa lyache ikulu lingasamuliwa, pakuti chikamuhobosya u Mwene pakubapela amwe ukuti mubanje mwe bache na bache.

²³ Ane ntakulonda ukuti imunangile u Mwene pakukana pakubiputila. Loli nkwiza pakubamanyisya chicho chiza sona chigholosu.

²⁴ Mwenelezye nkani ukuti mukumunyila u Mwene, nukumubombela mubwanaloli bwinyu bosi nu moyo winyu ghosi. Akabalilo kosi mukumbukaye ivintu ivikulu vivyo ababombela.

²⁵ Loli nanti mukwendelela pakunanga, kokuti amwe, poka nu mwene winyu mukwiza pakuzimila.”