1 Samuweli 11 - IBAYIBOLO 2024

U Sabuli akukapoka akaya akakulu nkani aka Yabeshi

¹ U mwene u Nahashi uwamu Amoni, poka na basilikali bache akabuka nukukazyungulila akaya akakulu nkani aka Yabeshi muchigaba icha Giliyadi. Po abantu bosi aba mu Yabeshi bakamubuzya u Nahashi bakati, “Zagha ufingane naswe ulufingo, po aswe tukwiza pakuba twe bambombo bako.”

² Loli u Nahashi akamula akati, “Nkwiza pakufingana namwe ulufingo, pene papo nanti namukolompola umuntu wesi ilyiso ilyandilo, umwakuti imbakozye isoni aba Izilayeli bosi.”

³ Abasongosongo aba mu Yabeshi bakati, “Utupe amasiku seveni ukuti tutume intumi muchisu chosi icha Izilayeli. Nanti atalipo nayumoyumo umuntu uwakuti atupoke, po tukwiza pakwibika twebene munyobe zyako.”

⁴ Bo intumi zila zyafika ku Gibeya, kuko u Sabuli akikalagha nukubabuzya abantu amazyu ghanagha, abantu bosi bakalila nkani.

⁵ Pakabalilo kalakala u Sabuli akafumagha bulo kumughunda, bo ali kwisinda ukwa nkambaku zyache. Po akalalusya akati, “Nkimba choni chicho chabatamya abantu banaba? Choni chicho bali pakulila?” Palapala bakamubuzya amazyu ghagho abantu aba mu Yabeshi bakanena.

⁶ Bo u Sabuli ivwa amazyu ghabo, umuzimu uwa Chala ghukamwikila na maka umwakuti akakalala nkani.

⁷ Akasendapo inkambaku zibili zila nukuzighogha, sona akazidumulannya muvipuza. Po akazituma intumi ni vipuza vila muchisu chosi icha Izilayeli nukunena ukuti, “Umuntu wesi yuyo atakumukonka u Sabuli nu Samuweli, inkambaku zyache zikwiza pakuboliwa ngati bunubu.” Po abantu bala bakamunyila nkani u Mwene, sona abantu bosi bakanyamuka ngati muntu weka.

⁸ Bo u Sabuli ababungannya poka abantu pa Bezeki, akagha ukuti aba Izilayeli bakabapo 300,000, sona abaluko ulwa Yuda bakabapo 30,000.

⁹ Bakazibuzya intumi zizyo zikafuma ku Yabeshi bakati, “Mubabuzye abantu aba mu Yabeshi Giliyadi muti, ‘Indabi bo izuba likocha, mukwiza pakupokiwa.’ ” Bo abantu aba mu Yabeshi bivwa amazyu ghanagha bakahoboka nkani.

¹⁰ Po bakababuzya aba Amoni bakati, “Indabi tukwiza pakwibika twebene munyobe zyinyu, sona mungatubombela chosi chicho mukulonda.”

¹¹ Indabi yache u Sabuli akabagaba abantu bache mutubukatila tutatu, po kubuche bakinjila muvisakasa ivya ba Amoni nukubaghogha mupaka pamusanya. Abantu babo bakapona bakanyampana, umuntu wesi akachimbilagha pamwene.

¹² Po abantu bakamulalusya u Samuweli bakati, “Nkimba bali ko kwiyi abantu babo bakatinji, ‘U Sabuli atangaba we mwene witu?’ Zagha nabo kuno, tubaghoghe!”

¹³ Loli u Sabuli akati, “Atalipo nayumoyumo yuyo akwiza pakughoghiwa, pakuti ilelo u Mwene abapoka aba Izilayeli.”

¹⁴ Po u Samuweli akababuzya abantu bala akati, “Twende ku Giligali ukuti kope tubasimikizizye abantu nizya bumwene ubwa Sabuli.”

¹⁵ Abantu bosi bakabuka ku Giligali, po kulakula bakamwimika u Sabuli pamaso pa Mwene. Abantu bakabika ivyakwiyipa ivyabupoka kwa Mwene, po u Sabuli, poka naba Izilayeli bosi bakaba nu lusekelo ulukulu nkani.